மெட்டி ஒலி சரோ பாத்திரம்...

அவ்வப்போது கடைக்கண்ணால் மெட்டி ஒலி பார்த்தவன் நான். இந்தத் தொடரில் இரண்டு பாத்திரங்கள் என் கருத்தைக் கவர்ந்தன. ஒன்று கோபியின் பாத்திரம். மற்றொன்று சரோ பாத்திரம்.

சரோ, தொடரின் முந்தைய நாட்களில், மிகச் சிரமமான, ஆனால் தன்னால் ஒன்றும் செய்ய இயலாத சூழ்நிலைகளில் கூட காட்டிய பொறுமை வியக்க வைத்தது. அவரது கதாபாத்திரம் எப்போதுமே ஒரு உணர்ச்சி மிகுந்த ஆனால் அனைத்து உணர்ச்சிகளையும் அடக்கிக் கொண்டு மௌனமாக அழுதே தீர்க்கும் பாத்திரமாகத்தான் காட்டப் பட்டது. சரோவின் அடிப்படைப் பண்புகள் அல்லது குணங்கள் மிக நல்லவை என்றும் அவர் அப்பா பெருமைப் படக் கூடிய வகையில் நடக்கும் ஒரு மகள் என்றும் தொடரின் கடைசி வரை சித்தரிக்கப் பட்டிருந்தது.

தந்தை இறந்த காட்சியில் சரோவின் சீற்றத்தை என்னால் புரிந்து கொள்ள முடிந்தது. ஆனால் அதை அவர் வெளிப்ப்படுத்திய விதம் அவரது உயர்ந்த பாத்திரப் படைப்பை சிதைத்து விட்டது.

எவருக்குமே தந்தையின் இழப்பு ஈடு செய்ய முடியாதது. சொல்லொணா துயரத்தையும் துக்கத்தையும் அளிக்கக் கூடியது. அப்படிப் பட்ட துக்கம் தாக்கும் போது மனம் நடுநிலையில் வேலை செய்யாதுதான். அப்போதுதான் அடிப்படைப் பண்புகள்தாம் ஒருவரது வார்த்தைகளையும் செய்கைகளையும் கட்டுப் படுத்தும்.

ஒருவரது தந்தை இருந்த போதும் இறந்த போதும் அவரது பிள்ளைகள் செய்யும் காரியங்கள் அவரது பெயரைப் பாதிக்கும். ஆகவே ஒருவர் உயிருடன் இருக்கும் போது அவர் மேலுள்ள பாசத்தால் ஒரு நடத்தை, அவர் இல்லாத போது அடிப்படைப் பண்புகள் தலைதூக்கும் வேறொரு நடத்தை என்பது உயர்ந்த மனிதப் பண்புகள் உள்ள பெண் என்று சித்தரிக்கப் பட்ட ஒரு பாத்திரத்தை முழுமையாக சிதைக்கும் ஒரு செயல்.

தொடரில் இந்தக் கட்டத்திற்கு முன்னெல்லாம் சரோ என்ற பெண் மென்மையானவளாகவும், கனிவானவளாகவும், கொடுமைகளை சகித்துக் கொள்பவளாகவும், அப்பாவின் பேச்சுக்கு மிகுந்த மரியாதை உடையவளாகவும் சித்தரிக்கப் படுகிறார். ஒருவர் இறந்த பின் அவர் பேச்சுக்கு மரியாதை கொடுக்கப் படவேண்டியதில்லை என்றால் அவருடன் இருந்த அப்பா மகள் உறவிற்கு முதலிலிருந்தே மதிப்புக் கொடுக்கப் படவில்லை என்று அர்த்தம். இங்கேயும் பாத்திரச் சிதைவு வந்து விட்டது.

மரியாதை இல்லாமல் பெரியவர்களையும் கணவனையும் கொடிய வார்த்தைகளைக் கொட்டி திட்டித் தீர்த்த சரோ தனக்கும் அவர்களுக்கும் அடிப்படைக் குணத்தில் பெரிய வித்தியாசமில்லை என்று காட்டி விட்டார். பிறகு அவர் யார் மற்றவர்களை மன்னிக்க? பின்னர் கணவனை மட்டும் மன்னித்ததும், மாமியாரை கடைசி வரை வெளிப்படையாக எல்லோருக்கும் முன் வைத்து மன்னிக்க முடியாது என்று கூறியதும் அந்தப் பாத்திரத்தை சுயநலமுள்ளதாகவும், அரக்க குணமுள்ளதாகவும் சித்தரித்து விட்டது. பெருந்தன்மை என்ற குணம் அந்த கதாபாத்திரத்தில் இம்மியளவும் காட்டப் படவில்லை.

கதாபாத்திரத்தின் உணர்ச்சிகளுக்கு வடிகால் தேவைப்பட்டது என்றாலும் இத்தனை அடிப்படை முரண்பாடுகள் கொஞ்சம் அதிகம்தான்.

சன் டீவி திரை விமரிசனம் பாணியில் சொல்லவேண்டுமென்றால் "சரோ....... ஒரு ஸாரோ (Sorrow)!"

நிறைய எதிர்கால மாமியார்கள் மெட்டி ஒலி சரோவைப் போல மருமகள் தேடுகிறார்களாம். திருமண வயதில் உள்ள இளைஞர்களே.. சிந்தித்துத் தலையைக் (அல்லது ஆண்களுக்குக் கால் கட்டு போடுவதால் காலைக்) கொடுங்கள்!!!

நிறைய தமிழ் மருமகள்கள் மற்றும் மருமகளாகப் போகும் இளம் பெண்கள் சரோ பாத்திரத்தை மெட்டி ஒலி முடியும் நாளில் வானொலியிலும், தொலைக்காட்சி நேரடி ஒளிபரப்பிலும் தலையில் தூக்கி வைத்துக் கொண்டு ஆடினார்கள்.

தமிழ் சமுதாயம் இன்னும் உணர்ச்சி பூர்வமாகத்தான் சிந்திக்கிறது.

வம்புக்கு இழுத்து விட்டேன். வாருங்கள் அரிவாளுடன்!!!