கற்றதும் சிந்தித்ததும் !!

இன்செப்ஷன் - திரைப்பட அனுபவம்

2010-07-24T02:46:00.000-07:00

இணைய தள சீட்டியகத்தில் (குழம்ப வேண்டாம் - 'ட்விட்டரை'த்தான் அப்படி தமிழ் படுத்தியிருக்கிறோம்) ஆறு மணி நேரத்தில் இந்தப் படத்தைப் பற்றி 7000 சீட்டியடித்தார்கள். அப்படியாகத்தானே பிரமாதப் படுத்தப் பட்ட படத்தைப் பார்க்க அம்பா 'ஸ்கைவாக்' சென்றோம்.

இன்செப்ஷன் என்றால் ஆரம்பம் அல்லது தொடக்கம் என்று தமிழ் அகராதியில் பொருள் சொல்லியிருக்கிறார்கள். படம் சுமார் 130 நிமிடமே ஓடுகிறது.

கதையில் ஒரு பெரும் வணிகப் பேரரசை உருவாக்கிய கிழவர் சாகக் கிடக்கிறார். அவர் மகனுக்கு ஆட்சிப் பொறுப்பு போகப் போகிறது. எதிர் நிறுவனக்காரர்கள் மகனின் மனத்தில் 'அப்பா வழி நமக்கு உதவாது. வணிகப் பேரரசை உடைப்பதுதான் சரி' என்ற எண்ணத்தை விதைத்து விட்டால் நமக்குப் பிரச்சினை விட்டது என்று யோசிக்கிறார்கள். நமக்குத் தேவையான் எண்ணத்தை அடுத்தவர் மனதில் விதைப்பதுதான் 'இன்செப்ஷன்'. கனவில் புகுந்து குழப்பம் செய்யத் தெரிந்தவர்கள் கையில் அலுமினியப் பெட்டியுடன் அலைந்து கொண்டிருக்கிறார்கள். இதில் உதவக் காத்திருக்கிறார்கள். இந்த விஷயத்தில் நம்ம ஊர் மெகாசீரியல் கதாநாயகிகளின் திறமை இயக்குனருக்குத் தெரிந்திருக்க நியாயமில்லை.

மகன் அப்பாவின் சடலத்தை எடுத்துக் கொண்டு அமெரிக்கா பயணப் படுகிறார். விமானம் அமெரிக்கா சேர்வதற்குள் அவரைத் தூங்கப் பண்ணி கனவை வரவழைத்து, அந்தக் கனவில் நுழைந்து அவர் மூளைக்குள் எண்ணத்தை விதைக்க வேண்டும். அது ஒரு கனவில் முடியாது. கனவுக்குள் கனவு வேண்டும் என்று மூன்று கட்டக் கனவுத் திட்டம் தீட்டி, மூன்றில் முடியாமல் மூன்றரைக்குள்ளும் போகிறார்கள்.

அந்தக் காலத்து விட்டலாச்சார்யா படம் பார்க்க அறிவுத் திறன் தேவையில்லை. இங்கே ஐ.க்யூ (IQ) 160 க்கு கீழே இருந்தால் பிரச்சினை. என் மாதிரி அட்சர குச்சிகளுக்கு மிகவும் சிரமம். நல்ல வேளை எழுத்துப் போட்டு படம் காண்பித்தார்கள். படத்தின் நடுவே தொண்டைக் கமறலாக இருக்கிறது என்று லேசாக ஒருமுறை செருமிக் கொண்டேன். பக்கத்து சீட்டில் துணைவியார் நானும் கனவுக்குள் போய் குறட்டை விடுகிறேன் என்று நினைத்து விட்டார். நீங்களும் எதற்கும் ஒரு முறை கிள்ளிப் பார்த்து விடுங்கள்.

ட்விட்டரில் இந்தப் படத்தைப் பார்த்தவர்கள் எல்லோரும் திரும்பத் திரும்பப் பார்க்கத் தூண்டுகிறது என்று சொல்லியிருந்தார்கள். புரியாததுதான் பிரச்சினை என்று படத்தைப் பார்த்த பிறகுதான் நமக்கே விளங்கியது. பின்னால் சீட்டில் அறிவு ஜீவிகள் சிலர் படத்தை பார்க்கும் போதே ஆராய்ந்து அலசி கோனார் உரை வேறு போட்டுக் கொண்டிருந்தார்கள்.

ரெட்டச்சுழி

2010-05-08T07:14:00.000-07:00

இன்று சத்யம் திரையரங்கில் இந்தப் படம் பார்த்தேன். சனிக் கிழமை மதியம் படம் ஆரம்பிக்கும் போது அரங்கு நிறைந்திருக்கவில்லை. முதலில் வந்திருந்தவர்கள் சராசரி வயதைக் கணக்கிட்டால் சுமார் 40 க்கு மேல் என்று சொல்லலாம். இளசுகள் எல்லோரும் 'சுறா' பார்க்கப் போயிருந்தார்கள் போலும். டிக்கட் கிடைக்காதவர்கள் பின்னால் வந்து சேர்ந்து கொண்டார்கள்.

ஊரில் இரண்டு வயது முதிர்ந்த முக்கியப் பிரமுகர்கள் எதிரும் புதிருமாக வாழ்ந்து கொண்டு ஒருவர் மேல் ஒருவர் அதிமிஞ்சிய 'காண்டு' காட்டுகிறார்கள். இதற்கிடையே நீ பெரியவனா நான் பெரியவனா என்று போட்டியும் போட்டுக் கொள்கிறார்கள். இரண்டு பக்கத்திலும் பேரன் பேத்திகள் பட்டாளம். அவர்களும் இந்தக் 'காண்டு'வை கட்சி கட்டிக் கொண்டு கண்ணாடி போல் பிரதிபலிக்கிறார்கள். இயக்குனர் பாலச்சந்தரும் பாரதிராஜாவும் ஒரு டஜன் வாண்டுகளுடன் இந்தப் படத்தில் நடித்திருக்கிறார்கள். மிதமில்லாமல் அருமையாக நடித்துக் கொடுத்திருக்கிறார்கள். வாண்டுகளிலேயே கால் சட்டையை அடிக்கடி நழுவ விட்டுக் கவர்ச்சி காட்டும் சிறுவனின் நடிப்பு நினைவில் நிற்கிறது.

படத்தில் முதல் பாதி சவ்வாய் இழுக்கிறது.. தேவையில்லாமல் முதல் பாதியில் ஓட்டியிருக்கும் பல காட்சிகளைத் தவிர்த்திருக்கலாம். முதல் தலைமுறைக் காதல் தோல்வி (பெரியவர்களின் பகைக்குக் காரணம்) சொல்லப் பட்டவுடன் சூடு பிடிக்கும் கதை மூன்றாம் தலைமுறைக் காதலைச் சேர்த்து வைக்க வாண்டுகள் சூட்சுமங்கள் செயல் படுத்தும் போது வேகம் பிடிக்கிறது. உச்சக் கட்டமும் மனதைத் தொடும் படி அமைந்து இருந்த்து.

படப்பிடிப்பு (முக்கியமாக வெளிப்புறக் காட்சிகள்) மிகவும் அருமை. சேரன்மாதேவிக்கு ஒரு நடை போய்ப் பார்க்க வேண்டும் என்று தோன்றியது. பாடல்கள் எதுவும் நிற்கவில்லை. எனக்கு இந்த வித்தியாசமான படம் பிடித்திருந்தது.

இரண்டு பெயர் பெற்ற இயக்குனர்களையும் ஒரு டஜன் குழந்தைகளையும் நடிக்க வைப்பது என்பது இமாலயச் சிரமம். இயக்குனரை கண்டிப்பாகப் பாராட்ட வேண்டும்.

பொறாமை உணர்ச்சி

2010-05-03T19:42:00.000-07:00

இந்தத் தலைப்பில் 'நீயா நானா' நிகழ்ச்சியில் வழக்கத்திற்கு மாறாக ஏறக்குறைய குடுமிப் பிடி சண்டை போட்டுக் கொண்டிருந்தார்கள். அதைக் கவனித்த போது எனக்குத் தோன்றிய சில கருத்துகள்.

பொறாமை என்பது தனக்கும் பிறருக்கும் வேண்டாத விளைவுகளை ஏற்படுத்தக் கூடிய ஒரு நெகுதி (negative) உணர்வு. ஆதங்கம், வருத்தம், கவலை முதலிய உணர்வுகளுக்கும் பொறாமைக்கும் இடையே ஒரு மெல்லிய இடைவெளியே உள்ளது.

ஒவ்வொரு ஆணும் பெண்ணும் சமூகத்தில் தன் அந்தஸ்து (status), தன் சுதந்திரம் (autonomy) , நெருங்கிய உறவுகள் (relatedness) , நியாயம் (fairness) , நிச்சயம்/பத்திரமாக (centainty) உணர்வது ஆகியவற்றைப் பெரிதும் மதிக்கிறார். இந்த உணர்வுகளுக்குப் பங்கம் வரும் காரியங்கள் தன்னைச் சுற்றி நடக்கும் போது மூளையில் அபாய மணி ஒலிக்கிறது. தற்காப்பைத் தூண்டும் விதத்தில் மனித மூளையில் இத்தகைய உணர்வுகள் கிளம்புவது இயற்கை. தன்னை மற்றவருடன் ஒப்பிட்டுப் பார்க்கும் போதே இத்தகைய தூண்டுதல்கள் கிளம்பும். தன்னைப் பார்த்துத் தானே பொறாமைப் படுபவர் யாரையும் நாம் பார்ப்பதில்லை.

மனிதன் ஆதி காலத்தில் இருந்து அபாய கட்டங்களில் தன்னைக் காத்துக் கொள்ள இரண்டு சூட்சுமங்களைத்தான் (strategy) உபயோகிக்கிறான். ஒன்று தப்பித்து ஒடுவது. மற்றொன்று எதிர்த்து நின்று சண்டை போடுவது. இரண்டு சூட்சுமங்களையும் செயல் படுத்த வேண்டிய உத்திகள் (tactics) சூழ்நிலைக்கு ஏற்ப மாறுபடும். தனக்கும் அண்ணனைப் போல் உரிமைகள் வேண்டும் என்று வாதம் செய்யும் தங்கை எதிர்த்து நிற்கும் சூட்சுமத்தையும், எனக்கு செல்ஃபோன் பிடிக்காது அதனால் நான் அதை உபயோகிப்பதில்லை என்று போலியாக நியாயப் படுத்தும் ஏழைக் கல்லூரி மாணவன் சூழ்நிலையில் இருந்து தப்பிக்கும் சூட்சுமத்தையும் முறையே உபயோகிக்கிறார்கள்.

பண்படாத மனதுள்ளவர்கள் அபாயத் தூண்டுதல்கள் தன் மூளையில் கிளர்ச்சி கொள்ளும் போது யோசிக்காமல் இயல்பாக வரும் சூட்சுமத்தையும் அதன் உத்திகளையும் கடைப் பிடிக்கிறார்கள். குழந்தைகளின் இயல்பான நடத்தைகள் இதற்குப் பெரிய உதாரணம். இத்தகைய நடத்தைகள் முதிர்ந்தவையாகத் (mature) தெரிவதில்லை. சுற்றியிருப்பவர்களிடம் மேலும் நெகுதியான உணர்ச்சிகளைத் தூண்டும் விதத்தில் அமைந்து விடுகின்றன. சில சமயம் இவை குடுமிப் பிடிச் சண்டையில் கொண்டு போய் விடக் கூடும். பண்பட்டவர்கள் யோசித்துச் சூட்சுமத்தையும் உத்திகளையும் கையாள எத்தனிப்பதால் அவர்கள் செய்கை முதிர்ச்சி உடையதாகத் தெரிகிறது. அவர்களைச் சுற்றி இருப்பவர்களும் பத்திரமாக உணர்கிறார்கள்.

'என்ட்ரெப்ரெனர்' (Entrepreneur) என்பவர் யார்?

2010-05-02T08:43:00.000-07:00

முதலாளி என்பவர் முதல் அளிப்பவர். தொழிலாளி என்பவர் தொழில் செய்பவர். 'என்ட்ரெப்ரெனர்' (Entrepreneur) என்பவர் யார்?

'என்ட்ரெப்ரெனர்' என்பவர் தன்னையும், தன் நேரத்தையும், யோசனைகளையும், உழைப்பையும் தன் வசம் வைத்திருப்பவர். சமூகத்திற்குப் பயனுள்ள வேலைகள் செய்து பொருளாதார வளர்ச்சிக்கு ஆதாரமாக இருப்பவர். புதிய பாதைகளைக் கண்டுபிடிப்பவர். தொழிலுக்குச் சம்பளம் என்று யோசிக்காதவர். லாபத்தைப் பெருக்கி அதைப் புதிய வழிகளில் எப்படிச் செலவு செய்யலாம் என்று யோசிப்பவர்.

வாழ்க்கையின் தேவைகளால் தளர்ந்து போகாதவரும், வாய்ப்புகளைப் பெருக்கிக் கொள்ளும் வேகம் உள்ளவரும் 'என்ட்ரெப்ரெனர்' ஆகும் வாய்ப்புகள் அதிகம். 1980 களிலும் 90 களிலும் பிறந்தவர்கள் இப்படிப் பிரகாசிக்க வேண்டிய கட்டாயத்தில் இன்று இருக்கிறார்கள்.

இந்த ஆங்கில வார்த்தைக்குத் தமிழ்ப் பதம் இருக்கிறதா? அப்படி இல்லையென்றால் இதைப் பற்றித் தமிழர்கள் பழங்காலத்தில் யோசிக்கவே இல்லையா?

அமெரிக்கப் பொருளாதாரம் வளருகிறது !!

2010-04-06T08:02:00.000-07:00

இந்த ஆண்டில் அது சுமார் 2.5 சதவிகிதம் வளரும் என்று கணித்திருக்கிறார்கள். பாதாளச் சரிவிலிருந்து திரும்பியிருப்பது வரவேற்கக் கூடியது. அதே நேரம் யோசிக்கக் கூடிய பல விஷயங்கள் உள்ளன.

அமெரிக்கர்கள் எதிர்கால வருவாயைக் கருத்தில் கொண்டு இன்றே கடன் வாங்கிச் செலவு செய்பவர்கள். அவர்களுக்கு சேமிப்பு எண்ணம் இது வரை இருந்ததில்லை. ஆனால் பேராசையால் தெரிந்தே வராக்கடன் கொடுத்து ஏமாந்த வங்கிகள் இன்று பலமாகத் தும்மினாலே கடன் அட்டையும் வீட்டுக் கடனும் வழங்கும் நிலையில் இல்லை. சக்திக்கு மீறிய கடன் வாங்கி, அதுவும் மூழ்கிப் போய், இருந்த சொத்தையெல்லாம் தொலைத்த பல அமெரிக்கர்கள் இன்று கிடைப்பதை சேமிக்கும் மன நிலைக்குத் தள்ளப் பட்டிருக்கிறார்கள்.

ஆகவே அமெரிக்காவில் சேமிப்பு வளர்ந்து தனிநபர் செலவு குறையும் என்று எதிர்பார்க்கலாம். தனிநபர் செலவு குறையும் போது உற்பத்தியை உயர்த்தினால் உற்பத்தி செய்யப் படும் பொருட்களை உள்ளூரில் வாங்க ஆள் இருக்காது.

அமெரிக்கா இறக்குமதிகளைக் குறைத்துக் கொண்டு ஏற்றுமதியை அதிகப் படுத்தப் போகிறதா? திடீரென்று எதை ஏற்றுமதி செய்யப் போகிறார்கள்.பொறுத்திருந்து பார்க்க வேண்டும்.

அங்காடித் தெரு

2010-03-27T20:01:00.000-07:00

சென்னை ரங்கநாதன் தெருவில் இருக்கும் ஒரு மலிவு விலை பல் பொருள் அங்காடி பணியாளர்களின் கொத்தடிமை வாழ்க்கையில் முளைக்கும் 'டீன் ஏஜ்' காதலைச் சொல்கிறது. அந்த வயதில் காதல் உணர்ச்சிக்கும் பொறுப்புணர்ச்சிக்கும் இடையே ஏற்படும் போராட்டத்தை இயல்பாகச் சொல்கிறது. 'ஜிங்-பேங்' இல்லாத மலிவு பட்ஜெட் படம். நடிப்பும் இ...யக்கமும் பார்க்கும் படி இருந்தது. சில கோரக் காட்சிகளின் உக்கிரம் குறைக்கப் பட்டிருந்தால் இன்னமும் தூக்கலாக இருந்திருக்கும். திரை அரங்கில் இரண்டாம் நாள் காட்சிக்குக் கூட்டமில்லை. 'அவள் அப்படி ஒன்றும் அழகில்லை' பாட்டு பிடித்திருந்தது.

மாசிலாமணி (திரைப்படம் பார்த்த அனுபவம்)

2009-06-28T08:26:00.000-07:00

இட்லிக்கும் பொங்கலுக்கும் என்ன வித்தியாசம் என்று இந்தப் படத்தைப் பார்த்தால் புரிந்து கொள்ளலாம் ஐயா! பாட்டுகள் பரவாயில்லை. 'சிக்கு சிக்கு பூம் பூம்', 'ஓ திவ்யா', 'டோரா டோரா' நமக்குப் பிடித்திருந்தன. மற்ற படி இரண்டரை மணி நேர ரம்பம்.

கதாபாத்திரங்களை அறிமுகப் படுத்தவே 45 நிமிடம் எடுத்துக் கொண்டிருக்கிறார் இயக்குனர். கதை என்று ஒன்று இந்தப் படத்தில் இருக்கப் போகிறதா என்று கவலைப் பட ஆரம்பித்து விடுகிறோம் நாம். கடைசி கதாபாத்திரமாக இன்ஸ்பெக்டர் இடைவேளைப் பக்கம்தான் படத்தில் வருகிறார் என்றால் பார்த்துக் கொள்ளுங்கள்..

கதாநாயகனுடன் வரும் இரண்டு நண்பர்கள் அடிக்கும் லூட்டி இருக்கும் போது எம் எஸ் பாஸ்கர், கருணா டிராக் எதற்கு என்று இன்னமும் புரியாமல் கிடக்கிறோம்.

கதாநாயகி ஒவ்வோரு கோணத்தில் அசினை நினைவூட்டுகிறார். நடனமாடும் போது சில சமயம் அசின் மாதிரி ஆடுகிறார் என்று எனக்குத் தோன்றியது..

படத்தில் எழுத்துப் போட்டவுடன் முதல் ஆளாக வெளியே ஓடி வந்து விட்டேன் (குடும்பத்துடன் போனதால் நடுவே ஓட இயலவில்லை). மற்றபடி சொல்லிக் கொள்ளும் படியாக் எதுவும் இல்லை. கொஞ்ச நாளில் சன் ம்யூஸிக் சானலில் பாட்டுகளையும் காமெடி காட்சிகளையும் பார்த்து விடலாம். மற்றதற்கெல்லாம் காசு கொடுத்துப் பார்ப்பது தேவையற்ற விஷயம்.

கல்பாத்தி சகோதரர்கள் முதலில் கணினிப் பயிற்சி கொடுத்தார்கள். பிறகு ரியல் எஸ்டேட் பிஸினஸ் செய்தார்கள். இப்போது திரைப்படம் தயாரிக்க இறங்கியிருக்கிறார்கள்.

பெய்யெனப் பெய்யும் மழை....

2009-06-28T07:50:00.000-07:00

போன வாரமெல்லாம் இந்தியாவில் மழை தவறிப் போய் விட்டது. இப்படியே விட்டால் பஞ்சம், பட்டினி, விலைவாசி உயர்வு என்று நாடே கெட்டுப் போய் விடும் என்று கட்டியம் கூறி பயமுறுத்திக் கொண்டிருந்தார்கள். நேரங் கெட்ட நேரத்தில் புயல் அடித்து பருவ மழையையே கெடுத்துக் குட்டிச் சுவராக்கி விட்டது என்று அந்தப் புயலைக் கரித்துக் கொட்டிக் கொண்டிருந்தார்கள். சிலர் ஒரு படி மேலே போய் எங்கோ இருக்கும் 'எல் நீனோ' தான் இதற்கும் காரணம் என்றார்கள்

பருவமழை இரண்டு நாட்களாக முன்னேற ஆரம்பித்த உடன் பிரியாணி சாப்பிட்டு பீடா போட்டு விட்டு எல்லாரும் தூங்கப் போய் விட்டார்கள். வருடங்களும் ஒடிக் கொண்டுதான் இருக்கின்றன. பருவமழையும் அவ்வப் போது கண்ணாமூச்சி காட்டிக் கொண்டுதான் இருக்கிறது.

நம் நாட்டில் ஒருவன், தான் கல்லில் இடறிக் கொண்டு 'கல் தடுக்கி விட்டது' என்று சிறு வயதிலேயே சொல்லப் பழகுகிறான். முள்ளின் மேல் தான் காலை வைத்து விட்டு 'முள் குத்தி விட்டது' என்று குற்றம் சொல்கிறான். இப்படியே ஏதாவது இசகு பிசகாக நடக்கும் போது வெளி உலகின் மேல் பழியைப் போட்டு விட்டு நிம்மதியாக அடுத்த வேலையைப் பார்க்கும் மனப்பான்மை அல்லது கலாச்சாரம் வளர்ந்து கிடக்கிறது. கையாலாகாத்தனத்திலால் வளர்ந்த கலாச்சாரம் இது.

பருவ மழை ஏன் இப்படி பருவத்தில் பொய்க்கிறது. இயற்கையைக் குலைக்க நாம் செய்யும் நாச காரியங்கள் என்ன என்று யோசித்துத் திருத்திக் கொள்ளலாம். அல்லது மழை அதிகம் கிடைக்கும் போது கிடைக்கும் தண்ணீரைப் பாதுகாப்பது. உபரியாகக் கிடைக்கும் இடங்களில் இருந்து இல்லாத இடங்களுக்குக் கொண்டு செல்ல வழி வகுப்பது என்று காரியம் செய்யலாம். இதையெல்லாம் செய்ய வேண்டிய அரசு அதிகாரிகள் அரசியல்வாதிகளுக்குச் சலாம் போட்டுக் கொண்டிருக்கும் வரை நாம் கையாலாகத்தனத்தில் மேலும் கையைப் பிசைந்து கொண்டிருக்கலாம். அல்லது கிடைக்கும் முதல் வாய்ப்பில் பெட்டியைக் கட்டி நம் பிள்ளைகளை வெளி நாட்டில் குடியேற்றி விடலாம்.

என்னது?.... சின்ன வயசிலேயே குழந்தைக்கு சரியாக யோசிக்கக் கற்றுக் கொடுக்கலாமா? அப்படிச் செய்தாலாவது அடுத்த தலைமுறை இந்தியாவைப் பார்த்துக் கொள்ளுமா? வாரும் ! அப்படிச் செய்த நாடுகள் எல்லாம் உருப்பட்டு விட்டனவா என்று கொஞ்ச நேரம் பொழுது போக்காய் தர்க்கம் பண்ணி விட்டு நடக்கிற காரியத்தைப் பார்க்கப் போவோம்.

பட்டாளம் - திரைப்பட அனுபவம்

2009-04-11T23:44:00.000-07:00

நம்ம அபிமான நடிகை 'நத்தூஸ்' நடித்த படம் என்பதாலும், என் பெண் பரிந்துரைத்ததாலும் நேற்று சத்யம் 'சிக்ஸ் டிகிரீஸ்' திரையரங்கில் 'பட்டாளம்' பார்த்தோம். என் பெண் 'அப்பா! எங்களுக்கெல்லாம் செம ஜோக்காக இருக்கும்! உங்களுக்கு எப்படிப் பிடிக்கும் என்று எனக்குத் தெரியாது' என்று முன் ஜாக்கிரதை செய்து கொண்டார்.

நதியா கிருத்துவ நிறுவனம் நடத்தும் பள்ளியின் 'கரெஸ்பாண்டெண்டாக' வருகிறார். தன் பள்ளியில் ப்ளஸ் 2 படிக்கும் எட்டு இளவட்டங்கள் கூத்தடிக்கும் போதெல்லாம் அவர்களைப் புரிந்து கொள்ள முயற்சிக்க வேண்டும், தண்டிக்கக் கூடாதென்று சுற்றியிருப்பவர்களுக்கு அறிவுறுத்துகிறார். அவர்களை அடித்துத் திருத்த முயற்சிக்கும் ஒரு ஆசிரியரை கண்டிப்புடன் பணி நீக்கம் செய்கிறார்.

திடீரென்று பார்த்தால் 'நத்தூஸ்' அதே நிறுவனம் நடத்தும் ஒரு மன நோய் காப்பகத்தில் 'ஸ்டெதாஸ்கோப்'புடன் திரிகிறார். அங்கிருக்கும் மருத்துவர்களுடன் நோயாளிகளுக்கு மருந்து கொடுப்பது எப்படி என்று விவாதிக்கிறார்!!

நடுவில் ஒரு கன்னிகாஸ்த்ரி ப்ளஸ் 2 படிக்கும் அநாதை மாணவி ஒருவரை நதியாவிடம் ஒப்படைக்க, அவர் நம் எட்டு இளவட்டங்கள் படிக்கும் அதே வகுப்பில் இளம் மாணவியைப் புகுத்துகிறார். படத்தில் காதல், பொறாமை, கொலை வெறி, எல்லாம் உள்ளே வருகிறது. அது வரை படத்தில் வரும் 'ஜோக்குகளை' என் பெண் ரசித்துச் சிரிப்பதை நான் ரசித்துக் கொண்டிருந்தேன்.

நம் எட்டு பேர் குழு தலா நான்கு பேருள்ள இரண்டு குழுக்களாக தம்மை பிரித்துக் கொண்டு ஆரம்பத்திலிருந்தே அடித்துக் கொள்பவர்கள். மற்ற பள்ளிகளுடன் நடக்கும் விளையாட்டுப் போட்டிகளின் போது இந்த அடிதடி முற்றிப் போய் பள்ளியின் மானம் கப்பலேறும் நிலை வருகிறது. நதியா பொறுமையை சற்றே இழந்து நம் கதாநாயகர்களைத் திட்டி விட்டுப் போகிறார். அவர்களுக்கு ரோஷம் வந்து விடுகிறது. ஒன்று சேர்ந்து விளையாட்டுப் போட்டியில் முதலிடத்தில் வந்து பள்ளியின் பெருமையைக் காப்பாற்றுகிறார்கள். இந்த இடம் உணர்ச்சிபூர்வமாக படமாக்கப் பட்டிருக்கிறது. நிற்க!

காதலும் அதனால் வரும் பொறாமையும் சூடு பிடிக்கிறது. எட்டுப் பேரில் ஒருவன் இன்னொருவனைப் பழி வாங்கும் நிலைக்குப் போகிறது. ஆனால் இடையில் ஒரு பாவமும் செய்யாத மூன்றாமவன் ஆண்டு நிறைவு விழாவின் போது நிறைவேற்றப் பட்ட சதித் திட்டத்தில் நண்பனை காப்பாற்றப் போய் இறந்து போகிறான். காதலித்தவனுக்கு காதலி எழுதி வைத்த கடிதம் மூலம் உண்மை உரைக்கிறது. பிறகு என்ன நடக்கிறது என்று திரையில் காண்க.

இயக்குனருக்கு கதை சொல்வதில் இருந்த சிக்கலைப் பற்றி படத்தின் நடுவே நாம் யோசிக்கிறோம். கிளைக் கதைகள் கதையோடு பொருந்த சற்றே சிரமப் படுகின்றன. கடைசிப் பாடலைத் தவிர மற்ற பாடல்கள் அவ்வளவாக கருத்தைக் கவரவில்லை. பாராட்ட வேண்டிய சமாச்சாரம் என்னவென்றால், 'டூயட்' பாடலைக் கூட பொறுப்புடன் விரசம் தட்டாமல் எடுத்திருக்கிறார்கள். பள்ளியின் நூறு வயதான மணிக்குக் கீழே அமைக்கப் பட்ட மேடையில் நடக்கும் மாணவர்களின் இசைக் கச்சேரி விறுவிறுப்பாகப் படமாக்கப் பட்டிருக்கிறது. எப்போதும் போல நதியா மிதமில்லாமல் சிறப்பாகச் செய்திருக்கிறார். அவர் நடிக்க வேண்டுமென்றால் சைக்கிள் ஒட்டிக்கொண்டே பாடும் காட்சி ஒன்றாவது வேண்டும் என்று ஒப்பந்தத்தில் எழுதி விடுவார் போலும்!

வீட்டில் குழந்தைகள் இருந்தால் அவர்கள் 'ஜோக்' பார்க்கும் மகிழ்ச்சிக்காகப் படம் பார்க்கலாம். ரொம்ப நாள் ஓடாது.

சத்யம் தியேட்டரில் இனிமேல் பாப்கார்ன் வாங்குவதில்லை என்று வைத்திருக்கிறேன். 'சவக் சவக்' என்று தரமிழந்து போய் கிடக்கிறது. அதை விற்று காசாக்கிக் கொண்டிருக்கிறார்கள்

பங்குச் சந்தையில் பணம் பண்ணுவதா! போங்கப்பா!!

2009-03-29T07:44:00.000-07:00

பங்குச் சந்தையில் சரியான சமயத்தில் பங்குகளை வாங்கி விற்கத் தெரிந்தவனுக்குத்தான் அதெல்லாம் முடியும். "ஓடு மீன் ஓட உறுமீன் வருமளவும் வாடி"யிருந்து கோட்டை விட்ட கதைகள் ஏராளம். பேராசையும் (Greed) திகிலும் (Fear) ஆட்டிப் படைக்கும் சந்தைக் களம் அது.

இது போன்ற (சராசரி?!) நினைப்புகளை உடைக்கும் வகையில் சமீபத்தில் ஒரு புத்தகம் படித்தேன். அது "மதிப்பு சராசரியாக்கும் முறை" (Value Averaging) என்ற புத்தகம். சல்லிசாக ரூ150 விலையில் ஹிக்கின்பாதம்ஸில் கண்ணில் பட்டது. மைக்கல் ஈ எட்லேசன் (Michel E Edleson) என்பவர் எழுதியிருக்கிறார். ISBN 81-7094-228-4. அவர் இந்தப் புத்தகத்தை அமெரிக்க பங்குச் சந்தையை மையமாக வைத்து எழுதியிருக்கிறார். மேலும் இவர் கூறும் முறையில் பங்குகளில் நேரடியாக வர்த்தகம் (Stock Trading) செய்யாமல் பரஸ்பர நிதிகளை (Mutual Fund) உபயோகிப்பதை அறிவுறுத்துகிறார்.

பங்குச் சந்தையில் காலையில் வாங்கி மாலையில் விற்கும் (ஏறக்குறைய சூதாட்டத்திற்கு ஈடான) தினப்படி வர்த்தக (Daily Trading) முறை கேள்விப் பட்டிருக்கிறோம். நிறுவனங்களின் செயல்பாட்டை ஆராய்ந்து அறிந்து நீண்ட கால முதலீடு செய்யும் அடிப்படை முதலீட்டு (Fundamental Investing) வகை கேள்விப்பட்டிருக்கிறோம். நண்பரோ அல்லது நட்பான தரகரோ துப்புக் கொடுக்க அதை வைத்து பங்கை வாங்கிப் போடுபவர்களைப் பார்த்திருக்கிறோம்.

நம் ஆசிரியர் இதெல்லாம் எதுவுமே தேவையில்லை (!?!) என்கிறார். திட்டமிட்ட முதலீட்டு (Systemmatic Investment) முறைகள் இரண்டை அறிமுகப் படுத்தும் இவர் கொள்கை விதிப் படி முதலீடு (ஃபார்முலா இன்வெஸ்டிங்) செய்ய, முறையே இரண்டு கொள்கை விதிகளை அறிமுகப் படுத்துகிறார்.

அந்த விதிகளில் ஒன்று பங்கு விலையைச் சராசரியாக்கும் (Cost Averaging) விதி. மற்றொன்று பங்கு மதிப்பைச் சராசரியாக்கும் (Value Averaging) விதி.

சுமார் 20 வருடங்களில் பங்குச் சந்தையின் செயல்பாட்டை ஆராய்ந்து அதன் மூலம் தனது விதிகளை ஆதாரத்துடன் நிலை நிறுத்தியிருக்கிறார். விதியை விதியால் (formula) வெல்லும் வழி சொல்லிக் கொடுத்திருக்கிறார்!

எளிமையாக எழுதப் பட்டிருக்கும் ஆர்வத்தைத் தூண்டும் புத்தகம் இது. விதியைப் புரிந்து கொண்டு தற்போது செயல் படுத்திக் கொண்டிருப்பதாலும், விதியை விவரிக்க ஒரு இடுகை போதாது என்ற காரணத்தாலும் அந்த விதியை பின் வரும் ஒரு இடுகையில் (அது இந்தியப் பங்குச் சந்தையிலும் வேலை செய்கிறது என்று எனக்குத் தோன்றினால்) காண்போம்.

பொருளாதார நிலை பற்றி அருமையான விளக்கம்!

2009-03-22T08:01:00.000-07:00

வீட்டுக் கடன்கள் மூழ்கியதால் பொருளாதாரம் எப்படிச் சீர்கெட்டது என்று படிப் படியாகத் தெளிவாக விளக்கும் சித்திரம் கீழே.

The Crisis of Credit Visualized from Jonathan Jarvis on Vimeo.

உலகம் உருண்டை (The World is Curved) புத்தக ஆய்வு

2009-03-06T20:17:00.000-08:00

டேவிட் ஸ்மிக் என்ற புகழ் மிக்க பொருளாதார வல்லுனர் 'உலகம் உருண்டை' புத்தகத்தை எழுதியிருக்கிறார். இந்த ஆங்கிலப் புத்தகம் தாமஸ் ஃப்ரீட்மன் எழுதிய 'உலகம் தட்டை' (The World is Flat) என்ற புத்தகத்தைத் தொடர்ந்து எழுதப் பட்டிருக்கிறது. அதைத் தழுவி அல்ல. 'உலகம் தட்டை' உலகமயமாக்கல் பற்றியும் இணையத் தொழில் நுட்பம் தூரம் மற்றும் கலாச்சார வித்தியாசங்கள் ஏற்படுத்தும் தளைகளை உடைத்தெறிந்து செய்திருக்கும் அதிசயம் பற்றி பேசியது.

டேவிட் ஸ்மிக் தன் புத்தகத்தில் உலகத்தில் நிதி (பணம்) ஆதாரங்கள் இணையத்தால் இணைக்கப் பட்டு ஒரு மாபெரும் கடலைப் போல் இன்று மாறியிருப்பதை எடுத்துக் காட்டுகிறார். இந்த ஆபத்தான மாக்கடலில்தான் இன்றைய அரசாங்கங்கள் தங்கள் பொருளாதாரங்களை வழி நடத்துகின்றன.

நிதி ஓடைகள் எங்கிருந்து எங்கு பாய்கின்றன, எதனால் அப்படிப் பாய்கின்றன, எப்போது அவற்றின் திசைகள் திரும்புகின்றன என்று தெளிவாகப் புரிந்து கொள்ள உதவும் அமைப்புகள் இந்த நிதி மாக்கடலில் இன்னமும் ஏற்படுத்தப் படவில்லை.

இந்த சிக்கல்களால் பெரும்பாலான நேரம் குருட்டுத்தனமாகவே பல அரசுகள் கொள்கை அமைத்துச் செயல் படுகின்றன. அதே போல ஒவ்வொரு நாட்டுக்கும் அவர்களின் மக்கட் தொகை விகிதங்களைப் பொறுத்து பொருளாதார வளர்ச்சித் தேவை அமைகிறது. உதாரணமாக சீனா தன் இளைஞர்கள் அனைவருக்கும் வேலை கொடுத்துக் கொண்டே இருக்க வேண்டுமென்றால் வருடத்திற்கு 10 சதவிகிதம் என்ற அளவில் அவர்கள் பொருளாதாரத்தை இன்னமும் பல வருடங்களுக்கு அவர்கள் வளர்க்க வேண்டிய நிர்ப்பந்தம் இருக்கிறது. அதே நேரத்தில் ஐரோப்பியர்கள் தங்கள் பொருளாதாரத்திற்கு துரித கதியில் வளர்ச்சி தேவையில்லை என்று முடிவு செய்து விட்டார்கள் போலத் தெரிகிறது.

மேற்கூறிய காரணங்கள் ஏற்படுத்தும் வெளிச்சமின்மையால் இன்றைய நிதிச் சந்தைகள் காற்றுப் போன போக்கில் அலைக்கழிக்கப் படுகின்றன என்று உண்மையைச் சொல்லி பயமுறுத்தியிருக்கிறார் ஆசிரியர். மாலுமியால் சரியான பாதையில் வழிநடத்தப் படாத கப்பல்கள் சூழலில் சிக்கி அழிந்து போவது போன்ற ஆபத்துகள் நிதிக் கடலில் பயணிக்கும் அரசாங்கங்ளைப் பற்றியுள்ளதை இவர் தெளிவு படுத்துகிறார்.

பொருளாதாரத்தில் ஈடுபாடும், யானைப் பொறுமையும் இருந்தால் மட்டுமே இந்தப் புத்தகத்தைப் படிக்க முடியும். பல கலைச் சொற்களையும் பொருளாதாரக் கோட்பாடுகளையும் அள்ளித் தெளித்து எழுதப் பட்டிருக்கும் புத்தகம் இது. உதாரணமாக அரசாங்கம் அல்லது மத்திய வங்கிகள் வட்டித்தொகையை மாற்றுவதால் ஏற்படும் பொருளாதார விளைவுகள் படிப்பவருக்குப் புரியும் என்ற நிலைப்பாட்டுடன் கருத்துகளை அல்லது முடிவுகளை அள்ளி வீசியிருக்கிறார் ஆசிரியர். என்னைப் போன்ற பாமரனுக்குப் புரிவது கடினமாகத்தான் இருந்தது. அதே சமயத்தில் பொறுமைக்கும், முயற்சிக்கும் பரிசு கண்டிப்பாகக் கிடைக்கிறது.

உலக நிதி மாக்கடலில் உள்ள ஆபத்துகள் மற்றும் சூழல்கள் சிலவற்றை நான் இந்தப் புத்தகம் மூலம் புரிந்து கொண்டேன். உதாரணத்திற்குச் சுவாரசியமான சில கீழே:

இன்றைய 'சப் ப்ரைம்' பிரச்சினை கடலில் மூழ்கியிருக்கும் ஒரு மாபெரும் பனி மலையின் கண்ணுக்குத் தெரியும் உச்சியைப் போன்றது
முதலீட்டாளர்களில் 'பிரம்ம குரு' என்று உலகால் புகழ்ந்து போற்றப் படும் 'வாரன் பஃப்பெட்' நம் ஆசிரியர் கண்ணோட்டத்தில் தேவையில்லாமல் பீதியைக் கிளப்பி விடும் ஆசாமி (!?!)
அமெரிக்காவிற்கு 2 ட்ரில்லியன் டாலர் அளவிற்கு வெளிக் கடன் இருந்த போதிலும் அவர்களின் 57 ட்ரில்லியன் டாலர் பொருளாதாரத்தை ஒப்பிட்டால் இது கொசு. ஆகவே வெளிக் கடனால் அமெரிக்கா மூழ்கிப் போகப் போவதில்லை
அமெரிக்க டாலர் இன்னமும் உலகின் சேமிப்பு நாணயமாக இருக்கிறது. அதனாலேயே டாலரின் தேவை எப்போதும் இருப்பதாலும், சீனா போன்ற நாடுகள் தங்கள் சேமிப்பின் மதிப்பை சடுதியில் இழக்க அனுமதிக்க மாட்டார்கள் என்பதாலும் டாலர் அவ்வளவு சீக்கிரமாகச் சரியாது
அமெரிக்கா எண்ணை உற்பத்தி நாடுகளுடன் கூட்டுச் சேர்ந்து அவர்கள் எண்ணை வாணிபத்தை டாலரில் நடத்த வேண்டும் என்று என்றோ போட்டுக் கொண்ட ஒப்பந்தம் இன்றும் உலக நாடுகள் (குறிப்பாக வளரும் நாடுகள்) எண்ணை வாங்க டாலருக்கு அலையும் நிலையை உருவாக்கி இருப்பதால் டாலருக்கு எப்போதும் தேவை அதிகமாகவே இருக்கிறது. தேவையின் அளவும் ஒரு நாணயத்தின் மேல் மக்கள் வைக்கும் நம்பிக்கையுமே நாணயத்தின் மதிப்பை நிர்ணயிக்கிறது. இரண்டாம் விஷயம் (நம்பிக்கை) குறைந்து கொண்டே வந்தாலும், அமெரிக்கர்க சூத்திரதாரிகள் தந்திரமாக டாலர் நாணயத் தேவையை அதிகரிக்கும் சூட்சுமங்களைச் ஏற்கெனவே செய்து வைத்திருக்கிறார்கள்.
ஈரான் போன்ற நாடுகள் எண்ணை வியாபாரம் செய்ய டாலர் கேட்கும் போக்கிலிருந்து மாற ஆரம்பித்து விட்டார்கள். இந்தப் போக்கு அமெரிக்காவிற்கு கவலைக்கிடம்
உலகின் ஒரே உற்பத்திக் கூடமாகப் போவதாகக் கனவுடன் இன்று சரக்குகளை வாங்கிக் குவித்துக் கொண்டிருக்கும் சீனா தன் குமிழி உடைந்தால் இருப்பில் உள்ள சரக்குச் சேமிப்பை 'கிடைத்ததை அள்ளு' என்று காசாக்க முயற்சிக்கும் போது பல பொருளாதாரங்கள் உடைய வாய்ப்பிருக்கிறது
சீனாவில் இளைஞர்கள் இருக்கும் அளவிற்கு ஏகக் குறைந்த எண்ணிக்கையில் இளைஞிகள் உள்ளனர். அதே போல் இளைஞர்கள் அனைவருக்கும் கொடுக்க சீனாவில் வேலை இல்லை. வயசுப் பையன்கள் பெண்ணுக்கு அடித்துக் கொள்ளாமல் இருக்கவும் அவர்கள் வேலையில்லாத பிரச்சினையால் கலவரத்தில் இறங்காமல் இருக்கவுமே சீனா ஒரு மாபெரும் ராணுவத்தை நடத்தி வருகிறது. இந்த ராணுவம், அவர்களின் வளமான சில மாநகரங்களுக்கும் வளமில்லாத ஏகப்பட்ட கிராமப் புறங்களுக்கும் இடையே பெரும் செயற்கை அரணாகச் செயல் படுத்தப் படுகிறது.
கொடுத்த கடன் வராக் கடனாகப் போனால் இருக்கும் மொத்தக் கடன்களில் வராக் கடன் விகிதத்தைக் உடனே குறைக்க வேண்டுமல்லவா? இதற்கு என்ன வழி? இன்னமும் கொஞ்சம் கடனை உடனைக் கொடுத்து மொத்தக் கடன்களின் அளவை அதிகரித்து விட்டால் வராக் கடன் விகிதம் குறைந்து விடப் போகிறது! சிம்பிள்! இது சீனாவின் 'தனி' வழி!!
ஜப்பானிய அரசு சில வருடங்களுக்கு முன் வைப்புகளுக்கான வட்டியை 0 சதவிகிதமாகக் குறைத்தது. அப்போது ஜப்பானிய இல்லத்தரசிகள் அரிசிப் பானைக்குள் பணம் வைப்பதும், ஜப்பானிய வங்கியில் பணம் வைப்பது ஒன்றுதான் என்று புரிந்து போய் நேரடியாக வெளிநாடுகளில் இணையம் மூலம் முதலீடு செய்யத் தொடங்கி விட்டனர். அவர்கள் இன்று கட்டுப் படுத்தும் உலக நிதியின் அளவு சுமார் 11 ட்ரில்லியன் டாலர். தினசரி ஜப்பானிய நிதிச் சந்தைகள் திறந்திருக்கும் நேரத்தில் உலக நிதிப் பரிவர்த்தனைகளில் 20 விழுக்காடு ஜப்பானிய வீடுகளிலிருந்து தொடங்குகின்றன. இவற்றில் பெரும்பாலோர் இல்லத்தரசிகள். மீன் பொரியல் செய்து கொண்டே ஜப்பானியப் பெண்மணி சந்தைகளைக் கட்டுப் படுத்துகிறாள். முக்கால் வாசி நேரம் லட்சக் கணக்கில் தனி நபர் முடிவுகள் மிகுந்த இந்த செயலமைப்பை எந்த ஒரு மத்திய வங்கியோ அல்லது அரசாங்க அமைப்போ இன்று கட்டுப் படுத்த இயலாது. இவர்கள் கட்டுப் படுத்தும் நிதி அளவோ சக்தி மிகுந்தது. இவர்களில் யார் எப்போது எந்தப் பக்கம் பாய்வார்கள் என்று எந்தக் கொம்பனாலும் கட்டியம் சொல்ல இயலாது

ஆர்வம் மிகுந்தவர்கள் மற்றவை புத்தகத்தில் காண்க.

தி ப்ரெஸிடெண்ட் இஸ் கமிங் (2009)

2009-02-08T07:41:00.001-08:00

இது ஒரு பாலிவுட் படம். ஜனவரியில் வெளியாகியிருக்கும் இந்தப் படத்தை டாடா ஸ்கை 'ஷோ கேஸ்' இல் பார்க்கலாம். குனால் ராய் கபூர் என்பவர் இயக்கியிருக்கிறார்.

கதை இதுதான். அமெரிக்க (முன்னாள்) அதிபர் ஜார்ஜ் புஷ் இந்தியா வருகிறார். அவர் ஒரு துடிப்பான இந்திய இளைஞரிடம் கைகுலுக்கிப் பேச வேண்டும். அதற்காக அமெரிக்கத் தூதரகத்தில் ஒரு விளம்பர நிறுவனத்தைப் பணிக்கிறார்கள். அந்த நிறுவனம் நாடு முழுவதும் சலித்து ஆறு இளைஞர்களைத் (நான்கு இளைஞர் மற்றும் இரண்டு இளைஞிகள்) தேர்வு செய்து தூதரகத்திற்குக் கொண்டு வருகிறார்கள். இளைஞர்கள் சிறு வயதிலேயே சாதித்தவர்கள். பங்குச் சந்தையில் கோடீஸ்வரர் ஒருவர், அழகு சாதனப் பொருள்கள் விற்கும் நிறுவனத் தலைவி, கம்ப்யூட்டர் துறையில் விற்பன்னன் என்று சாதனைப் பட்டியல் நீள்கிறது.

நாளை அதிபருடன் சந்திப்பு என்ற நிலையில் இந்த ஆறு பேரில் ஒருவரைத் தேர்ந்தெடுக்க தூதரகத்திலேயே போட்டி நடத்துகிறார்கள் விளம்பர நிறுவனத்தைச் சேர்ந்த இரு பெண்கள். அவர்களிள் ஒருவருக்கு மட்டும் அதிபருடன் காலை உணவு உண்ண அழைப்பு கிடைத்திருக்கிறது. மற்றவருக்கு அது ஏகப் பொறாமையை கிளப்புகிறது. அத்துடன் அந்த மற்றவர் அகப்பட்டதைச் சுருட்டும் 'க்ளெப்டோமேனியாக்' பழக்கமுள்ளவர்.

விளம்பர நிறுவனப் பெண்கள் இரவோடிரவாக பல சுற்று திறமைப் போட்டி நடத்துகிறார்கள். லஞ்சம் கொடுத்து போட்டியில் தன்னை முன் நிறுத்திக் கொள்வது, பாலியல் குற்றம் சாட்டிப் போட்டியாளனை நீக்குவது, அறியாமையைப் பயன்படுத்தி இக்கட்டில் மாட்டி விடுவது என்று இந்திய இளைஞர்கள் இப்படித்தான் என்று வகை தொகை இல்லாமல் எப்படி வேண்டுமானாலும் போட்டியிடுகிறார்கள். வெற்றி ஒன்றே இலக்கு, அதை எப்படி வேண்டுமானாலும் அடையலாம் என்று முயற்சிக்கிறார்கள். தன்னலமும், போட்டியும், பொறாமையும் அவர்களை எப்படியெல்லாம் செலுத்துகின்றன என்பதைக் காட்டுகிறார்கள். திடீர் திருப்பமாக, வந்திருக்கும் ஒரு போட்டியாளர் தீவிரவாதி என்கிறார்கள். கடைசியில் யார் அதிபருடன் கை குலுக்குகிறார் என்பது உச்சக் காட்சி.

சுமார் 90 நிமிடம் படம் ஓடுகிறது. ஹிந்திப் படமா ஆங்கிலப் படமா என்று கூற முடியாமல் ஒரே மணிப்பிரவாளம். ஹிந்தி வசனங்களுக்கு திரையில் கீழே ஆங்கில எழுத்துப் போட்டதால் இதை ஆங்கிலப் படம் என்று வகைப் படுத்த வேண்டும். குறைந்த பட்சம் ஆறு வகைப் இந்தியப் பாணியில் ஆங்கிலம் பேசுகிறார்கள் இளைஞர்கள்.

நகைச்சுவை என்று எடுத்திருகிறார்கள். ஆனால் படம் முழுக்க அவல உணர்ச்சிதான் மேலோங்கியது. அடுத்து என்ன வரப் போகிறது என்ற குறுகுறுப்பை வளர்த்தாலும், காட்சிக்குக் காட்சி அவலம் அதிகரிப்பதால் படம் எப்போது முடியும் என்றுதான் இருந்தது.

ஒரு கதைதான் நினைவுக்கு வந்தது. இரு ஜாடிகளில் நிறைய நண்டுகள் இருக்கும், ஒன்றில் இந்திய நண்டுகள். மற்றொன்றில் வேற்று நாட்டு நண்டுகள். வேற்று நாட்டு நண்டுகள் இருந்த ஜாடி ஒரு மணி நேரத்திற்குப் பிறகு காலியாகி விடும். நண்டுகள் ஒன்றுக்கு ஒன்று உதவிக் கொண்டு அனைத்தையும் வெளியேற்றி விடும். இந்திய ஜாடியில் நண்டுகள் அப்படியே இருக்கும். உள்ளே பார்த்தால் ஏதாவது ஒரு நண்டு ஜாடியின் விளிம்புக்கு ஏற முயற்சிக்கும். மற்றவை உடனே அந்த நண்டை இழுத்துக் கீழே தள்ளி விடும்.

அவுட்சோர்ஸ்ட், ஸ்லம்டாக் வரிசையில் இந்தியக் குழப்பங்களைச் சொல்லும் இன்னொரு படம்.

திறந்தவெளி வீதி வரைபடம் (OpenStreetMap)

2009-02-07T20:32:00.000-08:00

விக்கீபீடியாவைப் போல் இது ஒரு திறந்தவெளி மென்பொருள் சேவை.

நம்ம ஊரில் வரைபடம் பார்த்து போகும் இடம் கண்டுபிடிப்பது வழக்கில் இல்லை. தெருமுனை டீக்கடையில் அல்லது ஆட்டோ ஸ்டாண்டில் அல்லது சிக்னலில் பக்கத்தில் நிற்கும் ஆட்டோ காரரிடம் கேட்டு 'பிடிச்சு பிக் அப் பண்ணி போய்க்கிட்டே' இருப்பவர்கள் நாம். ஆனால் சென்னை போன்ற மாபெரும் நகரங்களில் 'சுப்பு தெருவில் இருக்கும் ஹார்பர் மணி' வீட்டுக்கு வழி கேட்டால் அன்னாருக்குப் பக்கத்து வீட்டில் இருப்பவரே மேலும் கீழும் நம்மைப் பார்த்து விட்டு உதட்டைப் பிதுக்கும் நிலை வந்து விட்டது நித்திய உண்மை.

ஜிபிஎஸ் (GPS) தொழில் நுட்பம் மூலம் கைபேசியில் வரைபடம் கொண்டு வந்து விட்டார்கள். ஆனால் அவர்கள் கொடுக்கும் வரைபடம் அதரப் பழசு. சமகாலத் தெருக்களுக்கும் கைபேசி காட்டும் வரைபடத்திற்கும் சம்பந்தமே இருக்காது. அதைப் பார்ப்பவர் தவறை கைபேசி தயாரிப்பவர்களுக்குச் சுட்டிக் காட்டவும் வழி கிடையாது. கூப்பிட்டுச் சொன்னாலோ, மின்னஞ்சல் அனுப்பினாலோ மேலோட்டமாக இன்சொல் பேசிவிட்டு வெறுமே இருந்து விடுவார்கள்.

சில வருடங்களுக்கு முன்பு 'கூகிள் எர்த்' என்ற மென்பொருள் வெளிவந்தது. இந்த மென்பொருளை நாம் தரவிறக்கி நம் கணினியில் நிறுவி உபயோகிக்க வேண்டும். இந்த மென்பொருள் உதவியுடன் செயற்கைக் கோள் புகைப்படங்கள் மூலம் கட்டடங்களையும் தெருக்களையும் இனம் கண்டு பிடித்துப் பெயரிட முடியும். இந்தியாவின் மேல் எடுக்கப் பட்ட பல செயற்கை கோள் புகைப்படங்கள் மேல் மேகமூட்டம் தெரிந்ததால் பல இடங்களில் தரையில் இருப்பதை இனம் கண்டு பிடிக்க முடியாது. 'கூகிள் எர்த்' உபயோகித்து நாமே நம் பகுதி வரைபடத்தை தொகுத்துத் திருத்த முடியாது. கட்டடங்களுக்கும் தெருக்களுக்கும் பெயர் வைப்பதோடு சரி.

இன்றைய 'திறந்தவெளி வீதி வரைபடம்' அடுத்த கட்ட மென்பொருள் புதினம். மென்பொருளை தரவிறக்கத் தேவையில்லை. செயற்கைக் கோள் வரைபடங்கள் தெளிவாக உள்ளன (நான் பார்த்த வரை). நம்மால் செயற்கைக் கோள் பட உதவியுடன் கட்டடங்கள் மற்றும் சாலைகளின் எல்லைகளை மாற்றி எழுத (தொகுக்க) முடியும். தெளிவாக அறுதியிட முடியும். ஜீபிஎஸ் கருவி நம்மிடம் இருந்தால், நாம் சாலையில் பயணித்து பயணம் செய்த பாட்டையைக் கருவியில் பதிவு செய்து இந்த மென்பொருளில் சேர்ப்பதன் மூலமும் வரைபடத்தை மேலதிகத் துல்லியமாகத் திருத்த முடியும்.

பொதுமக்களால் பொதுமக்களுக்காக ஏற்படுத்தப் பட்டிருக்கும் இந்தச் சேவை எதிர்காலத்திற்கு மிகவும் உபயோகப் படும். அரசுக்குச் செலவில்லாமல், அவர்களின் சோம்பேறித்தனமான இடையூறும் இல்லாமல் நாமாக நம் சுற்றுப் புறச் சாலைகளை தெளிவாகவும் துல்லியமாகவும் ஒரு பொது வரைபடத்தில் பராமரிக்க இயலும். ஆனால் வரைபடத்தின் துல்லியத்திற்கு தனி ஒருவரைப் பொறுப்பாக்கி தவறுகளுக்கும், அவற்றின் காரணமாக ஏற்படும் குற்றங்களுக்கும் வழக்கு போட்டு உதைக்க முடியாத காரணத்தால் இத்தகைய வரைபடங்களை நம்பி நுகர்வதில் ஆபத்துகள் உள்ளன. ஒரு வரைபடத்தை எத்தனை போர் தொகுத்திருக்கிறார்கள் என்ற விபரம் தெரிந்து உபயோகித்தால் ஆபத்துகளை ஓரளவு தவிர்க்கலாம்.

சி கே பிரஹலாத் (New Age of Innovation) புத்தகத்தில் சொல்வது போல் அடுத்த சந்ததியினர் தொழில் நுட்ப உதவியுடன் அரசின் இடைப்பாட்டையே தூக்கி எறியும் நிலைக்குப் போய்க் கொண்டிருக்கிறார்கள். லஞ்சத்திற்கும், ஊழலுக்கும், மெத்தனப் போக்கிற்கும் பதில்கள் தயாராகிக் கொண்டிருக்கின்றன என்று மனதில் தோன்றுகிறது.

ஹட்ஸனின் கதாநாயகன்

2009-02-06T18:28:00.000-08:00

செஸ்லி சல்லென்பெர்கர் ஒரு அமெரிக்க விமானி. சிறிது நாட்களுக்கு முன் ஒரு ஏர்பஸ் 320 ரக விமானத்தில் அமெரிக்காவின் லா கார்டியா விமான நிலையத்தில் இருந்து 150 பயணிகளை ஏற்றிக் கொண்டு கிளம்பினார். தரையிலிருந்து மேலெழும்பிய சில நிமிடங்களுக்குள் ஒரு வாத்துக் கூட்டம் விமானப் பாதையின் ஊடே பறந்து என்ஜினில் அடி பட்டன. என்ஜின் செயலிழந்து போன போது ஹட்சன் ஆற்றில் மேல் பறந்து கொண்டிருந்த (செல்லமாக) 'சல்லி' (மதுரையில் யாரையாவது இப்படிக் கூப்பிட்டால் எலும்பை எண்ணி விடுவார்கள்!!) கொஞ்சம் கூட 'டென்ஸன்' ஆகாமல் விமானத்தை ஆற்றின் மேல் பொத்தினார் போல் இறக்கிவிட்டார். அனைத்துப் பயணிகளும் பத்திரமாகத் தப்பித்தனர். இது எல்லாருக்கும் தெரிந்த கதை.

இதையொட்டி இணையத்தில் ஆன்லைன் விளையாட்டு ஒன்றை இன்றுதான் பார்த்தேன். ஹட்சனின் கதாநாயகன் ஆக விருப்பமுள்ளவர்கள் சுட்டியைச் சொடுக்கி விளையாடிப் பார்க்கலாம்.

தி கைட் ரன்னர் (2007)

2009-02-01T00:43:00.000-08:00

லாண்ட்மார்க்கில் DVD கொட்டிக் கிடந்தது. ஆர்வக் கோளாறால் உந்தப் பட்டு வாங்கி வந்து பார்த்தேன். ஆர்வக் கோளாறு நன்றாகவே வேலை செய்திருந்தது. படம் எனக்கு மிகவும் பிடித்திருந்தது. பெரும்பாலான வசனங்கள் பெர்சிய மொழியில் இருந்த போதிலும் (மிச்சம் ஆங்கிலம்) ஆங்கிலத்தில் கீழே எழுத்துப் போட்டதால் படம் நன்றாகப் புரிந்தது.

ஆஃப்கானிஸ்தானில் முடியாட்சி முடிந்த கால கட்டத்தில் கதை ஆரம்பிக்கிறது. ரஷ்ய ஆக்கிரமிப்புக் காலத்தினூடே நகர்ந்து தாலிபானின் கட்டுப்பாட்டில் இருக்கும் ஆஃப்கானில் கதையை முடித்திருக்கிறார்கள். தாலிபான் ஆட்கள், ஒரு பெண்ணை அவள் கற்பில்லாதவள் என்று குற்றம் சாட்டி, பொது மக்கள் கூடியிருக்கும் விளையாட்டரங்கில் கல்லால் அடித்துக் கொல்லும் கொடுரத்தை தத்ரூபமாக நடித்துக் காட்டியிருக்கிறார்கள்.

படம் எங்கோ சீனாவில் படமாக்கப் பட்டதாம். ஆனால் ஆஃப்கானிஸ்தானை பார்ப்பது போலவே உணர்ந்தேன். இந்தப் படத்தில் ஒரு பாலியல் பலாத்காரக் காட்சியில் நடித்ததற்காக ஆஃப்கான் சிறுவர்கள் இருவரை பாரமவுண்ட் நிறுவனத்தார் அரேபிய நாட்டிற்குக் குடியேற்றினர் என்கிறது இணைய தளம்.

அமீர், ஹஸ்ஸான், அஸ்ஸீஃப் என்ற மூன்று ஆஃப்கான் சிறுவர்களைப் பற்றிய படம் இது. அமீர் பணக்கார பாபாவின் (அப்பாவின் பெயர்) மகன். காபூலில் வசிக்கிறார்கள் அப்பா கம்யூனிசக் கொள்கைகளையும், இஸ்லாம் மதத்தின் சில முரண்பாடான கொள்கைகளையும் தீவிரமாக விமரிசிப்பவர். தன் மகன் தன்னைப் போல் இல்லாமல் கோழையாக வளர்கிறான் என்று வருத்தப் படுபவர்.

ஆமீர் பட்டம் விட, பாபாவின் வேலைக்காரனான அலியின் மகனென்று வளரும் ஹஸ்ஸான் அமீர் அறுத்துப் போடும் பட்டங்களை ஓடிச் சென்று பிடித்து வருகிறான். அமீரின் நம்பிக்கையான வேலைக்காரன்.

அஸ்ஸீஃபிற்கு தெருவில் அமீரையும் ஹஸ்ஸானையும் தன் நண்பர்களுடன் சேர்ந்து கொண்டு மிரட்டுவதே வேலை. ஒரு நாள் ஹஸ்ஸான் அமீர் அறுத்த பட்டத்தைப் பிடித்து வரும் போது அமீரின் பார்வை பட அஸ்ஸீஃபால் பலாத்காரம் செய்யப் படுகிறான். அமீர் தன் வேலைக்காரனை காப்பாற்றாமல், அவன் மேல் திருட்டுப் பட்டம் கட்டி வீட்டை விட்டே துரத்தி விடுகிறான்.பிறகு ரஷ்ய ஆக்கிரப்பின் போது அப்பாவுடன் தப்பியோடி அமெரிக்காவில் (கலிஃபோர்னியாவில்) குடியேறுகிறான். அங்கே அவன் ஒரு எழுத்தாளனாகி ஒரு ஆஃப்கானியப் பெண்ணை மணந்து கொள்கிறான். அப்பா செத்துப் போகிறார்.

பிறகு ஒரு நாள் அவனுக்கு ஹஸ்ஸானின் மரணம் பற்றிய தகவல் கிடைக்கிறது. அப்போதுதான், தன் அப்பா அலியின் மனைவியிடம் விளையாடிப் பெற்ற குழந்தைதான் ஹஸ்ஸான் என்று தெரிந்து கொள்கிறான். ஹஸ்ஸானுக்கு ஒரு மகன் இருப்பது தெரிந்து அவனைத் தேடி ஆஃப்கானிஸ்தான் போகிறான். தாலிபானில் சேர்ந்திருக்கும் அஸ்ஸீஃபின் பிடியில் நடனப் பையனாக (பச்சா) ஹஸாரா (ஆஃப்கான் அகதி) என்ற முத்திரையில் வளரும் அந்தச் சிறுவனைப் எப்படிப் போராடி மீட்கிறான் அமீர் என்பதுதான் கதை.

விறுவிறுப்பாகச் செல்லும் கதை. சொல்லப் பட்டிருக்கும் விதம், காட்சி அமைப்புகள், படப் பிடிப்பு அனைத்தும் சிறப்பு. ஒட்டு மொத்தத்தில் பார்க்க வேண்டிய படம். ஆஃப்கானிஸ்தான் என்ற நாட்டின் சரித்திரம் மற்றும் தற்போதைய நிலைமை பற்றி பல விஷயங்கள் விளங்கின மாதிரி உணர்ந்தேன். இந்தப் படம் பற்றிய மேலும் சுவையான பல செய்திகள் இணையத்தில் கொட்டிக் கிடக்கின்றன.

அமெரிக்க வங்கிகள் செய்யும் கூத்து

2009-01-30T21:55:00.000-08:00

இந்த வங்கிகள் அடிக்கும் கூத்து சொல்லி மாளாது. இத்தனைக்கும் உயர் பொறுப்பில் இருக்கும் தலைவர்கள் எல்லாம் உலகம் போற்றும் கல்வி நிறுவனங்களில் தகுதிச் சான்றிதழ் பெற்றவர்கள்.

முதலில் கண்ணை மூடிக் கொண்டு தெருவில் நடப்பவனையெல்லாம் கூப்பிட்டுக் கடன் கொடுத்தார்கள். அவனுக்குக் கடனை திருப்பித் தர வக்கிருக்கிறதா என்று பார்க்கும் பொறுப்பிலிருந்து தெரிந்தே தவறினார்கள்.

பிறகு வரும் கடனையும் வராக் கடனையும் ஒன்றாய் கலந்து கூறு போட்டு கூவிக் கூவி விற்றார்கள். அதன் மூலம் தாங்கள் வலியப் போய் உண்டாக்கிய ஆபத்தையும் கூறு போட்டு வெளியேற்றினார்கள்.

கடன்கள் மூழ்கிப் போன பின் (தன்னிச்சையாக கட்டுப்பாடு ஏதுமில்லாமல் செயல் பட்ட) தனியார் வங்கிகள் அரசிடம் போய் குய்யோ முறையோ என்று அடித்துக் கொண்டார்கள். அமெரிக்கா விழித்துக் கொண்டு வரிப் பணத்திலிருந்து நிவாரண நிதி கொடுக்க வேண்டும் என்று முதலாளித்துவ சிந்தனைகளை மூலையில் வைத்து விட்டு வெட்கமில்லாமல் கெஞ்சினார்கள்.

அரசு முன்னே பின்னே பார்த்து, முகவாயைச் சொறிந்து கொண்டு, அரைமனசுடன் பணம் கொடுத்தவுடன், அதை வைத்துக் கொண்டு மூழ்கிப் போன கடன்களை குறைந்த விலைக்கு அள்ளுவதில் செலவு செய்தனர். பொருளாதார முன்னேற்றத்திற்கு புது முயற்சி என்று யாராவது புது கடன் கேட்டால் 'போடா போ' என்று விரட்டினார்கள்.

இத்தனை கூத்துக்கும் கேலிக்கும் பிறகும் இழி செயல்கள் தொடர்கின்றன. 'சிடிக்ரூப்' என்ற வங்கி நிறுவனம் கடந்த 15 மாதத்தில் சுமார் 15 பில்லியன் டாலர் நஷ்டம் அடைந்திருக்கிறார்கள். ஆனால் சமீபத்தில் 50 மில்லியன் டாலர் கொடுத்து பளபளவென்று ஜெட் விமானம் வாங்கியிருக்கிறார்கள். அவர்களுக்கு 345 பில்லியன் டாலர் நிவாரணம் கொடுத்த கருவூலக் காரியதரிசி கூப்பிட்டுக் கடிந்து கொண்டிருக்கிறார். 'மெர்ரில் லிஞ்ச்' என்ற நிறுவனத்தில் பெரிய தலைகளுக்கு 4 பில்லியன் டாலர் ஊக்கத் தொகை கொடுத்திருக்கிறார்கள். இந்த நிறுவனத்தின் தலைவர் (பெயர்: ஜான் தைன்) சுமார் 1 மில்லியன் டாலர் செலவு செய்து சமீபத்தில் தனது அலுவலகத்தை அழகு படுத்திக் கொண்டாராம். பிரச்சினை பொதுஜன பஞ்சாயத்திற்கு வந்ததும் பணத்தைத் திருப்பிக் கொடுத்து விட்டாராம்.

அதிபர் ஒபாமா "இவையனைத்தும் பொறுப்பின்மையின் உச்சம். வெட்கப் பட வேண்டிய விஷயம்" என்று கோபப் பட்டிருக்கிறார்.

'வால் ஸ்ட்ரீட்'டின் புதுப் பெயர் பேராசை தெரு என்று மாற்றி விடலாம்.

திருக்குறள் [44:8]

இடிப்பாரை இல்லாத ஏமரா மன்னன்
கெடுப்பா ரிலானுங் கெடும்

எ வெட்னெஸ்டே - ஹிந்தி திரைப்படம்

2009-01-24T21:26:00.000-08:00

நீரஜ் பாண்டே இயக்கியிருக்கும் இந்தப் படத்தில் நஸிருதீன் ஷா மற்றும் அனுபம் கேர் நடித்திருக்கிறார்கள். ஒரு புதன் கிழமை மதியம் இரண்டு மணியிலிருந்து மாலை ஆறு மணி நடக்கும் போலீஸ் மற்றும் தீவிரவாதம் சம்பத்தப் பட்ட நிகழ்வுகளைச் சித்தரிக்கும் படம். இந்தப் படம் திரையரங்குகளுக்கு வந்த சூட்டில் டப்பாவிற்குள் போய் விட்டதாம்.

அலுவலக நண்பர்கள் பரிந்துரைத்ததால் லாண்ட்மார்க்கில் ஒளித் தகடு வாங்கி வந்து பார்த்தேன். மோஸர் பாயர் சல்லிசான விலையில் வெளியிட்டிருக்கிறார்கள்.

காவல் துறை உயர் பதவியில் இருக்கும் அனுபம் கேர், தான் பணியிலிருந்து ஓய்வு பெறும் நாளில் நரிமன் பாயிண்டில் கடலைப் பார்த்து அமர்ந்து பணியில் தனக்கு ஏற்பட்ட மறக்க முடியாத அனுபவங்களை அசை போடுகிறார். என்றைக்குமே மறக்க முடியாதது என்று இந்த அனுபவத்தைச் சொல்ல ஆரம்பிக்கிறார். படம் முழுவதும் ஃப்ளாஷ் பாக். ஃப்ளாஷ் பாக்கிலிருந்து மீளாமலே படம் முடிந்து போகிறது.

படத்தில் ஒரு வயதான (சராசரிக் குடிமகன் தோற்றமுள்ள) மனிதர் மும்பையின் பல பொது இடங்களில் (காவல் நிலையம் உட்பட) ஒரு கறுப்புப் பையைக் கொண்டு போய் யாரும் கவனிக்காத வகையில் விட்டு விட்டு வந்து விடுகிறார். பிறகு கட்டுமானம் நடந்து கொண்டிருக்கும் வானளவிய கட்டடத்தின் உச்சாணியில் அமர்ந்து கொண்டு செல்பேசியில் அனுபம் கேருக்கு மிரட்டல் விடுகிறார். செல்பேசித் தொழில் நுட்பத்தின் அனைத்து நுணுக்கங்களையும் தெரிந்து வைத்துக் கொண்டு அவர் எங்கிருந்து எப்படிக் கூப்பிடுகிறார் என்பது போலீஸிற்குத் தெரியாத வகையில் செயல் பட்டு அவர்களைத் திணற அடிக்கிறார். சரி, மிரட்டல் என்ன? அவர் குறிப்பிடும் நான்கு தீவிரவாதிகளை மும்பைக் காவலில் இருந்து விடுவித்து அவர் சொல்லும் இடத்தில் கொண்டு சேர்க்க வேண்டும். குறிப்பிட்ட நேரத்திற்கும்ள் அதைச் செய்யாவிட்டால் மும்பை வெடித்துச் சிதறும். போலீஸ் இவரை நம்ப மாட்டார்கள் என்று தெரிந்து, அனுபம் கேரிடம் எந்தக் காவல் நிலையத்தில் குண்டு வைத்திருக்கிறார் என்று மட்டும் தகவல் கொடுக்கிறார். போலீஸ் அந்தக் குண்டைக் கண்டு பிடித்ததும் கதை சூடு பிடிக்கிறது. குண்டு வைத்து போலீஸை மிரட்டும் பாத்திரத்தில் நஸிருதீன் ஷா சிறப்பாக நடித்திருக்கிறார்.

சந்தையின் உச்சத்தில் இருக்கும் கதாநாயகன், துணிப் பஞ்சத்தில் வாடும் கதாநாயகி, ஆட்டம், பாட்டு, தடவல், காமெடி ட்ராக் எதுவும் இல்லாத இந்தப் படம் ஆரம்பித்தது தெரியவில்லை. முடிந்து விட்டது. அவ்வளவு விறுவிறுப்பு. பல காட்சிகளில் நம்மை இருக்கையின் விளிம்பிற்குக் கொண்டு வந்து விடுகிறார்கள். நாட்டுப் பற்று, கடமை உணர்ச்சி, குடும்பப் பாசம், துடிப்புடன் கூடிய பொறுப்புணர்ச்சி, நிதானத்துடன் கூடிய தெளிவு போன்றவைகளைச் சிறப்பாகவும் கோவையாகவும் சித்தரிக்கும் படம்.

சராசரிக் குடிமகன் யோசிக்க லாயக்கில்லாதவன், பூச்சி, தப்பைத் தட்டிக் கேட்காதவன், பயந்து வாழ்வதற்கே பிறந்தவன். வெகுண்டால் அல்லது யோசித்தால் அவன் குற்றவாளியாகத்தான் இருக்க முடியும் என்பது போன்ற நம் சமுதாயத்தின் சிந்தனைத் தளைகளை உடைத்தெறியும் படம்.

ஆங்கிலப் படத்திற்கு இணையாக எடுத்திருக்கிறார்கள். 'வில்லு' வெல்லாம் இதனிடம் பிச்சை வாங்கக் கூட லாயக்கில்லாத படம். ஒளித்தகட்டில் காசு கொடுத்து வாங்கிப் படம் பார்த்து படம் எடுத்தவர்களை ஊக்குவித்தால் ஒருவேளை உங்கள் பேரப் பிள்ளைகளுக்கும் எனது பேரப் பிள்ளைகளுக்கும் கிடைக்கவிருக்கும் இந்திய பொழுது போக்குத் தேர்வுகளின் சராசரித் தரம் உயர வாய்ப்புள்ளது.

ஸ்லம் டாக் மில்லியனர் - என் அனுபவம்

2009-01-24T05:55:00.000-08:00

இன்று சென்னை 'சத்யம்' திரையரங்கில் காலை காட்சிக்கு மகள் மற்றும் மனைவியுடன் போனால் அங்கே இது பெரியவர்களுக்கு மட்டும் என்று மகளை கதவில் நிறுத்தி விட்டார்கள். சரியென்று அம்மாவும் மகளும் டிக்கட்டை விற்று விட்டு 'மாடகாஸ்கர் 2' பார்க்கச் சென்று விட்டனர். நான் மட்டும் உள்ளே போய் உட்கார்ந்தால் பக்கத்துச் சீட்டில் (மனைவி விற்ற சீட்டில்) ஒரு அம்மாவும் அவர் கூட்டி வந்த 'பெரியவரும்' வந்து உட்கார்ந்தார்கள். படம் முழுக்க பெரியவர் அம்மாவிடம் 'அம்மா எனக்குப் பாகூன் (பாப் கார்னாம்!) வேணும், சாக்கி வேணும் என்று கேட்டு நம்மையும் அவ்வப்போது பிஞ்சுக் காலால் இரண்டு உதை உதைத்து மகிழ்வித்தார்.

சத்யம் நிறுவனத்தில் ஆளுமை பிரச்சினை என்று உலகமே பேசிக் கொள்கிறார்கள். இந்தச் 'சத்யம்' கூட 'அது' சேர்ந்ததுதானோ என்று யோசித்துக் கொண்டே படம் பார்த்தோம். இனி படம்:

ஜமால் மற்றும் அவன் அண்ணன் பற்றிய படம். இருவரும் பம்பாய் சேரியைச் சேர்ந்த சிறுவர்கள். ஒரு கலவரத்தில் அம்மா செத்துப் போக அனாதையாகி விடுகிறார்கள். நம் பள்ளிக் கரணை குப்பைக்காடு போன்ற பிரம்மாண்டத்தில் குப்பை பொறுக்கித் திரிகிறார்கள். குழந்தைகளை பிச்சை எடுக்க வைக்கும் கும்பலிடம் பிடிபட்டுத் தப்பிக்கிறார்கள். ஒடும் ரயிலில் வடை விற்றுப் பிழைக்கிறார்கள். வெளிநாட்டு சுற்றுலா பயணிகளுக்கு வழிகாட்டும் வேலை செய்து அவர்களிள் பலரை ஏய்க்கிறார்கள். டாலர் சுருட்டுகிறார்கள். அவர்களில் ஒருவன் வளர்ந்தவுடன் பி பி ஓ (BPO) நிறுவனத்தில் காபி பாய் ஆகிறான். பிறகு அங்கேயே பி பி ஓ பணி செய்கிறான். ஒரு நாள் 'கௌன் பனேகா கரோர்பதி' ஆட்டம் ஆடுகிறான்.

ஏறக்குறைய எல்லாக் கேள்விகளுக்கும் பதில் சொல்லி விட்டான். கடைசிக் கேள்வி கேட்க வேண்டிய வேளையில் நேரம் முடிந்து போய் சங்கு ஊதி விடுகிறார்கள். கடைசிக் கேள்வியை நாளைதான் விளையாட வேண்டும். இந்த நிலையில் விளையாட்டை நடத்துபவருக்குச் சந்தேகம். சேரிப் பையனுக்கு இவ்வளவு மதியா? ஒருவேளை 'ராமலிங்க ராஜூ' வகையறாவாக இருக்குமோ என்று சந்தேகப் பட்டு போலிஸிடம் அனுப்புகிறார். அவர்களும் முட்டிக்கு முட்டி தட்டி விசாரிக்க ஒவ்வொரு கேள்விக்கும் தன் வாழ்க்கைப் போக்கிலேயே பதில் கிடைத்ததை ஜமால் இன்ஸ்பெக்டருக்கு விளக்குகிறான். அடுத்த நாள் விளையாட அனுமதிக்கிறார்கள். இங்கேதான் க்ளைமாக்ஸ்.

இடையில் ஜமாலின் அண்ணன் மும்பை தாதாவிடம் சேர்வது, அண்ணனின் துரோகம், ஜமால் - லத்திகா காதல் என்று சுவாரசியங்கள் புத்திசாலித்தனமாகப் பிணைக்கப் பட்டுள்ளன. மும்பை தாதாவிடம் சிக்கிய லத்திகாவும் ஜமாலும் எப்படி ஒன்று சேர்கிறார்கள் என்று திரையில் காண்க.

சேரியின் அடித்தரத்திற்கும் கீழான வாழ்க்கை தரம், அனாதைக் குழந்தைகளை குருடாக்கிப் பிச்சைக்கும், அழகாக்கி விபச்சாரத்திற்கும் உபயோகிப்பது போன்ற இந்திய அவலங்கள் மிகத் தத்ரூபமாகக் காட்டப் பட்டிருக்கின்றன. சில காட்சிகள் அப்படியே நம்மை உறைய வைக்கும். மற்றபடி 'ஏ' முத்திரைக்கு வேறு காரணங்கள் ஏதும் இல்லை (மனைவி மற்றும் மகளுடன் 'ஏ' என்று தெரியாமல்தான் போனேன் என்பது நினைவில் இருக்கட்டும்).

முக்கால் வாசிப் படத்தில் பின்னணி இசையே இல்லை. தேவையும் இருக்கவில்லை. ரஹ்மான் 'ஜெய் ஹோ' பாடலில் கலக்கி விட்டார்.

பார்க்க வேண்டிய படம். ஆனால் படம் சீக்கிரம் பெட்டிக்குள் போய் விடும். ஆஸ்காருக்குப் பரிந்துரைத்திருப்பது மகிழ்ச்சி. பரிசு வாங்க வேண்டும் என்பது நம் ஆசையும் கூட. ஆனால் சந்தேகம்தான்.

அதிபர் பராக் ஒபாமாவின் பதவியேற்பு

2009-01-20T17:33:00.000-08:00

அமெரிக்கக் கிழக்கு கடற்கரை நேரப் படி 20-1-2009 நண்பகல் 12 மணிக்கு அமெரிக்க அரசியலமைப்பு சட்டப் படி பதவிப் பிரமாணம் எடுத்துக் கொள்வதற்கு சில மணித்துளிகள் முன்னதாகவே ஒபாமா அதிபராகி விட்டார். மனிதர் விழாவிற்கு நடந்து வந்த போது சற்று பதற்றமாகத் தெரிந்தார். ஆனால் பதவிப் பிரமாணத்தின் போது தலைமை நீதிபதி பதவிப் பிரமாணத்தின் 35 வார்த்தைகளாலான வாக்கியங்களில் சற்று இடறிய போதும், மனிதர் கலங்காமல் பொறுமை காத்தார். கம்பீரமாக பதவி ஏற்றார்.

அதிபரின் முதல் உரையில் "உலகை வழி நடத்த அமெரிக்கா மீண்டும் தயாராகி விட்டது" என்றார். மிகவும் ஆழமான வார்த்தைகள். முந்தைய அதிபரின் எதிரிலேயே இந்தக் கருத்தை (இம்சைப் படுத்தாமல்) ஆனால் தைரியமாகச் சொன்னதன் மூலம் உண்மையை மாபெரும் சபையில் ஒப்புக் கொண்டு, தன்னைத் தானே ஏற்றுக் கொண்டிருக்கும் பெரும் பொறுப்பிற்குள் ஆழ்த்திக் கொண்டார்.

மேலும் 'விடுதிகளில் சமமாக அமர்ந்து சாப்பிடக் கூடிய உரிமை மறுக்கப் பட்ட இனத்தைச் சேர்ந்த ஒருவன் இங்கே பதவிப் பிரமாணம் எடுத்துக் கொள்ளும் அளவிற்கு இந்த நாட்டில் மாற்றம் மலர்ந்திருக்கிறது' என்று சொல்லி வெள்ளையர், கறுப்பர் என்று மாறுபாடில்லாமல் வானளாவிய கரவொலியைப் பெற்றார்.

தனது பதினெட்டு நிமிட முதல் உரையில் பொருளாதாரப் பிரச்சினை, ஈராக், ஆப்கானிஸ்தான், சுற்றுச் சூழல் பிரச்சினை அனைத்தையும் தொட்டார்.

முந்தைய அதிபர் விழாவிற்கு வந்திருந்து சிறப்பித்ததுடன் பெருந்தன்மை மற்றும் பொறுப்பான புன்னகையுடன், கையில் இருந்த அத்தனை அதிகாரத்தையும் அமைதியாக கைமாற்றி விட்டு, ஆட்டுக் குட்டி போல் ஹெலிகாப்டரில் கிளம்பி விட்டார். நம்ம ஊரில் நடக்குமா?

அண்மையில் பார்த்து சிரித்தது

2009-01-14T18:14:00.000-08:00

நன்றி - எகனாமிக் டைம்ஸ்

நரிக்கு நாட்டாமை கொடுத்தால்...

2009-01-09T20:32:00.000-08:00

இந்த இடுகை முழுவதும் என் சொந்தக் கருத்து மட்டுமே. வேறு எவரும் இதில் சம்பத்தப் படவில்லை

அண்மையில் களங்கப் பட்டிருக்கும் நிறுவனத்தில், அதன் ஊழியர்களிடம் இருக்கும் சத்தியம், அவர்கள் செய்யும் சேவையில் இருக்கும் சத்தியம் மற்றும் களங்கப் பட்டிருக்கும் நிறுவன நுகர்வோர் நம்பிக்கையில் உள்ள சத்தியம் பற்றி நாம் மிகவும் மரியாதை வைத்திருக்கிறோம். அவர்களை எள்ளளவும் சந்தேகப் படவோ, சிறுமைப் படுத்தவோ நாம் இதன் மூலம் விழையவில்லை

நரிகள் ஆட்டுத்தோல் போர்த்திக் கொண்டு கிடையில் நாட்டாமை செய்திருக்கிறார்கள். குட்டு வெளியாகும் என்ற பயம் வந்ததும் தலைமை நரி நான் மட்டும்தான் தோல் போர்த்தியிருக்கிறேன். மற்றவர்கள் உண்மையிலேயே ஆடுகள் என்று அறிக்கை விட்டிருக்கிறது.

எது நரி, எது ஆடு என்று இனம் புரியாமல் எல்லாரும் தவித்துக் கொண்டிருக்கையில் வெளியேறிய நரி சொல்வதை எல்லோரும் நம்புங்கள், நாங்களெல்லாம் ஆடுகள்தான், நாட்டாமைக்கு வருகிறோம் என்று சிலர் கிளம்பினார்கள்.

நீ இதுவரை ஏற்றுச் செய்த தலைமைப் பொறுப்பில் உன் தலை மேல் வரவுக் குறிக்கோள், செலவுக் குறிக்கோள், லாபக் குறிக்கோள் என்று எவரும் கத்தி வைக்கவில்லையா? தணிக்கை செய்யப் பட்ட காலாண்டு அறிக்கைகளை உலகத்திற்குச் சொன்ன போது உனக்குச் சொல்லவில்லையா? நடப்புக்கும் அறிக்கைக்கும் வித்தியாசம் இருந்திருக்குமே அதை உனக்குக் கண்டு பிடிக்கத் தெரியவில்லையா? உன்னை பொம்மலாட்ட பொம்மை போல் செலுத்திக் கொண்டிருந்தார்களா? அப்படி செலுத்திய மேலதிகாரிகள் கீழே நீ நீடிக்கக் காரணம் என்ன? என்றெல்லாம் கேட்க நம் மர மண்டைக்கே தோன்றுகிறது. புறப்பட்ட 'ஆடு'களைக் கேள்வி கேட்க நாதியில்லாமல் இருந்த மாதிரித் தெரிந்தது.

"குற்றம் நடக்காததற்கு எவண்டா சாட்சி இங்கே" என்றார்களாம். "குற்றம் சாட்டப் பட்டவந்தான் ஐயா!" பதில் வந்ததாம் பணிவாக!! 'கேட்பவன் கேணையன் என்றால் எருமை கூட ஏரோப்பிளேன் ஒட்டும்' என்பார்கள். அந்தக் கதை ஏறக்குறைய அரங்கேறிக் கொண்டிருந்தது.

நிறுவனத்தின் தரத்தை உலகறிய அளந்து காட்டுவதில் என்னை விட விற்பன்னன் எவன் என்று மார் தட்டிய வணிகச் செய்தி ஊடகங்களும், ஆய்வு நிறுவனங்களும், மக்கள் கவனத்தை திசை திருப்பும் பரபரப்புச் செய்தி வெளியிடுவதில்தான் குறியாக இருக்கிறார்கள்.
இவர்களில் எவனுக்கும் இதுவரை 'ஐயா தவறுகளை உடனுக்குடன் வெளிச்சம் போடத் தவறிவிட்டேன். என் கணிப்புகளையும் ஆய்வறிக்கைகளையும் மிகவும் நம்பியதாலும் கூட பலர் பணத்தை நரிக்குக் கொடுத்து விட்டு விழிக்கிறீர்கள். வருந்துகிறேன். திருத்திக் கொள்கிறேன்" என்று சொல்லும் தைரியமும் பக்குவமும் இல்லை. பொறுப்பை தானாகக் கையில் எடுத்துக் கொண்டு சரியாக வேலை செய்யாதவனும் ஒருவகையில் தவறுக்குத் துணை செல்பவனே. இவர்களில் எத்தனை பேர் நரிகள் கொடுத்த விருந்துகளிலும் கேளிக்கைகளிலும் திளைத்துக் களித்தவர்கள் என்று எவருக்கும் நினைவில் வரவில்லை. சிக்கிக் கொண்ட "ப்ரைஸ்வாட்டர் ஹவுஸ்" மேல் எரியும் தீயில் இவர்கள் குளிர் காய்கிறார்கள்.

தகவல் தொழில்நுட்பத் துறையில் இருக்கும் மற்ற நிறுவனங்கள் சில (பெயர் சொல்ல விரும்பவில்லை) நானே கடைந்தெடுத்த மாணிக்கம் என்ற தொனியில் பிளிறிக் கொண்டிருக்கிறார்கள். இது அவர்களின் அறியாமையை தெளிவாகப் படம் போட்டுக் காட்டுகிறது.

மத்திய அரசு வரலாற்றில் இல்லாத முதல் முறையாகத் தலையிட்டிருக்கிறது. என்ன நடக்கப் போகிறது என்று பொறுத்திருந்து பார்ப்போம்.

திருக்குறள்

தன்குற்ற நீக்கிப் பிறர்குற்றங் காண்கிற்பின்

என்குற்ற மாகும் இறைக்கு [குற்றங்கடிதல் 43:6]

எகனாமிஸ்ட் கேலிச்சித்திரம்

2009-01-05T17:29:00.000-08:00

நினைவில் நின்றவை

2009-01-03T20:57:00.000-08:00

30 வருடம் முன்பு பள்ளிக் கூடத்தில் படித்த தமிழ்ப் பாடம் - இன்று காலை பின்வரும் தமிழ் பாடல் திடீரென எந்த ஒரு சம்பந்தமும் இல்லாமல் முழுமையாக நினைவுக்கு வந்தது. எளிமைக்கு இத்துணை சக்தி உண்டு என்பது புலப்படுகிறது!!

கிளையினிற் பாம்பு தொங்க

விழுதென்று குரங்கு தொட்டு

விளக்கினைத் தொட்ட பிள்ளை

வெடுக்கென்று குதித்ததைப் போல்

கிளைதோறும் குதித்துத் தாவி

கீழுள்ள விழுதையெல்லாம்

ஒளிப் பாம்பாய் எண்ணி எண்ணி

உச்சி போய்த் தன் வால் பார்க்கும்

ஹார்ஸ்லீ குன்று

2008-12-31T22:42:00.000-08:00

ஆந்திர மாநிலத்தில் கிழக்குத் தொடர்ச்சி மலை முடியும் இடத்தில், மதனபள்ளி என்ற ஊரின் அருகில் அமைத்திருக்கும் இந்த ஆந்திராவின் ஊட்டி, கடல் மட்டத்திலிருந்து சுமார் 4500 அடி உயரத்தில் உள்ளது. மூன்று நாட்கள் இங்கே தங்கியிருந்தோம். குன்றின் பரப்பளவு மிகவும் சிறியது. 100 மனிதர்களுக்கு மேல் போனால் குன்றில் கூட்டம் தாங்காது. சுகமான குளு குளு தட்ப வெப்பம். கிடைத்தற்கரிய இயற்கை காட்சிகள். இந்த இடத்தில் 2008 ஐ இனிதே முடித்துக் கொண்டோம்.

இனிய 2009 நல்வாழ்த்துகள்!

அபியும் நானும் - என் கருத்துகள்

2008-12-25T19:41:00.000-08:00

[தமிழ் மணம் பதிவர்கள் கொடுத்த 'பில்ட் அப்' ஆல் உந்தப் பட்டு என் பெண்ணும் கூட வரச் சொல்லிக் கேட்க, நேற்று பிரார்த்தனாவில் படம் பார்த்தோம். தமிழ் மணத்தில் 'படம் பார்த்தால் அனுபவிக்கணும் ஆராயக் கூடாது' என்று கை மேல் ஏற்கெனவே போட்டிருப்பதால் இங்கு அனுபவம் வரும் முன்னே, ஆராய்ச்சி வரும் பின்னே!!]

கனமான கருத்தை (அப்பா - மகள் உறவு) ஆர்ப்பாட்டம் இல்லாமல், அட்டகாசம் இல்லாமல், அதிரடி இல்லாமல், ஃபார்முலா இல்லாமல், சுவாரசியமாக எடுத்திருக்கிறார்கள். அப்படியும் கடைசியில் படம் ஆமை வேகத்தில் நகர்கிறது.

மூணார் மற்றும் குன்னூர்(?) காட்சிகள் கண்ணுக்குக் குளிர்ச்சி. உறுத்தாத படப் பிடிப்பு.

ப்ரகாஷ் ராஜ் சில சமயத்தில் மிகையாக நடிப்பார் என்பது என் கருத்து. இந்தப் படத்தில் அளவோடு நடித்து சிறப்பித்திருக்கிறார். த்ரிஷா பெண்ணை குறும்புக் காரப் பெண்ணாகப் பார்த்திருக்கிறேன், துள்ளும் இளசாகப் பார்த்திருக்கிறேன்(உஸ்ஸ்.. சற்று கிட்டே வாரும் ஐயா! கவர்ச்சிக் கன்னியாகப் பார்த்திருக்கிறேன் என்று சொன்னால் உதைத்தாலும் உதைப்பார்கள், நம் காதோடு இருக்கட்டும்). குணச் சித்திரத்தில் இதுதான் முதல் தடவை. ப்ரகாஷை மீறிப் பிரகாசித்திருக்கிறார். ஐஸ்வர்யாவின் முகவெட்டை வைத்துக் கொண்டு அவரால் உணர்ச்சிப் பூர்வமான பாவங்களை வெளிப் படுத்த முடியாது என்பதும் என் கருத்து. கண்ணால் பேசியே இந்தப் படத்தில் சாதித்திருக்கிறார். நன்றாகச் செய்திருக்கிறார். வாழ்த்துகள். சும்மா வாஸ்துவுக்காக ப்ரித்வி ராஜை சேர்த்திருக்கிறார்கள் போலும்.

மனைவியை தப்பாகப் புரிந்து அறைந்து விட்டு பிறகு அவரிடம் கெஞ்சும் இடம், நடுத்தெருவில் தன் பெண் சட்டையை உருவிக் கொண்டு வீட்டுக்குப் போகச் சொல்லும் காட்சியில் முதலில் கூனிக் குறுகிப் போய் நடக்கும் ப்ரகாஷ் ராஜ், பிறகு பெண் செய்த நல்ல காரியம் புரிந்து நெஞ்ஜை நிமிர்த்திக் கொண்டு நடக்கும் கட்டம், கடைசியில் மனைவியை சரியாகப் புரிந்து கொண்டு அவருடைய பெற்றோரை தானே அபியின் கல்யாணத்திற்குக் கூப்பிடுவதாகச் சொல்லும் கட்டம் முதலியவற்றில் ப்ரகாஷ் ராஜ் தனது 'ட்யுப் லைட்' பாத்திரத்தை மிக நன்றாக வெளிப்படுத்தியிருக்கிறார். மற்றவர்களும் சளைக்கவில்லை.

படத்தை எப்படி முடிப்பது என்று திணறியிருப்பது புரிகிறது. க்ளைமாக்ஸ், ஆன்டை(anti) க்ளைமாக்ஸ், க்ளைமாக்ஸ் தொடர் போரடிக்கிறாது. ஜஸ்பீர் - ரவி காதல் தேவையற்ற ஒட்டு.

மொத்தத்தில் அனைவரும் குடும்பத்துடன் பார்த்து ரசிக்கக் கூடிய மற்றுமொரு 'ப்ரகாஷ் ராஜ் - ப்ரித்வி ராஜ் முத்து'.

இனி தீவிர ஆராய்ச்சியை விரும்புபவர்கள் படிக்கலாம்.

பெண் சிசுவை நெல் கொடுத்துக் கொல்லும் சமகால அப்பன் கதைகளைக் கேட்டிருக்கிறோம், பெண் குழந்தை பெற்று, மனைவி வயிற்றை இரண்டு முறை ஏற்கெனவே கிழித்திருந்தாலும் பரவாயில்லை, மூன்றாவதாக ஆண் குழந்தைக்கு முயற்சிக்க வேண்டும் என்று பிடிவாதம் பிடித்த சமகால அப்பன்களை பார்த்திருக்கிறேன். பெண் பிறந்து விட்டாள், இனி அடுத்த குழந்தையும் பெண்ணாகப் பிறந்தால் ஆண்டியாகி விடுவேன் என்ற மனப்பான்மையை நெருங்கியிருந்து கேட்டிருக்கிறேன். சுற்றத்தின் ஏச்சுக்கும் பேச்சுக்கும் பயந்து பெண்ணை விரும்பாத உறவுக்குக் கட்டி வைத்துவிட்டு பிறகு வருத்தப் பட்ட அப்பனையும் பார்த்திருக்கிறேன். இத்தகைய அப்பன்கள் நிறைந்த தமிழ் நாட்டில் அபியின் அப்பா எந்தச் சராசரி அப்பனை பிரதிபலிக்கிறார் என்று புரியவில்லை.

அபியின் அப்பாவையும் சேர்த்து மேற்கூறிய அப்பாக்களைத் தயாரித்து சந்தையில் விடுபவர்கள் பெண்களாகிய அம்மாக்கள்தாம். அவர்களுக்கு என்ன சுதந்திரம் இருக்கிறது (அ) இருந்தது என்ற கேள்வி எழலாம். சற்றே சுதந்திரம் கிடைத்திருக்கும் சமகால நகர்புற அம்மாக்கள் இந்தப் படத்தைப் பார்த்து விட்டு சற்று யோசித்தால் எதிர் கால அப்பாக்கள் வேறு மாதிரி இருக்க வாய்ப்பு உண்டு. நாட்டுப் புறத்தில் இந்தப் படம் ஓடுமா என்பதே சந்தேகம்.

தற்போதைய இளம் பெண்கள் (நாட்டுப் புறத்திலும் சரி, நகர் புறத்திலும் சரி) அபியைப் போலவே 'சுகுர்' ராக இருக்கிறார்கள். எல்லாம் கேபிள் தொலைக்காட்சி செய்த மாயம். அவர்கள் உருவாக்கும் ஆண்களுக்கு மேலும் பரந்த மனப்பான்மையை ஊட்டி வளர்ப்பார்கள் என்று நம்பலாம்.

மொத்ததில் எதிர்காலத்தின் மேல் நம்பிக்கை வளர்க்கும் கருத்துக்களை தூண்டி விட்ட படம்.

இனி போட்டுத் தாக்குங்கள்!! காத்திருக்கிறேன்.

சத்யம் கம்ப்யூட்டர்ஸ் நிறுவனம் செய்தது சரியா?!

2008-12-17T19:08:00.000-08:00

இரண்டு நாளாக முதலிட்டாளர்கள் சத்யம் நிறுவன மேலாளர்களை நார் நாராகக் கிழித்துக் கொண்டிருக்கிறார்கள். காரணம் சத்யம் அதன் தலைமை பொறுப்பில் இருப்பவரின் மகன் நடத்தும் இரண்டு நிறுவனங்களை 1.5 பில்லியன் டாலர் கொடுத்து வாங்க முயற்சித்ததுதான்.

'மேய்டாஸ் இன்ஃப்ரா' மற்றும் 'மேய்டாஸ் ப்ராப்பர்டீஸ்' என்ற இரண்டு நிறுவனங்களும் ராமலிங்க ராஜூவின் மகன் நடத்தும் நிறுவனங்கள். அவற்றின் சந்தை மதிப்பீடு 1.5 பில்லியன் டாலர் அளவிற்கு இல்லை என்று அதிரடியாக ஆராய்ந்து சொல்லியிருக்கிறார்கள்
சத்யம் செய்யும் கம்யூட்டர் தொழிலுக்கும் இந்த இரண்டு நிறுவனங்களுக்கும் எந்த சம்பந்தமும் இருப்பதாகத் தெரியவில்லை
கம்ப்யூட்டர் தொழிலில் கொடிகட்டிப் பறந்து லாபம் ஈட்டிய பணத்தை செலவு செய்யாமல் இருப்பில் வைத்திருந்தார்கள் சத்யம் மேலாளர்கள். இந்த இரண்டு நிறுவனங்களையும் வாங்கினால் சத்யம் சேமித்து வைத்திருக்கும், முதலீட்டாளர்களுக்கு நியாயமாகச் சேர வேண்டிய லாபப் பணம், ராமலிங்க ராஜூவின் குடும்பத்தினரைப் போய்ச் சேரும். சத்யம் கம்ப்யூட்டர்ஸ் நிறுவனம் இதற்காகக் கடன் வாங்கத் தேவையிருக்கும்
இவ்வளவும் தெரிந்திருக்க வேண்டிய 'போர்டு' உறுப்பினர்கள் எப்படி இந்த முடிவுக்கு எதிர்ப்புத் தெரிவிக்கவில்லை? அவர்களுக்குப் போதிய சுதந்திரம் சத்யம் நிறுவனத்தால் வழங்கப் பட்டதா?
ஐ டி தொழில் செய்யத்தான் உங்களுக்குப் பணம் கொடுத்தோம். சம்பந்தமில்லாத தொழிலில் இறங்கும் முன் முதலீட்டாளர்களான எங்களை ஒரு வார்த்தை கேட்டிருக்க வேண்டும்

ஆகியவை முதலீட்டாளர்கள் முன் வைக்கும் வாதங்கள். நியாயமான வாதங்கள்!!

ராமலிங்க ராஜூ 'சத்யம் முதலீட்டாளர்கள் உணர்ச்சிகளை மதித்து நிறுவனங்களை வாங்கும் முயற்சியைக் கை விட்டு விட்டது' என்று அறிவித்திருக்கிறார்.

சந்தையில் மிகுந்த மதிப்பை ஈட்டியிருந்த சத்யம் நிறுவனர்கள் ஒரே நாளில் 420 ரேஞ்சிற்குத் தள்ளப் பட்டு விட்டார்கள். மீளுவது கடினம் என்றுதான் தோன்றுகிறது.

ஓபெக் நாடுகள் எண்ணெய் உற்பத்தியைக் குறைப்பது சரியா?

2008-12-17T18:43:00.000-08:00

நேற்று முழுவதும் பத்திரிக்கை மற்றும் தொலைக்காட்சி ஊடகங்களில் 'எண்ணெய் கூட்டாளிகள் சதி!! உற்பத்தியைக் குறைக்கத் திட்டம்? எண்ணெய் விலை திரும்பவும் உயரப் போகிறது !!!' என்ற கூச்சல்.

பீப்பாய்க்கு $147 ஐ தொட்ட எண்ணெய் விலை இன்று $43 இல் வந்து நிற்கிறது. இந்த விலை குறைவிற்கு முக்கியக் காரணம் சந்தையில் எண்ணெய் வாங்குபவர்கள் தேவை குறைந்திருப்பதால்தான். தேவை குறைவதற்கு நாம் யூகிக்கக் கூடிய காரணங்கள் இரண்டு

விலை ஏறிய போது இன்னமும் ஏறப் போகிறது என்று மேலதிக விலை கொடுத்து தேவைக்கு அதிகமாக வாங்கிப் பதுக்கியவர்கள், சேமிப்பில் இருக்கும் உபரி எண்ணெயை உபயோகிக்கிறார்கள்
வளர்ந்த நாடுகள் பொருளாதாரச் சரிவையும், வளரும் நாடுகள் பொருளாதார வளர்ச்சித் தேக்கத்தையும் சந்ந்தித்து வருவதால், முன்னேற்பாடாக பல தொழில் துறைத் தலைவர்கள் இடுப்பு நாடாவை இறுக்கிக் கட்டிக் கொண்டு விட்டனர். இவர்கள் உற்பத்தியைக் குறைத்ததால் எரிபொருள் தேவையும் குறைந்து விட்டது

ஆகவே சந்தையில் எரிபொருளுக்கான தேவை விலையை நிர்ணயிக்கிறது. தேவையற்ற எண்ணெயை சேமித்துக் காக்க வேண்டியது ஓபெக் நாடுகளுக்கு மேலும் சுமை.

பொருளாதாரச் சரிவுகளில் இருந்து உலகம் மீள ஆறு காலண்டுகளுக்கு மேலும் ஆகக் கூடும் என்று தெரிகிறது. ஆக உற்பத்தியைக் குறைப்பதில் நியாயங்கள் இருப்பது நமக்குப் புலப்படுகிறது.

அமெரிக்காவில் கார் தயாரிப்பு துறைக்கு ஆபத்து ?

2008-12-07T07:55:00.000-08:00

ஜி.எம், ஃபோர்ட், க்ரைஸ்லர் இவை மூன்றும் டெட்ராய்ட் நகரின் பெரிய கார் தயாரிப்பு நிறுவனங்கள். பொருளாதாரச் சரிவினால் பாதிக்கப் பட்டு திவாலாகும் நிலையில் இருக்கிறோம்.. எங்களுக்கும் வங்கிகளுக்குக் கொடுத்தது போல நிவாரணம் தேவை.. என்று மூன்று நிறுவனங்களின் தலைவர்களும் அமெரிக்க அரசிடம் சில வாரங்களாகவே கோரிக்கை எழுப்பிக் கொண்டிருக்கிறார்கள்.

இந்த நிறுவனங்கள் திவாலானால் சுமார் 30 லட்சம் அமெரிக்கர்கள் வேலை இழப்பார்கள் என்று தெரிகிறது. ஏற்கெனவே, சமீபத்திய பொருளாதாரச் சரிவினால், பார்க்கக் கூடிய ஒவ்வொரு 14 பேரில் ஒருவருக்கு வேலை இருக்காது என்ற நிலை அமெரிக்காவில் ஏற்பட்டு விட்டது. கார் நிறுவனங்கள் திவாலானால் வேலையில்லாத் திண்டாட்டம் இன்னமும் படு மோசமாகும். பொருளாதாரம் இன்னமும் ஆழமாகச் சரியும்.

ஆனால் அமெரிக்கர்களில் ஒரு பகுதியினர், இந்தத் தலைவர்கள் மேல் அதீதக் கோபம் கொண்டிருக்கிறார்கள். அதற்கு காரணமாக அவர்கள் சொல்லுபவை:

30 பில்லியன் டாலர் நிவாரணத்தை வாங்கிக் கொண்டு இன்னமும் பல தொழிலாளிகளை வேலையை விட்டுத் தூக்கப் போவதைப் பற்றித்தான் இந்தத் தலைவர்கள் பேசுகிறார்கள். ஆக இந்த நிவாரணம் தொழிலாளிகளின் நன்மைக்குப் போய்ச் சேரப் போவதில்லை
இந்தத் தலைவர்களின் பொறுப்பற்ற தனம் அவர்கள் நடவடிக்கைகளில் தெரிகிறது. இன்னமும் ஆடம்பரமாக உடுத்திக் கொண்டு தனி விமானத்தில் பறந்து திரியும் அவர்கள் தத்தம் நிறுவனங்களின் இன்றைய நிதி நிலைக்கு ஏற்றவாறு நடந்து கொள்ளவில்லை
வரிப்பணத்தில் கிடைக்கும் நிவாரணத்தை வைத்துக் கொண்டு இன்னமும் எரிபொருள் சிக்கனம் இல்லாத கார்களை தயாரிக்க அவர்களை அனுமதிக்கக் கூடாது
திறமையில்லாமல் நிறுவனத்தை நடத்தி திவாலாக்கும் நிலைக்குக் கொண்டு வந்து விட்ட இவர்களை மாற்றாமல் நிவாரணம் கொடுப்பது முட்டாள்தனம்

என்ற வாதங்கள் பலமாக எழுகின்றன.

இந்த நிறுவன ஊழியர்களிடம் கேட்டால் அவர்கள் என்ன சொல்லுகிறாகள் தெரியுமா?

இந்தத் தொழில்கள் திவாலானால் அமெரிக்காவில் கார் தயாரிப்பது என்பதே இல்லாமல் போகும்
சிரம காலங்களில் எங்களை துப்பாக்கி, பீரங்கிகள் மற்றும் விமான இஞ்ஜின்கள் தயாரிக்கவும் பணித்தார்கள். இப்போது நாங்கள் போய்விட்டால் அமெரிக்காவிற்கு இந்த அத்தியாவசியச் சேவைகளை யார் செய்து கொடுப்பார்கள்?
பல குடும்பங்களில் பணிக்குச் செல்லக் கூடிய அனைவரும் கார் தொழிலில்தான் இருக்கிறார்கள். அனைவருக்கும் வேலை போனால் ஒருவருக்கு ஒருவர் ஆதரவாக இருக்கக் கூட வக்கில்லாமல் அனைவரும் நடுத்தெருவுக்கு வர வேண்டியதுதான்
திடீரென்று எங்களைச் சோம்பேறிகள் போலச் சித்தரிக்கிறார்கள். ஒரு மணி நேரம் எங்கள் தொழிற்சாலைக்கு வந்தால் எங்கள் சிரமம் புரியும்
சந்தர்ப்பம் கிடைத்ததென்று எங்கள் தலைவர்களை மிகவும் கேவலமாக காங்கிரஸ் நடத்துகிறது. அவர்களை நாங்கள் பெரிதும் மதிக்கிறோம். எங்கள் நிறுவனங்களில் பணி செய்வதை நாங்கள் மிகவும் பெருமையாக நினைக்கிறோம்

என்றெல்லாம் பொருமித் தள்ளியிருக்கிறார்கள்.

எது எப்படியோ. கார் கண்டுபிடித்து, தனிமனிதன் ஒவ்வொருவருக்கும் கார் கனவை ஊட்டி வளர்த்த அமெரிக்காவிற்கு இந்த நிலை சற்றுப் பரிதாபம்தான்.

மக்கேய்னின் அதிகப் பிரசங்கம் (??)

2008-12-07T06:42:00.000-08:00

மனிதர் இன்று பாகிஸ்தானில் உட்கார்ந்து கொண்டு "மும்பைத் தீவிரவாதத்திற்கு மூலகாரணமாக இருந்தவர்கள் மேல் பாகிஸ்தான் உடனடி நடவடிக்கை எடுக்கவில்லை என்றால் இந்தியா பாகிஸ்தான் மேல் விமானப் படையை ஏவுவதை யாரும் தடுக்க முடியாது" என்று அந்தத் தலைவர்களிடம் பேசிக் கொண்டிருக்கிறார். மேலும், "மன்மோகனைப் பார்த்துப் பேசினேன். அவர் மிகவும் கோபமாக இருக்கிறார்" (ஒருவேளை கிண்டல் தொனியில் சொல்லியிருப்பாரோ?!) என்றும் சொல்லியிருக்கிறார்.

இந்தியத் தலைகள் இப்படிப் பேசியதாக இதுவரை நான் கேள்விப்படவில்லை. தீவிரவாதத்தில் பாகிஸ்தானுக்கு பங்கு இருப்பதற்கு ஆதாரங்கள் உள்ளன என்றுதான் எல்லோரும் அலறிக் கொண்டிருக்கிறார்கள்.

நம் தலைவர்கள் படை பலத்தை உபயோகிப்பதைப் பற்றி இப்படி வெளிப்படையாகப் பேசாத பட்சத்தில் மக்கெய்ன் செய்வது அதிகப் பிரசங்கம். தனது போர்ச் சிந்தனைகளை இந்தியாவின் மேல் திணிக்க அவருக்கு உரிமை இல்லை. அவரது வயதுக்கு மதிப்புக் கொடுக்க விரும்பும் நாம் அவர் பேச்சை கண்டிக்கவும் தவறமாட்டோம்.

பிடிஐ செய்திச் சுட்டி (ஆங்கிலத்தில்)

வால் - ஈ (ஆங்கிலத் திரைப்படம்)

2008-12-07T05:09:00.000-08:00

குப்பை மற்றும் மாசு மிகுந்து போய் உயிர் வாழத் தகுதியற்ற உலகத்திலிருந்து அமெரிக்கர்கள் (கவனிக்கவும் - அமெரிக்கர்கள் மட்டும்) மாபெரும் விண்கலத்தில் கிளம்பி விடுகிறார்கள். 'வால்-ஈ' என்ற ரோபோக்களை உலகத்தை சுத்தப் படுத்த விட்டுச் செல்கிறார்கள். நிறைய 'வால்-ஈ' க்கள் வெயிலிலும் மழையிலும் புயலிலும் அடி பட்டு செயலிழந்து போகின்றன. ஒரு குட்டி வால்-ஈ (ஆண்) மட்டும் அதன் கரப்பான் பூச்சி நண்பனோடு தனது பணியைச் செய்து கொண்டிருக்கிறது.

700 வருடங்களுக்குப் பிறகு தாய்க்கலத்திலிருந்து 'ஈ-வா' என்ற (பெண்) ரோபோவை உலகில் உயிர்நிலை இருக்கிறதா. தாவரங்கள் ஏதாகினும் முளைத்து விட்டதா என்று பார்த்து வர அனுப்பி வைக்கிறார்கள். அது தேடியலைந்து கொண்டிருக்கும் போது 'வால்-ஈ' யை பார்க்கிறது. இருவரும் நண்பராகிறார்கள்.

வால்-ஈ குப்பைகளில் இருந்து அவ்வப்போது பொறுக்கிச் சேர்த்த சாமான்களில் ஒரு சிறு தாவரத்தையும் பத்திரப் படுத்தி வைத்திருக்கிறது. அதைப் பார்த்தவுடன் 'ஈ-வா' அதை வயிற்றுக்குள் வைத்துப் பூட்டிக் கொண்டு மந்திரித்து விட்ட மாதிரி மண் மேட்டின் மேல் போய் நின்று கொள்கிறது. செய்தி கிடைத்து, தாய்க்கலத்திலிருந்து அதைக் கூட்டி வர வாகனம் அனுப்புகிறார்கள்.

வால்-ஈ பதறிப் போய் 'ஈ-வா' வை தொடர்கிறேன் பேர்வழி என்று அந்த வாகனத்தின் வெளியே ஒட்டிக் கொண்டு, விண்வெளியில் சூரியனையும் கடந்து பயணித்து, தாய்க்கலத்திற்குப் போகிறது.

தாய்க்கலத்தின் கணினிதான் வில்லன். மனிதர்கள் திரும்ப உலகிற்குச் செல்லக் கூடாதென்று ஆணை வைத்துக் கொண்டு வில்லத்தனம் செய்கிறது. மனிதர்களெல்லாம் டிவி பார்த்து 'ஜேவ்' (சுஜாதா நினைவு வந்து விட்டதப்பா!) குடித்துக் கொண்டு அறிவிழந்து போய் கிடக்கிறார்கள் (அமெரிக்கர்களைத்தான் அப்படிக் காட்டினார்கள். தமிழனை அல்ல :) ). தாய்க் கப்பலின் தலைவர் மட்டும் ஆண்டவன் கிருபையால் சற்று மதியுடன் செயல் படுகிறார்.

பிறகு 'வால்-ஈ' யும் 'ஈ-வா' வும் எப்படி மனிதர்களை உலகிற்குத் திரும்பக் கொண்டு வர உதவுகின்றன என்பதுதான் கதை. 'ப்ர்ன் -ஈ' என்ற நகைச்சுவை ரோபோ பாத்திரத்தை அறிமுகம் மட்டும் செய்திருக்கிறார்கள். 'டிவிடி'யின் போனஸ் காட்சியில்தான் அதன் நகைச்சுவை காட்சியைக் காட்டியிருக்கிறார்கள்.

(Pixar) 'பிக்ஸார்' அவர்கள் (logo) 'லோகோ'விலேயே நம்மைச் சாய்த்து விட்டார்கள். படத்தில் விட்டு வைப்பார்களா? அருமையான முதல்தரமான 'அனிமேஷன்'. ஒலிப் பொறியாளரும் ஒரு கலக்கு கலக்கியிருக்கிறார்.

ஒட்டுமொத்தத்தில் 'வால்-ஈ'யின் பரம விசிறியாகி விட்டேன். 'வால்-ஈ 2' க்காக காத்திருக்கிறேன். கண்டிப்பாக வரும்.

இந்தியனே எழுந்து நில்!

2008-11-30T06:52:00.000-08:00

நடந்து முடிந்த மும்பைத் தீவிரவாதம் இந்திய வரலாற்றின் ஒரு கறுப்புப் பக்கம்.

இந்தியப் பாதுகாப்பை நம்பி வந்து உயிரை விட்ட அன்னிய நண்பர்களுக்கும்,

அவர்களை அதே நம்பிக்கையுடன் அனுப்பி வைத்த அன்னாரின் குடும்பத்திற்கும்,

குண்டடி பட்டு ரத்தம் சிந்தியும், விருந்தினரைக் காத்து நின்ற மேன்மை மிகு இந்திய எண்ணத்திற்கும்,

விஷப் பூச்சிகளை நசுக்கும் முயற்சியில் உயிரையே தியாகம் செய்த இந்திய வீரர்களுக்கும்,

எனது மேலான மரியாதையை செலுத்தி ...

அரசு இயந்திரங்களை இந்த வலிமிக்க பாடத்தின் மூலமாவது கற்றுக் கொள்ளச் சொல்லி மன்றாடிக் கேட்டு....

என்னுடன் சேர்ந்த நூறு கோடி இந்தியர்களில் அழிக்க முடியாத சுதந்திர உணர்வை பட்டொளி வீசிப் பறந்து காட்டும் என் தேசியக் கொடியுடன் எழுந்து நிற்கிறேன்.

வாரணம் ஆயிரம்

2008-11-30T05:03:00.000-08:00

அப்பா சென்டிமெண்ட் படம். அப்பாவைப் பெரிதும் மதிக்கும் என்னால் இந்தப் படத்தின் கருவுடன் 'கனெக்ட்' செய்ய இயலவில்லை.

படம் முதலிலிருந்து கடைசி வரை மிகவும் மெதுவாக நகர்கிறது. அப்பா செத்துப் போவதை தேவையில்லாமல் ரொம்ப நேரம் காட்டுகிறார்கள்.

சூர்யா இரட்டை வேடத்தில் குறிப்பிட்டுச் சொல்லும் படி இல்லாமல் எல்லா இடத்திலும் நன்றாக நடித்திருக்கிறார். சிம்ரன் அம்மா வேஷத்திற்குப் பொருத்தமாக் இருக்கிறார்.

ரயிலில் மேகனாவிடம் வழிவது, மேகனாவின் வீட்டுக்குப் போய் வழிவது - இந்தக் காட்சிகள் நன்கு படமாக்கப் பட்டிருக்கின்றன. இயல்பான நடிப்பு. புதிய தலைமுறை பெண்கள் 'காதலுக்கு' கொடுக்கும் சராசரி 'ரியாக்ஷன்' இதுதான் என்றால் இந்தத் தலைமுறையின் எதிர்நோக்குச் சிந்தனையைப் பாராட்டலாம்.

அமெரிக்கக் காட்சிகளில் படப்பிடிப்பு நன்றாக அமைந்திருந்தது. அதே போல அந்தக் காலத்து சென்னையை காட்டுவதை மிகக் குறைவாக செட் போட்டு காமிரா கோணங்களை வைத்தே முயன்று ஏறக்குறைய வெற்றியும் பெற்றிருக்கிறார்கள்.

வாரணம் ஆயிரம் என்று ஏன் பெயர் வைத்தார்கள் என்று படம் எடுத்தவர்களுக்கே புரியவில்லை போலும். கடைசிக் காட்சியில் சிம்ரனை விட்டு சப்பைக் கட்டு கட்டச் சொல்லி விட்டார்கள்.

'பில்ட் அப்' கொடுத்திருக்கும் அளவுக்கு சுவாரசியம் இல்லை. ரசிகர்கள் திரையரங்கில் நக்கலா பாரட்டா என்று புரியாத வகையில் படம் முழுவதும் கத்திக் கொண்டே இருந்தார்கள்.

குருத்துத் திசுள் ஆராய்ச்சியில் புதிய சாதனை

2008-11-30T04:33:00.000-08:00

உலகில முதல் முறையாக நுரையீரலுக்குள் புகும் காற்றுக் குழாயை குருத்துத் திசுள் மூலம் பரிசோதனைச் சாலையில் வடிவமைத்து ஒரு பெண்மணிக்கு வெற்றிகரமாகப் பொருத்தி விட்டார்கள். பெண்மணி நலமாயிருக்கிறார்.

க்ளாடியா காஸ்டில்லோ என்ற 30 வயது பெண்மணி கொலம்பியாவில் பிறந்தவர். தற்போது பார்ஸிலோனாவில் வாழ்ந்து வருகிறார். இவருக்கு காச நோயால் காற்றுக் குழாய் பாதிக்கப் பட்டு நுரையீரலில் சேருமிடத்தில் சுருங்கி இற்றுப் போய் விட்டது. இதனால் இவரால் படியேற முடியவில்லை. வீட்டு வேலைகள் பலவற்றை செய்ய இயலவில்லை. சில மருத்துவர்கள் இவரது ஒரு நுரையீரலை முழுவதும் நீக்கி விட வேண்டும் என்று யோசனை சொன்னார்கள்.

க்ளாடியா துணிகரமான ஒரு காரியத்துக்கு ஒத்துக் கொண்டார். அவரது காற்றுக் குழாயில் ஒரு பாகத்தையும், எலும்புமச்சையில் (bone marrow) இருந்து குருத்துத் திசுள்களையும் ஆராய்ச்சி சாலைக்குக் கொடுத்தார். இந்த உடல் பாகங்களைக் கொண்டு பிரிட்டன், இத்தாலி மற்றும் ஸ்பெயின் நாடுகளைச் சேர்ந்த சூரப் புலி மருத்துவர்கள் அவரது காற்றுக் குழாயை சோதனைச் சாலையில் வளர்த்து அவருக்கு வெற்றிகரமாகப் பொருத்தி விட்டார்கள்.

இப்போது க்ளாடியா நடனம் கூட ஆடுகிறாராம். இவரது உடல் பாகங்களைக் கொண்டு செய்த திசுக்கள் என்பதால், ஒவ்வாமை ஏற்பட சாத்தியங்கள் மிகக் குறைவு. சாதாரணமாக வெளியிலிருந்து உடல் பாகம் பொருத்தப் படும் போது ஒவ்வாமையால் உடல் அந்தப் பாகத்தை எதிர்த்து அழித்து விட முனையும். இதைத் தடுக்க வாழ்நாள் முழுவதும் தானம் பெற்றவர் சக்தி மிக்க மருந்துகள் பலவற்றை விழுங்கிக் கொண்டிருப்பது மருத்துவ அவசியம். க்ளாடியாவிற்கு இந்தப் பிரச்சினை எதுவும் இல்லாமல் ஜாலியாக இருப்பதாகக் கேள்வி.

இந்த சிகிச்சை முறை இன்னமும் பரிசோதனைச் சாலையில்தான் உள்ளது. அத்துடன் இல்லாமல் இந்த சிகிச்சைக்கு ஆகும் செலவும் மிகவும் அதிகம். சராசரி மனிதருக்கு எட்டாக் கனிதான். க்ளாடியா இந்த விஷயத்தில் உலகின் முதல் பரிசோதனைப் பெண். முடிவு தெரியும் வரை கொஞ்சம் உதைப்பாகத்தான் இருந்தது என்று கூறியிருக்கிறார்.

'ரிஸ்க் எடுப்பதை ரஸ்க்கு சாப்பிடுவது' போல் செய்திருக்கும் க்ளாடியாவையும், முனைந்து பரிசோதனையில் வெற்றிபெற்ற மருத்துவர்களையும் முந்திரி பக்கோடா சாப்பிட்டுக் கொண்டே நாம் பாராட்டுவோம். மருத்துவத் தொழில் நுட்ப முன்னேற்றத்திற்கு நல்லது செய்திருக்கிறார்கள்.

http://www.timesonline.co.uk/tol/life_and_style/health/article5183686.ece

பராக் ஒபாமா

2008-11-08T05:51:00.000-08:00

ஆப்பிரிக்க அமெரிக்க மூலத்தைக் கொண்டிருக்கும் ஒரு மனிதர் 'வண்ணமுள்ளவர்கள்' என்று மற்றவர்களைச் சித்தரிக்கும் (இதுவரை) வண்ணமில்லா மனப்பான்மை கொண்டிருந்த ஒரு தேசத்தின் அதிபராகிறார். இவருக்கு அபரிமிதமான வெற்றியைப் பெற்றுத் தந்திருப்பவர்கள் அமெரிக்காவின் இளம் தலைமுறையினரே. அமெரிக்கப் பெரிசுகளெல்லாம் பெருமளவில் மக்கெயினிற்கு ஓட்டுப் போட்டு இளம் தலைமுறையின் முற்போக்கு மனப்பான்மையிடம் தோற்றுப் போய் விட்டார்கள்.

புதிய அமெரிக்க அதிபர் பராக் ஒபாமா பதவியேற்றவுடன் சந்திக்க வேண்டிய பெரும் பொறுப்புகள் பல:

சரிவின் பிடியில் வீழ்ந்து விட்ட அமெரிக்க பொருளாதாரம்

உயர்ந்து கொண்டே போகும் தேசியக் கடன் சுமையை எப்படி மற்றும் எத்துணைக் காலத்தில் குறைக்கப் போகிறார் ?
700 பில்லியன் டாலர் அளவில் வரிப் பணத்தைக் கொண்டு வங்கிகளை சீர்நிறுத்தும் பணியில் அந்த வரிப் பணம் சரியாகச் செலவிடப் படுகிறதா என்பதை எப்படி கட்டுப் படுத்தப் போகிறார்?
அதிபர் புஷ் அவரது காலத்தில் அறிவித்த வரிச் சலுகைகள் முடிவுக்கு வரும் காலம் நெருங்கிக் கொண்டிருக்கிறது. வரிச் சலுகைகள் வரும் பதவிக் காலத்தில் விலக்கிக் கொள்ளப் படுமா?
அமெரிக்கர்களின் சராசரிச் சம்பளம் சில வருடங்களாகத் தேங்கிக் கிடக்கிறது. இதை எப்படிக் கையாளப் போகிறார்?
பணம் படைத்தவர்களுக்கும் அது பணமில்லாதவர்களுக்கும் உள்ள விரிசல் அகண்டு கொண்டே போகிறது. இதை எப்படிக் குறைக்கப் போகிறார்?

தடையற்ற வர்த்தகம் பற்றிய கொள்கைகள்

வங்கிகள் மேலும் தேசிய மயமாக்கப் படுமா அல்லது தற்போதைய சுதந்திரங்கள் தொடருமா?
அமெரிக்கத் தொழிலாளர்களை அச்சப் படுத்தும் மற்ற நாடுகளுடனான வர்த்தக உடன்பாடுகள் தொடருமா?

எந்த யுத்தம் முக்கியமானது?

ஈராக்கில் 525 பில்லியன் டாலர்களையும், ஆஃப்கானிஸ்தானில் 140 பில்லியன் டாலர்களையும் செலவழித்தாகி விட்டது. ஈராக்கில் 4000 அமெரிக்கர்கள் செத்துப் போயிருக்கின்றனர். ஆஃப்கானிஸ்தானில் சுமார் 600 அமெரிக்கர்கள் உயிரை விட்டிருக்கின்றனர். 9/11 சமயத்தில் யுத்தத்திற்கு இருந்த அமெரிக்க ஆதரவு ஏகத்திற்குக் குறைந்து விட்டது.
ஈராக்கில் இருந்து இப்போது வெளியேறினால் அங்கு உள்நாட்டுக் கலகம் வருமா? அப்படி வந்தால் அதற்கு யார் பொறுப்பு?
இன்னமும் யுத்தத்தைத் தொடர்ந்தால் அமெரிக்கா தற்காப்பிற்காக கடற்படை, விமானப்படை மற்றும் ஏவுகணைத் திறன்களை அதிகரிக்கும் வேகம் மட்டுப் படும், எது சரியான முடிவு?

இதைத் தவிர மேலும் பூதாகாரமான பல பிரச்சினைகள் பராக் ஒபாமாவை எதிர்நோக்கியுள்ளன.

அமெரிக்கர்களுக்கு கல்வி மேல் உள்ள ஈடுபாடு குறைந்து கொண்டே போகிறது. படிக்கத் தெரிந்த அமெரிக்க சிறுவர்கள் எண்ணிக்கை நாளுக்கு நாள் குறைந்து கொண்டே போகிறது. பணமில்லாமல் கல்லூரிப் படிப்பை பாதியில் தொலைத்து விடும் மாணவர்கள் பலர்
அமெரிக்காவின் சமூக மதிப்புகள் தேய்ந்து கொண்டே போகின்றன. வளர்ந்து வரும் ஓரினத் திருமணங்கள், துப்பாக்கிக் கலாச்சாரம் முதலியவை உதாரணங்கள்
9/11 சம்பவத்திற்குப் பிறகு 'நாமார்க்கும் குடியல்லோம், நமனை அஞ்சோம்' என்றிருந்த அமெரிக்க மனப்பான்மை, தங்களைச் சுற்றி பெரிய வேலிகளை அமைத்துத் தற்காத்துக் கொள்வதை முதன்மையாகக் கருதும் உணர்ச்சிபூர்வமான, தற்காப்பு மனப்பான்மையாக மாறிவிட்டது. இதனால் புது தொழில் நுட்பங்களை கண்டுபிடிக்கும் போக்கு, அந்தத் தொழில் நுட்பங்களை சந்தைக்குக் கொண்டு வரும் வேகம் முதலியன மட்டுப் பட்டிருக்கின்றன. சில விஷயங்களில் மற்ற நாடுகள் அமெரிக்காவை முந்த ஆரம்பித்து விட்டனர்
வீடு, கார், தொலைக்காட்சி, கணினி என்று சாதனங்களை சுற்றி அமைத்துக் கொண்டு வாழ்வில் மகிழ்ச்சியைத் தேடி வரும் அமெரிக்களின் வாழ்க்கை முறையில் எரிபொருள் மற்றும் சக்திச் சிக்கனத்தை முக்கியமாக கருதுவதை ஒரு அங்கமாக்குவது எப்படி?
பணக்கார நாடான போதிலும் அமெரிக்காவில் அனைவருக்கும் மருத்துவ வசதி என்பது குதிரைக் கொம்புதான். இதைப் பற்றிப் பேசப் போன ஒபாமாவை முதலாளித்துவத்தின் எதிரி, சோஷலிஸ்ட் என்றெல்லாம் சித்தரித்தார்கள்

அமெரிக்க மக்களை தன் கருத்து, சிந்தனை மற்றும் உணர்வுகளால் கவர்ந்த ஒபாமா முன் அனுபவமில்லாதவர் என்பதே உண்மை. எப்படி சமாளிக்கப் போகிறார் என்று காலம் பதில் சொல்லும். 'நம்பிக்கையின் பிடிவாதம்' என்று புத்தகம் எழுதியிருக்கும் இந்த உலகத் தலைவர் மேல் நம்பிக்கை வைப்போம்.

ஹல்லோவ்வீனும் பங்குச் சந்தையும்

2008-11-02T05:08:00.000-08:00

ஹல்லோவீன் இரவில் அமெரிக்காவில் குழந்தைகள் திகிலூட்டும் வேஷம் அணிந்து வீடு வீடாகச் சென்று கதவைத் தட்டுவார்கள். அமெரிக்கர்களும் திகிலில் ஆழ்ந்ததாக நடித்து விட்டு குழந்தைகளுக்கு இனிப்புக் கொடுத்து மகிழ்வார்கள். ஒரு குறும்புக்காரர் பங்குச் சந்தையை இதில் இணைத்து விளையாடியிருப்பதைப் படத்தில் காணலாம்.

நன்றி: டைம்ஸ் பத்திரிகை

அரவிந்த் அடிகாவின் 'ஒயிட் டைகர்'

2008-11-02T04:49:00.000-08:00

சென்னையில் 1974 இல் பிறந்து ஆஸ்திரேலியா, அமெரிக்கா, யூ.கே முதலிய நாடுகளில் வளர்ந்து, தற்போது மும்பையில் வசித்து வரும் அரவிந்த் அடிகாவின் 'ஒயிட் டைகர்' நாவல் 2008 ஆம் ஆண்டிற்கான புக்கர் பரிசு பெற்றிருக்கிறது. தற்போது வாசித்துக் கொண்டிருக்கிறேன்.

இந்தப் படைப்பில் முதலில் கருத்தைக் கவர்வது, பிகாரில் ஏதோ ஒரு கிராமத்தில் பிறந்து ஏழ்மையில் வளர்ந்து அரைகுறையாய் படித்த ஒரு (அரவிந்த் அடிகாவின் கருத்துப் படி) அரைவேக்காட்டு இந்தியனின் மனப்பான்மையையும் கண்ணோட்டத்தையும் நாகரிக உலகில் வளர்ந்த ஒரு படித்த மனிதன் வெளிப்படுத்தியிருக்கும் துல்லியம்.

இரண்டாவது, கதையைச் செலுத்தியிருக்கும் எளிய நடை. மூன்றாவதாகப் பிடித்த விஷயம், மேலும் மேலும் படிக்கத் தூண்டும் வகையில் கதையைச் செலுத்தியிருக்கும் உயிருள்ள நடை.

இந்தக் கதையை சீன அதிபருக்குக் கடிதம் எழுதுவது போல ஏன் சொல்ல வேண்டும் என்பது பாதிப் புத்தகம் வந்திருக்கும் எனக்கு இன்னமும் புரியவில்லை. ஆனால் ஒரு இளக்காரத்துடனே ஆரம்பிக்கும் சீன அதிபருக்கான மரியாதை அத்தியாயத்திற்கு அத்தியாயம் தேய்ந்து கொண்டே போகிறது.

இந்தியாவில் கங்கையைச் சுற்றியுள்ளதெல்லாம் இருட்டு, கடல் சார்ந்த இடமெல்லாம் வெளிச்சம் என்று இவர் கூறியிருக்கும் கருத்து ஒத்துக் கொள்ளக் கூடியதாக இல்லை. இருந்தாலும் இந்தக் கண்ணோட்டமும் ஒரு அரை வேக்காட்டு இந்தியனுடையதுதான், அரவிந்த் அடிகாவுடையது இல்லை என்று அவர் தப்பித்துக் கொள்ளலாம்.

இவர் பிகாரின் ஏழ்மை மற்றும் தரித்திரத்தை சித்தரித்திருக்கும் விதம் உண்மைக்கு சற்று புறம்பாக இருக்கிறது என்று அறிந்தவர் தெரிந்தவர்கள் ஏற்கெனவே கருத்துத் தெரிவித்திருக்கிறார்கள்.

இந்தியாவின் சாதிப் பிரச்சினை, படிப்பறிவித்தலில் அரசு காட்டும் அலட்சியம், ஊழல், சோஷலிஸம் என்ற பெயரில் அரசியல்வாதிகளின் அட்டகாசம், நிலச் சுவான் தாரர்கள் ஏழைகளின் உழைப்பை உறிஞ்சும் கொடுமை முதலியவை இந்தக் கதையில் உணர்ச்சியுடன் சித்தரிக்கப் பட்டுள்ளன.

ஒன்று நிச்சயம். இந்தக் கதையைப் படிக்கும் எந்த வெளிநாட்டவனுக்கும் சராசரி இந்தியன் நம்பிக்கைக்குப் பாத்திரமானவன் அல்லன் என்ற எண்ணம் கண்டிப்பாக வரும். இது கண்டிப்பாக ஒரு ஆரோக்கியமான மற்றும் உண்மையான கண்ணோட்டம் இல்லை என்பது என் கருத்து.

மிகவும் பிடித்த சமீபத்திய கேலிச் சித்திரங்கள்

2008-10-16T08:16:00.000-07:00

நன்றி: எகனாமிஸ்ட்

நன்றி: ஹிந்து

நன்றி: எகனாமிஸ்ட்

தமிழ் விக்கியில் எனது புதிய பங்களிப்பு

2008-10-11T05:49:00.001-07:00

ஒருங்கிணைந்த செய்திப் பாதை மேலாண்மைச் செயலாற்றல்கள் என்ற தலைப்பில் ஒரு புதிய பக்கத்தை தமிழ் விக்கியில் பதிந்திருக்கிறேன். இணைய தொழில்நுட்ப ஆர்வலர்கள் படித்து அதை மேம்படுத்த உதவலாம். நன்றி

இந்தியாவில் பணப் புழக்கம் (Liquidity) நெருக்கடியில் உள்ளதா?

2008-10-10T21:36:00.000-07:00

ஆம் என்றுதான் சொல்ல வேண்டியிருக்கிறது.

மத்திய ரிசர்வ் வங்கி சில மாதத்திற்கு முன்பு பணப் வீக்கத்தைக் கட்டுப் படுத்துகிறேன் பேர்வழி என்று புழக்கத்தைக் கட்டுக்குள் கொண்டு வந்தார்கள். கட்டுப்பாடுகளை இப்போழுதுதான் தளர்த்த ஆரம்பித்திருக்கிறார்கள்.

அரசுக்கு வரி முன்பணம் கட்டவேண்டிய தவணை கட்டாயத்தால் நிறுவனங்கள் பணத்தை அதற்காக நிறுத்தி வைத்திருக்கிறார்கள்.

நமக்கு எண்ணெய் விற்பவன் ஒரு மடங்கிற்கு இரு மடங்காக பீப்பாய் விலையை காரணமில்லாமல் உயர்த்தி எக்கச் சக்கப் பணத்தை சுரண்டிக் கொண்டு போய் விட்டான்.

வங்கிகளில் பணம் போட்டவர்களெல்லாம், அமெரிக்க வங்கிகள் பற்றிப் பத்திரிக்கைச் செய்தி பார்த்தவரும் அடுத்தவர் சொல் கேட்டவரும், அலறி அடித்துக் கொண்டு தங்கள் வங்கிச் சேமிப்புக்களை வேறு பத்திரமான இடம் சேர்க்கிறார்கள். தங்கத்தின் விலை உயருவதைப் பார்க்கும் போது பெரும் பணம் அங்கே முடங்குவது புலப்படுகிறது.

வங்கிகளில் வைப்புக் குறைந்தால் அவர்கள் கடன் கொடுக்கக் கூடிய திறனும் குறையும். தம்மிடம் இருக்கும் வைப்பில் சுமார் 60 சதம் வரையே அவர்களால் கடன் கொடுக்க முடியும். ஆகவே பணப் புழக்க நெருக்கடி இந்தியாவில் இருக்கவே செய்கிறது.

மின் பற்றாக்குறை இருக்கும் நாட்டில் பணப் பற்றாக் குறையும் சேர்ந்து கொண்டிருக்கும் வேளையில் நிதி அமைச்சர் பொருளாதாரம் கண்டிப்பாக 8 சதவிகிதத்திற்கும் மேல் வளரும் என்று இன்னமும் படம் காட்டுகிறார்.

இன்று படித்த சுவையான செய்திகள் என்னவென்றால்:

எண்ணை விற்பவன் உலகத்தாரிடம் சுரண்டிக் கொண்டு போன பணத்தை அமெரிக்கன் நச்சு வீட்டு மனை கடன் அடகுப் பத்திரம் விற்று அடித்துப் போய் விட்டான். கச்சா எண்ணையையும் எக்கச் சக்கமாக சேமித்துக் கொண்டிருக்கிறான் அமெரிக்கன்.

நம் நாட்டில் ரிசர்வ் வங்கியின் கட்டுப்பாட்டில் வங்கிகள் இருப்பதால் ஓரளவு அவற்றின் ஆரோக்கியம் பாதுகாக்கப் பட்டிருக்கிறது.

இதையும் மீறி நச்சுப் பத்திரச் சந்தையில் நம் ஓரிரு வங்கிகள் தலையைக் கொடுத்திருப்பதாக செய்தி அடிபட்ட வண்ணம் இருக்கிறது. கில்லாடிகள்!!

நம்மூரில் வங்கிகள் ஒரு ரூபாய் வைப்புக்கு சுமார் 60 பைசா அளவில் ரொட்டேஷனில் (கடன்) விட்டுப் பணம் சம்பாதிக்கிறார்கள் என்றால் அமெரிக்காவில் ஒரு டாலருக்கு 98 சென்டுகளையும் ஐரோப்பாவில் ஒரு யூரோவிற்கு 1.4 யூரோக்களையும் ரொட்டேஷனில் விடுகிறார்களாம். முதலாளித்துவம் வாழ்கிறது.

"உள்ளதற்கே பணம் இல்லை இதில் இந்தியப் பங்குச் சந்தை முதலீடு ஒரு கேடா" என்று வீட்டுக்குப் போனால் பெண்டாட்டி இடிக்கிறாளாம்!?அதனால் வெளிநாட்டு முதலீட்டாளர்களெல்லாம் இந்தியப் பங்குச் சந்தையை விட்டு வெளியேறிக் கொண்டேயிருக்கிறார்கள். டாலரின் தேவை வெகுவாக ஏறிப் போய் இந்திய ரூபாய் மதிப்பில் ரூ 50 ஐ ஏறக்குறையத் தொட்டுவிட்டது.

அட இது நம்மூர் ரயிலாம் அண்ணாச்சி!

2008-10-10T20:41:00.000-07:00

மதிப்பிற்குறிய நம் பிரதமர் இந்த பள பள நவீன ரயிலை ஸ்ரீநகர் நெளகாம் ரயில் நிலையத்தில் இன்று கொடியசைத்துத் துவக்கி வைக்கிறாராம். இது அந்தப் பள்ளத்தாக்கின் முதல் ரயில் சேவையாம்.

வெளிநாடுகளில் இப்படியான ரயில்களைப் பார்த்து, இத்தகைய ஒரு இந்தியாவை எப்போது பார்ப்போம் என்று கண்ட கனவு இன்று பலிக்கப் போகிறது. மகிழ்ச்சி!!

சக்கரம் இல்லாமல் சாகசம்

2008-10-10T19:41:00.000-07:00

ஏர்பஸ் 320 ரக விமானம் ஒன்று நேற்று முன் தினம் மும்பையிலிருந்து டெல்லி செல்லும் போது ஒரு முன் சக்கரத்தை ஓடு தளத்திலேயே விட்டு விட்டுப் பறந்து போயிருக்கிறது. அடுத்தாற்போல ஓடுதளத்தை உபயோகித்த உஷாரான விமானி ஒருவர் சக்கரத்தைப் பார்த்து விட்டுத் தகவல் கொடுக்கவே பெரிய ஆபத்திலிருந்து முதல் விமானம் தப்பி விட்டது.

டில்லி வரை சாதரணமாகப் பறந்து சென்று, தரைஇறங்கு முன் கட்டுப்பாட்டு கோபுரத்தின் அருகே தாழப்பறந்து சக்கரம் இல்லை என்று உறுதிப் படுத்திக் கொண்டு பிறகு முன்னால் அமர்த்திருந்த பல பயணிகளை விமானத்தின் பின் புறத்தில் அமர்த்தி, பின் பாரத்தை அதிகப் படுத்தி, பொத்தினார் போல பத்திரமாக தரை இறக்கி விட்டார்கள்.

இதுவே முதல் முறை ஓடு தளத்தை தொடும் அளவிற்கு இறங்கியும் தரையைத் தொடாமல் மேலேறி சுமார் ஒரு மணி நேரம் பறந்த பின்னரே இரண்டாம் முறை தரையைத் தொட்டிருக்கிறார்கள்.

சுமார் 123 பயணிகளின் ஆயுசு கெட்டியாக இருந்திருக்கிறது. வேறு என்ன சொல்ல?

கூகிள் ப்ளாகரில் தமிழில் நேரடியாக எழுதலாம்

2008-10-05T02:32:00.000-07:00

இன்றுதான் இந்த புதிய (தமிழில் எழுதும்) அம்சத்தை பார்த்தேன். மைக்ரோசாப்ட் உலாவியுடன் சிறப்பாக வேலை செய்கிறது. கூகிள் (chrome) குரோம் உடன் வேலை செய்யவில்லை ?!? अगर किसी को पता है तो बोल दीजिये !!

தமிழ் வாழ்க!!

குடியிருக்க ஒரு குச்சு வீடு

2008-10-04T22:38:00.000-07:00

"எனக்கு குடியிருக்க ஒரு குச்சு வீடு மட்டும் கட்டித் தாருங்கள். வேறு எதுவும் வேண்டாம்" என்று என் தாயார் அடிக்கடி என் தந்தையிடம் சொல்வார். இது ஒவ்வொரு மனிதனின் சராசரிக் கனவு.

இந்தக் கனவைத் தவறாக உபயோகிக்கத் தங்களால் இயலும் என்று இப்போது அமெரிக்காவின் நிதித் துறைப் புலிகள் நிருபித்து விட்டார்கள். பலன்? ஏறக்குறைய 1 ட்ரில்லியன் டாலர் (4, 500,000 கோடி இந்திய ரூபாய்) அளவில் நட்டம். பல அமெரிக்கக் குடும்பங்கள் நடுத்தெருவிற்கு வந்து விட்டன. வங்கிகள் வராக் கடன் கணக்குப் பார்த்துக் கொண்டு, அத்தியாவசியத் தேவையான காரியங்களுக்கு கடன் கொடுக்க வக்கில்லாமல் கையைப் பிசைந்து கொண்டிருக்கின்றன. இது பல வருடங்களாக
வளர்க்கப் பட்ட ஒரு சோப்புக் குமிழி. இன்றுதான் உடைந்திருக்கிறது.

ஒரு மனிதனின் எதிர் கால வருமானத்தைக் கருத்தில் கொண்டு அவனுக்குக் கடன் கொடுக்கும் பழக்கம் உலகின் எல்லா மூலைகளிலும் நடக்கும் தினசரி நடப்பு. இதில் பல ஆபத்து இருக்கிறது.

இன்று இருக்கும் மனிதன் நாளை இருப்பான் என்பது உத்தரவாதமில்லை.
இன்று திடமான உடல் மற்றும் மூளைத்திறனுடன் வேலை செய்து சம்பாதிக்கும் மனிதன் நாளை நோயில் படுக்க மாட்டான் என்பதற்கு உத்தரவாதமில்லை.
மிக யோக்கியமாக நடந்து கடன் கேட்பவன் நாளை அயோக்கியத்தனமாக யோசிக்க மாட்டான் என்பதற்கு உத்தரவாதமில்லை.

பின் ஏன் வங்கிகள் கடன் கொடுக்கின்றன?

நாட்டில் பல உத்தமர்கள் இருக்கத்தான் செய்கிறார்கள்.
மனிதன் பொருள் சேர்த்துத்தான் சொத்து வாங்க வேண்டுமென்றால் கைக்குக் வாய்க்கும் போதுமாக (சிறு சேமிப்பு மட்டும் செய்யக் கூடிய வகையில்) சம்பாதிக்கும் பலர் கனவுடனே செத்துப் போவார்கள்.
பலருடைய சிறு சேமிப்பு, வங்கிகளில் தூங்குவதை விட நன்மக்கள் சிலருக்கு சொத்து சேர்க்க உபயோகப் பட்டால் நாட்டில் பொருளாதாரம் வளர்ந்து வேலை வாய்ப்புகள் பெருகி நாணயம் சக்தி கூடும்.

ஆக, கடன் கொடுக்கும் முன்னர் கடன் வாங்குபவனைப் பற்றித் தீர ஆராய்ந்து தகுதியுள்ளவனுக்குக் கொடுக்கும் வரை கடன் கொடுப்பது ஆகப் பலன் தரும் ஒரு பொருளாதார முற்போக்குச் செயல். மேலும், சொத்து வாங்கக் கடன் கொடுத்தால் சொத்தை அடகில் எடுத்துக் கொண்டுதான் எந்த வங்கியும் கடன் கொடுக்கும். கடன் முழுகிப் போனால் சொத்தை விற்று பணத்தை மீட்க முடியும்.

அமெரிக்காவில் இங்கேதான் பேராசையால் கோட்டை விட்டார்கள். எனக்குத் தெரிந்து சிலிக்கான் வேலி (Silicon Valley) பணத்தில் புழங்க ஆரம்பித்த போது கை மேல் காசு பார்த்த பலர் தங்கள் கனவை நனவாக்கிக் கொள்ள வீடு வாங்கினார்கள். வீடுகளுக்கான தேவை அதிகரித்து வீடு மற்றும் மனை விலைகள் கிடுகிடுவென உயர்ந்தன. இன்று வங்கி கடன் கொடுத்து அடகில் எடுக்கும் வீட்டின் மதிப்பு அடுத்த மாதம் பல மடங்கு உயர்ந்தது. இந்தப் போக்கு அதிகரித்துக் கொண்டே போனது. இதனால் வங்கிகளுக்குத் தைரியமும் பேராசையும் ஒரே நேரத்தில் வந்தது. அடகை விற்றுப் பணத்தை மீட்டுக் கொள்ளலாம் என்ற தைரியத்தில் தகுதியில்லாதவற்கும் கடன் கொடுக்க ஆரம்பித்தனர். சோப்புக் குமிழியைப் பெரிதாக ஊதினர்.

கடனில் ஆபத்து அதிகமானாலும் இந்த வங்கிகளின் அடகுகளை இரண்டாம் சந்தையில் வாங்கிக் கொள்ள அமெரிக்க அரசு சார்பு நிறுவனங்களான ஃப்ரெட்டி மாக் மற்றும் ஃபேனி மே முன் வந்தன. அரசு சார்ந்த நிறுவனங்களே ஆபத்துடன் விளையாட ஆரம்பித்தன.

ஆபத்து என்று எச்சரித்தவர்களைத் திட்டித் தள்ளினார்கள். விபரம் தெரியாதவர்கள் என்று எள்ளி நகையாடினார்கள். முதலாளித்துவம் புரியவில்லை என்று முகத்திலடித்தார்கள். இந்தப் பொறுப்பற்ற செய்கையால் வங்கிகளுக்குக் கடன் கொடுக்க மேலும் பணம் கிடைத்தது.

கடைசியில் ஒரு ட்ரில்லியன் டாலர் குமிழ், எதிர்பார்த்தவாறே உடைந்து போய் விட்டது. இதில் சுவாரசியமான விபரம் என்னவென்றால் இந்தக் குமிழில் பெரிதும் நிதி முதலீடு செய்திருப்போர், எண்ணை வளத்தை விற்றுக் காசாக்கியிருக்கும் அரேபியர்களும், அமெரிக்காவிற்கு சகாய விலை உற்பத்திக் கூடமாக விளங்கிய சீனர்களும்தான்.

அமெரிக்க வரிப்பணத்திலிருந்து இந்த உடைசலை நேர் செய்யப் போகிறார்கள். எந்த வகையில் செலவு செய்தால் பணம் எதிர் பார்த்த நிறைவைத் தரும் என்ற சொற்போர்கள் நடந்த வண்ணம் இருக்கின்றன.

இன்றைய சண்டே இண்டியனில் அரிந்தம் செளத்திரி தலைப்புப் பத்தி எழுதியிருக்கிறார். மகிழ்ச்சியான முதலாளித்துவம் என்பது ஒரு சமுதாயத்தின் 80 விழுக்காடு பொருளாதாரத்தைத் தம்மிடம் வைத்திருக்கும் 20 விழுக்காடு மனிதர்களின் பொருளாதார மேம்பாட்டைப் பற்றி யோசிப்பதல்ல, 20 விழுக்காகு நிதி ஆதாரத்துடன் வாழும் 80 விழுக்காடு மனிதர்களின் வாழ்வை மேம்படுத்துவதே. அதனால் நாடும் நாணயமும் வெகுவாக உயரும். சோப்புக் குமிழி ஊதிப் பணம் பண்ணும் சிலர் பேராசையால் சமூகம் சீரழிவது குறையும் என்பது அவர் கருத்து. எனக்குப் பிடித்திருந்தது.

தமிழகத்தில் குழந்தைகள் நாடாளுமன்றம்

2008-09-29T08:30:00.000-07:00

நாகர்கோவிலைச் சேர்ந்த அரசு சாரா அமைப்பு ஒன்று தமிழகத்தின் பல மாவட்டங்களைச் சேர்ந்த முப்பது குழந்தைகளைத் தேர்ந்தெடுத்து குழந்தைகள் நாடாளுமன்றம் ஒன்றைத் தொடங்கியிருக்கிறார்கள்.

தொழிலாளர்கள் நீதிமன்றத்தின் முதன்மை நீதிபதி தலைமையில் குழந்தைகள் நேற்று பதவிப் பிரமாணம் எடுத்துக் கொண்டனர்.

இந்த நாடாளுமன்றத்தில் முதலமைச்சர், இணை முதலமைச்சர், மற்றும் ஏனைய அமைச்சர்கள் உள்ளனராம். ஏற்கெனவே இந்தப் படை, சில மதுக்கடைகளை அவர்கள் முயற்சியால் மூட வைத்து விட்டார்களாம்.

இணை அமைச்சர் ஜீன்ஸ் அணிந்து அவைக்கு வந்தாராம், ஜீன்ஸ் அவை வரைமுறைக்கு ஏற்ற உடை இல்லை என்று தீர்மானம் போட்டு அவைக்கு ஏற்ற உடைகள் இன்னவைதாம் என்றும் தீர்மானம் போட்டு விட்டார்களாம்.

குழந்தைகள் சமூகப் பாடங்கள் மற்றும் அரசியலமைப்பைக் கற்றுக் கொள்ள இதை விட சிறந்த வழி தெரியவில்லை. யோசித்து செயல் படுத்தியிருப்பவர்களை பாராட்டியே தீர வேண்டியிருக்கிறது!

யானைக்கும் அடி சறுக்கும்

2008-07-26T03:24:00.000-07:00

போயிங் 747 ஜம்போ விமானம் உண்மையிலேயே மூக்கில் விரல் வைத்து வியக்கக் கூடிய தொழில் நுட்ப அற்புதம். அது டன் கணக்கில் பயணிகள், அவர்தம் உடமைகள் ஏற்றிக் கொண்டு தரையிலிருந்து மேலெழும்புவதும், கம்பீரமாக ஆட்டம் அசைவில்லாமல் பறப்பதும், பொத்தினாற் போல் தரையிறங்குவதும் பார்க்கப் பார்க்க அதிசயம்.

அவற்றில் ஒன்று நேற்று அடி வயிற்றில், வலது இறக்கைக்குக் கீழே கிழிந்து போய், விமான ஓட்டிகளின் திறமையால், 6000 மீட்டர் (சுமார் 20000 அடி) உயரத்தைச் சடுதியில் தொலைத்த விபரீதத்தில் இருந்து தப்பித்து, பத்திரமாகத் தரையிறக்கப் பட்டிருக்கிறது. பயணிகள் அனைவரும் ஒரு சிறு கீறல் கூட இல்லாமல் பிலிப்பைன்ஸ் நாட்டில் தரையிறங்கி விட்டனர்.

நாமெல்லாம் சென்னை வீதியில் ஆட்டோக்காரன் நம் காரில் கீறி விட்டு ஓடி விட்டால் இறங்கி வந்து கீறலை வெறிப்பதைப் போல விமானி அவரது 747 விமானத்தில் ஏற்பட்ட 'கீறலை' வேடிக்கை பார்ப்பதை படத்தில் காண்க ...

இத்தகைய திறமைக்கு நேர் எதிர் மாறாக நம் நாட்டில் நேற்று ஒரு போயிங் விமானத்தின் பின் கதவை சரியாக மூடாமல் பயணிகளை வைத்துக் கொண்டே வெள்ளோட்டம் பார்த்திருக்கிறார்கள்.

ஷில்பா ஷெட்டியின் அந்தர் பல்டி !!

2007-01-19T20:02:00.000-08:00

இன்று நாட்டை உலுக்கும் இரண்டு மிகப் பெரிய விவகாரங்களில் ஒன்று ஷில்பா விவகாரம். மூன்று கோடி ஒப்பந்தம் போட்டு லண்டனில் தொலைக்காட்சி நிகழ்ச்சிக்கு ஒப்பந்தம் போட்டுக் கொண்டு போனாராம். அங்கே நிகழ்ச்சியில் சக பங்கேற்பாளர்கள் சிலர் ஜேட் கு·டி என்பவர் தலைமையில் இன அடிப்படையில் இவரை அவமானப் படுத்தி விட்டார்களாம். நாடே கூச்சல் போட்டுக் கொண்டிருக்கிறது.

யோசித்துப் பார்த்தால் இந்தப் பிரச்சினையால் சிலருக்கு பலத்த ஆதாயம் இருக்கிறது

நிகழ்ச்சியை நடத்தும் நிறுவனத்திற்கு இலவச விளம்பரம்
குறுஞ்செய்தி (SMS) மற்றும் தொலைபேசி மூலம் வாக்கு சேகரிக்கும் நிகழ்ச்சியானதால் அதிக வாக்காளர்கள் பங்கேற்பதன் மூலம் ப்ரிட்டிஷ் தொலைபேசி நிறுவனங்கள் பூரிப்புடன் தத்தம் வங்கிகளுக்கு வருமானத்தை அள்ளிச் செல்வார்கள்
ஷில்பா ஷெட்டிக்குக் கிடைக்கக் கூடிய அனுதாப அலையால் அவர் நிகழ்ச்சி வாக்கெடுப்பில் கண்டபடி முன்னேற வாய்ப்பு. அதற்கு மேல் அவரைப் பற்றி உலகில் மேலும் பல பேருக்குத் தெரியப் போவதால் கிடைக்கக் கூடிய தனி நபர் ஆதாயம்
ஜேட் கு·டி ஒரு வாசனைத் திரவிய வியாபாரி. அவரது விற்பனைப் பொருளின் பெயர் 'Shh'. இது வரை எனக்குத் தெரியாது. இந்தப் பிரச்சினையால் இப்போது தெரியும். என்னைப் போல எத்தனையோ இந்தியர்களுக்கும் இது இலவச விளம்பரம். ஜேட் கு·டி இந்தியாவில் விற்பனை ஆரம்பிக்க நல்ல மார்க்கெட்டிங் யுத்தி

'Carphone Warehouse' என்ற விளம்பர நிறுவனம் நிகழ்ச்சியிலிருந்து விலகிக் கொண்டிருக்கிறார்கள். யோசிக்காமல் காலை விட்டு விட்டார்கள் போலிருக்கிறது.

வியாபார நிறுவனம் நடத்தும் திறமையுள்ள ஜேட் கு·டி, யுக்தியில்லாமல் செயல்படுவார் என்ற நம்பிக்கை எனக்கு இல்லை

எரிகிற கொள்ளியில் எந்தக் கொள்ளி நல்ல கொள்ளி.

இதில் நடுவே இந்திய சுற்றுலா வளர்ச்சித் துறை பிரிட்டனில் முழுப் பக்க விளம்பரம் செய்திருக்கிறார்களாம். அதுவும் எப்படி? ஜேட் கு·டி இந்தியாவிற்கு வந்தால்தான் அவருக்கு இந்தியாவின் பெருமைகள் தெரியும். மற்றும் அவருக்கு தற்போது சற்று 'டென்ஸன்' ஆக இருப்பதால், இந்தியாவில் மன அமைதி கிடைப்பது நிச்சயம் என்று அவருக்குத் தனிப்பட்ட அழைப்புடன் ஒரு முழுப்பக்க விளம்பரம்.

அட!! நம்ம அரசு எப்போருந்துங்க இவ்வளவு சமத்தா மாறினாங்க?

சென்னையில் ஹெச் சி எல் கச்சேரித் தொடர் (HCL Concert Series)

2006-09-10T10:06:00.000-07:00

ஹெச் சி எல் இந்திய மண்ணில் பிறந்து ஒரு புகழ் மிக்க பன்னாட்டு நிறுவனமாக சிறப்புடன் வளர்ந்திருக்கிறது. இன்றைய தேதியில், ஆண்டொன்றுக்கு 3.5 பில்லியன் டாலர் அளவிற்குத் தகவல் தொழில் நுட்பத் துறையில் வியாபாரம் செய்யும் நிறுவனம் இது.

ஹெச் சி எல் கடந்த சில ஆண்டுகளுக்காகவே தம் வளர்ச்சிக்குப் பெரிதும் உதவிய சமூகத்திற்குத் திருப்பிச் செய்யும் நோக்குடன் தில்லி நகரில் சங்கீதம் மற்றும் நாட்டியக் கச்சேரித் தொடர்களை நடத்தி வந்துள்ளனர். இளைஞர்களுக்கு இத் தொடர்களில் வாய்ப்பளிப்பதில் முன்னுரிமை வழங்கப் படும் என்று தெரிகிறது.

ஹெச் சி எல் தொடங்கி 30 ஆண்டுகள் நிறைவு பெற்றிருக்கும் நிலையில், இந்த ஆண்டு முதல் சென்னையிலும் ம்யூஸிக் அகாதமியுடன் இணைந்து இத்தகைய கச்சேரித் தொடரைத் தொடங்கி வைக்கும் விழா இன்று ம்யூஸிக் அகாதமியில் நடந்தது.

ஹெச் சி எல் இன்·போஸிஸ்டம் நிறுவனத் தலைவர் திரு அஜாய் சௌத்திரி இந்த நிகழ்ச்சிக்குத் தலைமை தாங்கி, 30 ஆண்டுகளுக்கு முன் சென்னையில் தான் அலுவலகம் தொடங்கியதையும் முதல் தெற்கிந்தியப் பயனர்களையும் நன்றியுடன் நினைவு கூர்ந்தார்.

முதல் முதலாக இந்தத் தொடரில் சுதா ரகுநாதன் கச்சேரி. வெகு அருமையாக இருந்தது. பொருளாதாரத்தில் முதுகலைப் பட்டம் பெற்று பத்மஸ்ரீ விருதும் பெற்ற இந்த அசத்தல் மங்கை இரண்டு மணி நேரம் கர்நாடக சங்கீதத்தில் கச்சேரி செய்து அரங்கை அசத்தி விட்டார்.

அமைதியாகவும் கம்பீரமாகவும் அமர்ந்து கணீரெனப் பாடினார். தமிழ்ப் பாடல்கள் புரிந்ததால் இனிமை அதிகம். இத்துணைப் புகழுடன் அவர் காட்டிய மரியாதை அவர் மேல் மரியாதையை உயர்த்தியது.

அரங்கம் நிறைந்திருந்தது. வந்திருந்தவர்களின் சராசரி வயதைக் கணக்கிட்டால் 50ஐ த் தாண்டி விடும். இளைய தலைமுறைக்கு கர்நாடக சங்கீதத்தில் அவ்வளவு ஈடுபாடு இல்லாதது, இந்தப் பாரம்பரியக் கலை அழிந்து விடுமோ என்ற பயத்தை ஏற்படுத்தியது.

ஒலி அமைப்பு மிகத் துல்லியம். ம்யூஸிக் அகாதமியில் போஸ் ஒலிப் பெருக்கிகளும் டெனான் ஒலி அமைப்பும்.... அடடா... இந்தியா எங்கேயோ போய் விட்டது ஐயா!

அரங்கத்தில் கேட்பவர்களுக்கு பின் புறத்தைக் காட்டிக் கொண்டு மேடையை மறைக்கும் வீடியோக்காரனின் வெகு அலட்சியப் போக்கை ஒழிக்க தொழில்நுட்பம் ஏதாவது கூடிய விரைவில் கண்டு பிடித்தே தீரவேண்டும்.

மொத்தத்தில் சென்னையில் இன்று ஒரு வித்தியாசமான உலகத் தரமான மாலைப் பொழுது.

எரியும் மனிதன் (Burning Man)

2006-09-09T03:56:00.000-07:00

அமெரிக்காவின் நெவாடா மாகாணத்தைச் சேர்ந்த ப்ளாக் ராக் (Black Rock) பாலைவனத்தில் ஒவ்வொரு வருடமும் நம்ம ஊர் திருவிழாக்கள் போலவே நாட்டின் பல பகுதிகளிலிருக்கும் மக்கள் கூடி திருவிழா ஒன்றைக் கொண்டாடுகிறார்கள்.

நம் ஊரில் சொக்கப்பானை எரிப்பது போலவே ஒரு மாபெரும் மனித உருவத்தைக் ஏற்படுத்தி, அதைக் கொளுத்தி, அதைச் சுற்றி ஆடியும் பாடியும் கொண்டாடி திருவிழாவை இனிதே முடித்துக் கொள்கிறார்கள்.

சுமார் 20 ஆண்டுகளுக்கு முன் சிறிய கும்பலுடன் தொடங்கிய இந்தத் 'திருவிழா' இப்போது சுமார் 25000 மக்கள் பங்கேற்கும் ஒரு பிரம்மாண்டமான நிகழ்வு.

ஆச்சரியம் என்னவென்றால் இந்தத் 'திருவிழா' நடக்கும் நகரம் ஒரு தற்காலிக நகரம்.

சற்றேறக் குறைய ஒரு மாத காலம் நடக்கும் இந்தத் 'திருவிழா'விற்கு வரும் மக்கள் தங்களுக்கு வேண்டிய அத்தியாவசியத் தேவைகளை தங்களுடனேயே கொண்டு வந்து ஒரு ஏரியின் படுகையில் இந்தத் தற்காலிக நகரத்தை அமைக்கிறார்கள். அனைவரும் திரும்பச் சென்ற பிறகு அவர்கள் ஏற்படுத்திய தற்காலிக நகரத்தின் சுவடே தெரியாது என்பது மற்றொரு சுவையான விபரம்.

இன்னமும் உண்டு, இங்கு மற்றவரின் பத்திரத்திற்கும், ஆரோக்கியத்திற்கும் பங்கம் விளைவிக்காத வரையில் தனிமனித நடத்தைக்கு கட்டுப்பாடுகள் கிடையாது, ஆணும் பெண்ணும் தங்களைச் சுதந்திரமாக வெளிப் படுத்திக் கொள்ள வகை செய்யும் ஒரு வித்தியாசமான சமூக அமைப்பாக இது அமைவது இதன் தனித்துவம். இந்தத் தற்காலிகச் சமுகத்தில் பொருள்கள் வாங்குவதும் விற்பதும் (வியாபாரம்) முற்றிலும் தடை செய்யப் படுகிறது. நகரத்தின் நடுவில் இருக்கும் ஒரு காப்பிக் கடையில் மட்டும் காப்பி அல்லது டீ வாங்கி குடிக்கலாம் !

இதற்காக ஒரு தனி வலைத் தளமே அமைத்திருக்கிறார்கள்.

குருத்து திசுள் (Stem Cell) ஆராய்ச்சியில் முன்னேற்றம்

2006-09-03T03:19:00.000-07:00

குருத்துத் திசுள் பற்றிய அடிப்படைச் செய்திகளை முன்னொரு இடுகையில் சொல்லியிருந்தேன்.

முன்பு குருத்துத் திசுள்களைத் தயாரிக்க சினை முட்டையை அழிக்க வேண்டியிருந்தது. இது உயிர் கொலைக்குச் சமானம் என்று பல உலக அமைப்புகள் குரல் எழுப்பி இத்தகைய ஆராய்ச்சிகளைக் கடுமையாக எதிர்த்து வந்தன.

ஆராய்ச்சியாளர்கள் இப்போது ஒரு படி முன்னேறி, சினை முட்டையை அழிக்காமல் அதிலிருந்து ஒரே ஒரு திசுளை வெளியே எடுக்க முடியும் என்று காட்டியிருக்கிறார்கள்.

ஆனாலும் இதை எதிர்க்கும் அமைப்புகள் ஒரு திசுளானாலும் அது ஒரு உயிரே என்று ஒரு புதிய வாதத்தை எடுத்து வைத்து இந்த ஆராய்ச்சிக்கு மற்றோரு புதிய கட்டையைக் கொடுத்திருக்கிறார்கள்.

வேட்டையாடு விளையாடு

2006-09-02T19:44:00.000-07:00

அமெரிக்காவில் டாக்டர் படிப்பு படித்து விட்டு அங்கேயே வாழும் இந்தியர்களான இரண்டு சங்கிலித் தொடர் கொலைகாரர்களை கமல் துப்பறிந்து பிடிக்கும் கதை.

அந்தக் கொலைகாரர்கள் இந்தியாவில் படித்த போது அவர்களை அவமானப் படுத்திய பெண்ணையும், பிறகு அந்தப் பெண்ணின் போலீஸ் உயர் அதிகாரியான தந்தையையும் (தாயையும் கூட) போட்டுத் தள்ளுவதால், இந்திய அரசு கமலை துப்பறிவதற்காக அமெரிக்கா அனுப்பி வைக்கிறது.

அமெரிக்காவிற்கு விமானத்தில் பறக்கும் போதுதான் ராகவன் (கமல்) மனைவி சில எதிரிகளால் கடத்திக் கொல்லப் பட்ட ·ப்ளாஷ் பேக். இங்கே வரும் ஒரு பாடல் கேட்க நன்றாயிருந்தது. இந்த ·ப்ளாஷ் பேக்கில்தான் கமலுக்கும் கொல்லப்பட்ட மற்ற போலீஸ் அதிகாரிக்கும் உள்ள பிணைப்பு சித்தரிக்கப் படுகிறது.

கமலின் போலீஸ் உள்ளுணர்வு நன்றாகத் திரையில் சித்தரிக்கப் பட்டிருக்கிறது. ஆனால் அமெரிக்கப் போலீஸ் காரர்களை இவ்வளவு முட்டாள்களாகச் சித்தரித்திருப்பது சரியில்லை.

சாலை விதிகளை மீறுபவர்களைப் பிடிப்பதிலேயே மிகுந்த முன்னெச்சரிக்கையுடன் செயல் படும் அமெரிக்கப் போலீஸ் இரண்டு தொடர் கொலைகாரர்களைப் பிடிக்கப் போகும் போது குருவி சுடுவது போல சுடப் பட்டு செத்துப் போகிறார்கள். அவர்கள் செத்துப் போன விஷயம் மட்டும் அமெரிக்கப் போலீஸ¤க்கு உடனே கிடைக்கிறது. அவர்கள் தடயங்களை ஆராயவில்லை. கொலையாளிகளைத் தேடிப் பிடிக்கவில்லை. விமானத்தில் பயணித்துக் கொண்டிருக்கும் கமல் தரையிறங்கக் காத்திருந்து அவரிடம் சொல்கிறார்கள் (!?!).

அதே போல கொலைகாரர்கள் இன்னொரு அமெரிக்கப் போலீஸ் காரரைச் சுட்டு நெருப்பில் பொசுக்கி விட்டு இந்தியாவிற்குத் தப்பிச் சென்று விட்ட பிறகும், கமல் போய் இந்தியாவில் அவர்களைத் தேடிப் பிடித்துக் கொல்லட்டும் என்று தேமேயிருக்கிறார்கள்.

போகும் போது விமானத்தில் எகானமி வகுப்பில் பயணம் செய்யும் கமல், வரும் போது முதல் வகுப்பில் வருகிறார்.

மணமான கமலுக்கும் மணமான ஜோதிகாவிற்கும் காதல் வருவது கொலைகாரர்களைத் தேடும் விறுவிறுப்பிற்கு நடுவே ஆமை வேகத்தில் சொல்லப் படுகிறது. இங்கே நமக்கு போர் அடிக்கிறது.

படம் முடிந்த பின் பக்கத்து சீட்டில் இருந்தவர்கள், "காமெடி டிராக்கே இல்லையே" என்று அங்கலாய்த்த போதுதான் நமக்கு உரைத்தது.

பல இடங்களில் அமெரிக்கர்களுடன் கமல் ஆங்கிலத்தில் உரையாடுவதை திரைக்குக் கீழே எழுத்துப் போட்டுத் தமிழில் காட்டியிருக்கிறார்கள். படிக்கத் தெரியாத உங்கள் வீட்டு வேலைக்காரப் பெண்ணுக்குப் புரியவா போகிறது?

மொத்தத்தில் ஒரு கமல் மசாலா படம். அமெரிக்கக் காட்சிகளுக்காகவும், சில பாடல்களுக்காகவும், கற்பழிப்புக் காட்சிகளுக்காகவும், போலீஸ் விறுவிறுப்புக்காகவும் சில நாள் ஒடலாம்.

சென்னைக்குத் துணை நகரம்

2006-09-01T22:02:00.000-07:00

சென்னைக்கு அருகே துணை நகரம் அமையப் போவதாகச் செய்திகள் வந்த வண்ணம் இருக்கின்றன. சென்னையின் வளர்ந்து வரும் நெரிசலைப் பார்க்கும் போது துணை நகரத்தின் அவசியம் புரியும்.

சென்னையின் வளர்ச்சியை தகுந்த தொலைநோக்குடன் திட்டமிடாததன் விளைவுகள் அங்கங்கே அப்பட்டமாகத் தெரிகின்றன.

வாகனங்கள் அதிகரித்து விட்ட நிலையில் அவற்றை சிரமமில்லாமல் வசதியாக நிறுத்தி விட்டுக் கடைக்குச் செல்ல முடியாத நிலை.

தேவையான அளவில் பூங்காக்களும், விளையாட்டுத் திடல்களும் இல்லாத நிலை.

பொதுக் கழிப்பறைகள் தேவையான அளவு இல்லாததால் நடைபாதைகளை பட்டப் பகலில் கழிப்பறையாக மக்கள் உபயோகிக்கும் கண் கொள்ளாக் காட்சி

குடிநீர் ஆதாரங்கள் நாளுக்கு நாள் குறைந்து கொண்டே போகும் நிலை

சாலை சந்திப்புக்களில் அதிகரித்து கொண்டு போகும் நெரிசல்

மோட்டார் வாகனத்தில் சென்றால் கூட, தேவையான சாலைப் பரப்பு இல்லாததாலும், விரைவுப் பாதைகள் (express ways) இல்லாததாலும், மாட்டு வண்டியை விடக் கேவலமான வேகத்தில் ஊர்ந்து செல்ல வேண்டிய நிலை

உயிருக்குப் போராடும் நோயாளிகள் அவசர மருத்துவ ஊர்திகளில் சென்றாலும் அவை நெரிசலில் சிக்கிக் கொண்டு சடுதியில் மருத்துவ மனைகளுக்குச் செல்ல முடியாமல் போவதால் ஏற்படும் உயிர் இழப்புக்கள்

இப்படி அவலங்களை அடுக்கிக் கொண்டே போகலாம்.

அதே நேரத்தில் சென்னையில் தகவல் தொழில் நுட்பம் மற்றும் மோட்டார் வாகன உற்பத்தித் துறையின் வளர்ச்சி அபரிமிதமாக உள்ளது. ஸ்ரீபெரும்புதூர் பகுதியில் பல நவீன தொழிற்சாலைகள் கட்டப் பட்டு இயங்கத் தொடங்கி விட்டன. இன்னும் பல விரைவில் ஆரம்பிக்கப் பட உள்ளன. சிறுசேரி மற்றும் கேளம்பாக்கம் பகுதியில் மென்பொருள் சேவை நிறுவனங்களின் வளர்ச்சி வியக்கத் தகும் வகையில் அமைந்திருக்கிறது.

இதனால் வேலைவாய்ப்புகள் பெருகி நடுத்தர வர்க்கத்தின் வாங்கும் திறனும், மேம்பட்ட வாழ்க்கைத் தரத்திற்குத் தங்களை உயர்த்திக் கொள்ள விழையும் நோக்கும் அதிகரிக்கத்தான் போகின்றன. நுகர்வு அதிகரிக்கப் போகிறது

இத்தகைய தொழில் மையங்களின் அருகே சுய சார்புள்ள துணை நகரங்கள் அமைவது சென்னையின் நெரிசலைக் குறைக்க உதவும்.

ஆனால் மறைமலை நகர் போன்ற துணை நகரங்களின் இன்றைய நிலையைப் பார்த்தால், அவற்றின் கட்டமைப்பிலும் தொலைநோக்கின்மைதான் தெரிகிறது.

இன்றும் மறைமலை நகரில் வேலை செய்யும் பல அதிகாரிகள் சென்னையின் மத்தியப் பகுதிகளில் குடியிருக்கத்தான் விழைகிறார்கள். இந்தப் போக்கு சென்னையின் நெரிசல்கள் அதிகரிக்கிக்கவே வழி செய்கிறது.

இந்தப் போக்கு எதனால் வந்தது? மறைமலை நகரில் இன்றும் தரமுள்ள பள்ளிகள் இல்லை. சென்னையில் இருப்பது போல் சிறப்பான மருத்துவ வசதிகள் இல்லை. இன்னும் பல வசதிகள் அங்கு இத்தனை ஆண்டுகளுக்குப் பிறகும் அமையவில்லை.

ஆகவே வெறும் துணை நகரம் அமைப்பதால் மட்டும் சென்னையின் தொல்லைகள் தீர்ந்து விடப் போவதில்லை. பெரும்பாலான மக்கள் அத்தகைய துணைநகரங்களை நாடிச் சென்று அங்கே குடியேறும் வகையில் அவை அமைய வேண்டும்

பார்வை ஒன்றே போதுமா !!

2005-12-17T06:20:00.000-08:00

கடந்த மூன்று அல்லது நான்கு மாதங்களுக்குள் அமெரிக்காவின் ·பார்ச்சூன் (Fortune) நிறுவனங்களான இண்டெல், சிஸ்கோ, மைக்ரோஸா·ப்ட் போன்றவற்றின் தலைவர்கள் இந்தியாவிற்கு வந்து சென்றிருக்கிறார்கள்.

இவர்கள் இந்திய அரசியல் தலைவர்களைச் சந்தித்துப் பேசி அவர்களைப் புகழ்ந்து தள்ளியிருக்கிறார்கள்.

ஒவ்வொருவரும் போட்டா போட்டியுடன் தங்கள் நிறுவனத்தின் எதிர்கால இந்திய முதலீடுகளைப் பற்றிப் பேசிப் போயிருக்கிறார்கள். எவரும் ஒரு பில்லியன் டாலருக்குக் குறைவாகப் பேசவில்லை.

இவர்கள் ஏன் இந்தியாவின் பக்கம் தங்கள் பார்வையைத் திடீரெனத் திருப்பியிருக்கிறார்கள்?

இந்தியச் சந்தையின் எதிர்கால வளர்ச்சியைப் பற்றிய அவர்கள் எதிர்பார்ப்பு ஒரு முக்கியக் காரணம்.

ஆனால் இத்தனை நாள் சீனாவின் பக்கம் பார்த்துக் கொண்டிருந்தனர் பல அமெரிக்கத் தொழில் நுட்ப நிறுவனத் தலைவர்கள். சீனாவில் வளர்ச்சி விகிதம் திடீரென்று குறைந்து விட்டதா என்றால் அது இல்லை காரணம்.

சீனாவில் வர்த்தகத்தின் மற்றும் தொழில் துறைகளின் மேல் அரசின் கட்டுப்பாடு அதிகம்
ஒரு தொழில் நுட்பத்தை சீனாவில் அறிமுகப் படுத்தினால், சீன மண்ணின் மைந்தர்கள் சீன நிறுவனங்களை ஆரம்பித்து தொழில் நுட்பங்களை ஈயடிச்சான் காப்பியடித்து அவற்றை அமெரிக்காவிலேயே விற்றுத் 'தண்ணி' காட்டி விடுகிறார்கள்
சீன அரசும் காப்பியடிப்பதைக் கண்டுகொள்ளாமல், எரிகிற தீயில் எண்ணையை வார்ப்பது போல் இத்தகைய 'மண்ணின மைந்தர்' நிறுவனங்களுக்குப் பல மான்யங்களும் சலுகைகளும் அளிக்கின்றன.

இவற்றால் சீன நிறுவனங்களுடன் அமெரிக்க நிறுவனங்களால் போட்டி போட முடியவில்லை.

இத்துடன் சேர்ந்து கொண்டு இந்தியாவில வளர்ந்து வரும் மத்திய வர்க்கம், அரசின் வளர்ந்து வரும் transparency, வளரும் தொழில் திறன் ஆகியவை அமெரிக்க நிறுவனர்களின் பார்வையை இந்தியாவின் பக்கம் திருப்பியுள்ளன.

முதலீட்டு அறிவிப்புகளை கவனத்தை ஈர்ப்பதற்கும், நல்லெண்ணத்தை வளர்ப்பதற்கும் மட்டும் உபயோகப் படுத்தாமல் உண்மையிலேயே இந்தியாவில் இவர்கள் முதலீடு செய்தால் இந்தியாவிற்கு நல்லதுதான்.

அறிவித்துள்ள முதலீடுகள் அடுத்த மூன்று முதல் ஐந்தாண்டு காலத்தில் செய்யப் படத் திட்டமிடப் பட்டிருப்பதால் அவை எப்போது வரும் என்பதும், சொன்னபடி சொன்ன அளவில் இந்த நிறுவனங்கள் முதலீடு செய்கின்றனவா என்று கண்காணிக்க முடியுமா என்பதும் வலுவான சந்தேகங்கள்.

நடுவில் நம் அரசியல்வாதிகள் வேறு கேள்விக்குப் பதினைந்தாயிரம் ரூபாய் என்று விலை நிர்ணயித்து சீன மைந்தர்களுக்கு நாங்கள் சளைத்தவர்களல்ல என்று வியாபாரம் பண்ணியிருக்கிறார்கள்.

மஹாத்மாவின் எளிய பொருளாதாரச் சிந்தனைகள்

2005-10-02T04:14:00.000-07:00

எளிமை மிகுந்த காந்தி பிறந்த இந்நாளில் காலத்தால் அழியாத அவரது பொருளாதாரச் சிந்தனைகள் சில:

"இயற்கை அனைத்து மனிதர்களின் ஆதாரத் தேவைகளையும் பூர்த்தி செய்ய வல்லது. ஆனால் சில மனிதர்களின் பேராசைத் தேவைகளுக்கு அதனிடம் ஆதாரம் கிடையாது". சுற்றுச் சூழல் பாதிக்கப் படாத அவர் வாழ்ந்த நாட்களில் கூட அவர் வாக்கில்தான் எவ்வளவு தொலைநோக்கு?
பொருளாதாரம் வளர்ந்தால் அதன் விளைவுகள் ஒரு நாள் ஏழைகளைச் சென்றடைந்து அவர்கள் வாழ்க்கைத் தரத்தையும் மேம்படுத்தும் என்ற இன்றைய கருத்திலிருந்து முற்றிலும் மாறுபட்டவர் அவர். "ஏழைகளின் அடிப்படைத் தேவைகளைப் பூர்த்தி செய்ய வழி செய்யும் கொள்கைகளே பொருளாதார வளர்ச்சியின் அஸ்திவாரம்" என்ற கருத்தை வலியுறுத்தியவர்
கிராமப் புற வளர்ச்சியைப் பற்றிய அவரது கருத்துகள் மிக எளிமையானவை. "கிராமப் புறத்தில் வாழும் ஒருவர் கைக்கடிகாரம் போன்ற பொருட் தேவைகளுக்கு இறக்குமதி செய்யப் பட்ட பொருட்களை நாடலாம். ஆனால் ஆதாரத் தேவைகளான உடுத்தும் துணி போன்றவற்றை வாங்க தன் கிராமத்தின் உழைப்பையே நம்பியிருக்க வேண்டும். மிஞ்சிப் போனால் அடுத்த கிராமம் வரை அவர் செல்லலாம்" என்றவர் அவர். அவர் கூறும் வகையில் ஆதாரத் தேவைகளில் தன்னிறைவு பெற்ற கிராமங்கள் இன்றைய உலகமயமாக்கல் கொள்கைகளால் அதிகம் பாதிக்கப் பட மாட்டா!
தனிமனிதனின் தேவைக்கதிகமாக செல்வம் மிகுந்த கவனத்துடன் ஏழைகளின் மேம்பாட்டிற்காக செலவிடப் படவேண்டும். அதுவே அத்தகைய செல்வத்தின் அதி உன்னத உபயோகம் என்று நம்பியவர் அவர்
பரஸ்பர நல்லெண்ணத்துடனும், சேவை நோக்கத்துடனும் மனிதர்கள் கூட்டாகச் சேர்ந்து செய்யும் பொருளாதார மேம்பாட்டு முயற்சிகள் கண்டிப்பாக வெற்றியடையும் என்று நம்பியவர் அவர்

எளிய வாழ்க்கையை வாழ்ந்தும் காட்டிய அவரது இந்த எளிய சிந்தனைகள் இந்த நாளிலும் பயன் படுபவை.

சென்ஸெக்ஸ் தொட்ட கடந்த மாத உச்சம் - 8722 !!

2005-10-01T21:32:00.000-07:00

சென்ஸெக்ஸ் குறியீடு கடந்த செப்டம்பர் மாதம் இறுதி நாள் வர்த்தகத்தில் 8634 என்ற அளவில் முடிவுற்றது. குறியீடு இந்த ஆண்டு 8000 என்ற அளவைத் தாண்டினால் கவலைப் பட வேண்டும் என்று மூன்று மாதங்களுக்கு முன் இந்திய நிதியமைச்சர் கூறி வந்தார். இப்பொழுது என்னவென்றால், பங்குச் சந்தை வளர்ச்சி ஆரோக்கியமாகத்தான் இருக்கிறது என்கிறார்.

பங்குச் சந்தை வல்லுனர்கள் கூட பங்கு விலை/ஈட்டும் வருவாய் (Price/Earnings) விகிதம் 17 அல்லது 18 என்ற ஆரோக்கியமான அளவிலேயே உள்ளதால் கவலையில்லை என்று தெரிவிக்கிறார்கள். தகவல் தொழில் நுட்பத் துறையில் இந்த விகிதங்கள் இன்னமும் 13 முதல் 15 என்ற அளவில்தான் உள்ளன.

இது ஒரு புறமிருக்க, நாம் இந்த வளர்ச்சியைப் பற்றிய சில கருத்துக்களைப் பார்ப்போம்.

இந்த வளர்ச்சிக்கு அடிப்படைக் காரணங்கள் என்று ஆராய்ந்து பார்த்தால் எனக்குத் தெரியும் வாய்ப்புகளில் சில:

ப்ரிக் (BRIC) அறிக்கையின் படி இந்தியாவின் வளர்ச்சி அடுத்த 25 ஆண்டுகளுக்குச் சிறப்பாக இருக்கப் போகிறது. 2050 ஆம் ஆண்டில் இந்தியாவில்தான் ஆக அதிகம் மக்கள் உழைக்கும் வயதில் இருக்கப் போகிறார்கள்
தகவல் தொழில் நுட்பத் துறையில் அமெரிக்காவின் 50 சதவிகித்திற்கும் அதிகமான சேவை நுகர்வுகள் இந்தியாவில் இருந்து பெறப்படுகின்றன. தற்போது ABN Amro போன்ற ஒப்பந்தங்களின் நோக்கைப் பார்த்தால் ஐரோப்பியத் துணைக் கண்டத்திலிருந்தும் இந்தியச் சேவை நுகர்வுகள் அதிகரித்த வண்ணம் உள்ளன
மருத்துவச் சுற்றுலா (medical tourism) துறையில் இந்தியா அடைந்து வரும் வளர்ச்சி
வாகனங்கள், மற்றும் வாகன உதிரிப் பாகங்கள் உற்பத்தித் துறையானது உள்நாட்டுத் தேவை, ஏற்றுமதித் தேவை அளவுகளின் ஆரோக்கியமான வளர்ச்சியால் சிறப்பாக வளர்ந்து வருகிறது
பன்முக நூலிழை ஒப்பந்தம் அமலில் இருந்து விலக்கப் பட்ட பிறகு சீனாவின் மேல் அமெரிக்காவும், ஐரோப்பாவும் ஏற்படுத்திய ஏற்றுமதித் தடையால் இந்தியாவின் துணி மற்றும் ஆடை உற்பத்தித் துறை எதிர்பார்க்கும் வளர்ச்சி
சராசரி இந்தியனின் போக்கு எதிர்காலப் பொறுப்புகளை முன்னோக்கி சேமிக்கும் நோக்கிலிருந்து செலவழித்து மகிழும் போக்கிற்கு மாறிக் கொண்டிருப்பதால் அவரது நுகரும் போக்கு (Consumerism) வளர்ந்து அதனால் சந்தையில் உற்பத்திப் பொருட்களுக்கு தேவை அதிகரித்திருக்கும் நிலை
இந்த ஆண்டு பருவமழை இது வரை நல்ல அளவில் உள்ளதால் விவசாயத் துறையும் நல்ல விளைவுகளை எதிர்கொள்ளும் என்ற எதிர்பார்ப்பு
நடந்து முடிந்த காலாண்டில் இந்தியாவின் மொத்த உள்நாட்டு உற்பத்தி மதிப்பீடு 8 சதவிகிதத்தைத் தாண்டியிருக்கிறது. விவசாயத் துறையின் வளர்ச்சி மட்டுப் பட்டிருந்தாலும், உற்பத்தித் துறையும் சேவைத் துறையும் சக்கைப் போடு போட்டுக் கொண்டிருக்கின்றன
இந்த வளர்ச்சியில் முக்கிய பங்காற்றப் போவது வங்கித் துறை. தொழில் வளர்ச்சிக்கு வேண்டிய முதலீடுகளுக்குத் தேவையான பணத்தைச் சந்தையிலிருந்து புரட்டித் தொழில் வளர்ச்சிக்குத் தர வேண்டிய கடமை இந்தத் துறைக்கு உள்ளது

ஆக, பல நோக்கிலிருந்து பார்த்த போதிலும் இந்தியாவின் வளர்ச்சிச் செய்திகள் ஆரோக்கியமான எதிர்பார்ப்பைத் தருவதாக உள்ளன.

இந்த வளர்ச்சிக்கு ஆபத்தாகப் போகக் கூடும் சில போக்குகள் என்ன?

பொருளாதார வளர்ச்சி பெற்று வரும் இந்தியா மில்லினியம் வளர்ச்சிக் குறிக்கோள்களில் - அதாவது மனித வள மேம்பாட்டில் பின் தங்கியுள்ளது என்று ஐக்கிய நாடுகளின் மனித வள மேம்பாட்டு அறிக்கை கூறுகிறது
இன்னமும் பத்து ஆண்டுகளில் இந்தியாவில் உழைக்கும் வயதில் இருப்பவர் எண்ணிக்கை 500 மில்லியனைத் தொடும் என்று ஒரு அறிக்கை கூறுகிறது. இவர்கள் அனைவருக்கும் வேலை வாய்ப்புகள் தேவை. அவற்றை நம்மால் தக்க சமயத்தில் ஏற்படுத்த முடியவில்லையென்றால் விளையக் கூடிய பின்விளைவுகள் பாதகமானவை
இந்த நிலையில் இடது சாரிக் கட்சிகள் சில பொருளாதாரச் சீர்திருத்த முயற்சிகளுக்கு முட்டுக் கட்டை போட்ட வண்ணம் இருக்கிறார்கள். ஒரு புறம் பல்லாயிரக் கணக்கில் பல்கிப் பெருகி வரும் சேவை மற்றும் உற்பத்தித் துறை வேலைவாய்ப்புகளுக்கு ஏற்படக் கூடும் ஆபத்தைக் கருத்தில் கொள்ள முயற்சி எதுவும் செய்வதாகத் தெரியவில்லை. அதிக வருவாய் மற்றும் சற்றே உயர்ந்த வாழ்க்கைத் தரத்தை இந்தியனுக்கு அளிக்கக் கூடிய அத்தகைய வேலைவாய்ப்புகளை அதிகரிக்க யோசனைகள் செய்வதாகத் தெரியவில்லை. அதரப் பழமையான சில தொழிலாளர் நலச் சட்டங்களை, ஓட்டு வங்கியைத் தக்க வைத்துக் கொள்ளும் நோக்குடன், அடைகாத்து வருகிறார்கள்
பண்ணை மற்றும் விவசாயத் துறைக்கான அடிப்படைக் கட்டமைப்புகள் (சாலைகள், குளிர்பதன வசதிகள்) மிகக் குறைவான அளவிலேயே உள்ளன. இதற்கான தொழில்நுட்பதை இறக்குமதி செய்து தேவையான முதலீடுகளைச் செய்யக் வல்ல தனியாரின் அந்நிய முதலீடுகளுக்கு முட்டுக் கட்டை போட்டுக் கொண்டிருக்கிறோம்
அரசின் தேசிய கிராமப் புற வேலைவாய்ப்பு உத்தரவாதத் திட்டம் போன்றவை அரசுக்கு ஏகப் பட்ட பொருட் செலவைத் தரக் கூடியவை. இந்தத் திட்டங்கள் எந்தத் திசையில் செல்லப் போகின்றன என்பதில் தெளிவில்லை
பேசல் II நியமங்களை அமலுக்குக் கொண்டு வந்து சிறப்பாகப் பணியாற்றியிருக்கும் அரசு, பொருளாதார வளர்ச்சிக்குத் தேவையான கடன்களை வழங்க வேண்டிய வங்கிகளில் அதன் முதலீட்டு விகிதத்தைக் குறைக்க இயலவில்லை. முறையான செலவுகளுக்கே ததிங்கிணத்தோம் போட்டுக் கொண்டிருக்கும் நம் அரசு, வங்கிகளில் தனது முதலீட்டை பொருளாதார வளர்ச்சிக்கு ஏற்ற விகிதத்தில் அதிகரிக்கப் போவது எப்படி?
சில வாரங்களுக்கு முன் தரமற்ற சில தரகர்களும், நேர்மையற்ற சில நிறுவனர்களும், சில கறுப்புப் பண முதலை முதலீட்டாளர்களும் கூட்டுச் சேர்ந்து கொண்டு சல்லிக்காசு பங்குகள் (மற்றும் வழக்கிலில்லாப் பங்குகள்) விலைகளை எக்கச் சக்கமாக ஏற்றி, பல விபரம் தெரியா முதலீட்டாளர்களின் பொருள் இழப்புக்குக் காரணமானார்கள். அரசு அமைப்புகள் சற்றே விழிப்புடன் செயல்பட்டதால் இந்த இழப்பு மேலும் பெரிதாகாமல் சமயத்தில் தவிர்க்கப் பட்டது. இருந்த்தும் இந்தியப் பங்குச் சந்தை இந்த வகை ஆபத்துகளை இன்னமும் முழுமையாகத தவிர்க்கவில்லை.

சென்ஸெக்ஸின் இந்த வளர்ச்சியில் கவனிக்க வேண்டிய ஒரு முக்கிய நோக்கு என்னவென்றால் மேற்கூறிய நிலைகளோ, அல்லது வளர்ச்சிக்கு பாதகம் என்று கருதப் படும் எந்தவொரு செய்தியோ (உதாரணங்கள்: உயர்ந்து வரும் கச்சா எண்ணை விலை, மும்பை வெள்ளம், கட்ரீனா சூறாவளி ஏற்படுத்திய சேதம், ஈரான் இந்தியாவிற்கு திரவ எரிவாயு அளிக்கச் செய்து கொண்ட ஒப்பந்தத்தை விலக்கிக் கொள்வதாக வந்த செய்தி) சென்ஸெக்ஸ் வளர்ச்சியைப் பாதிக்கவில்லை.

சென்ஸெக்ஸ் வளர்ச்சிக்கு முக்கிய காரணம் - "இந்தியாவில் இன்று திறந்த நிலையில் முதலீடு இல்லாத ஒருவனுக்கு முதலீட்டு அறிவு மட்டு" என்று அன்னிய முதலீட்டாளர்களிடையே வளர்ந்து கொண்டிருக்கும் எண்ணமும் எதிர்பார்ப்பும்தான். கடந்த ஜீன் மாதம் முதல், மாதம் ஒரு பில்லியன் என்ற அளவில் முதலீடுகளைக் கொண்டு வந்து கொட்டிக் கொண்டிருக்கிறார்கள். கடந்த எந்த ஆண்டையும் விட இந்த ஆண்டு இந்தியாவில் முதலீடு செய்யப் பட்டிருக்கும் பணத்தின் மதிப்பு அதிகம் என்றாலும் சீனாவிற்குக் கிடைக்கும் அந்நிய முதலீடுகளை ஒப்பிடும் போது இந்தியா இன்னமும் மிகக் குறைவாகத்தான் முதலீடுகளைப் பெறுகிறது. அமெரிக்காவில் இருந்து பெருமளவில் வந்து கொண்டிருந்த முதலீடுகள் போக இன்று ஜப்பான் உள்ளிட்ட ஆசிய நாடுகள் கூட இந்தியாவில் முதலீடு செய்வதில் ஆர்வம் மிகக் கொண்டிருக்கின்றன.

இந்திய வான்வெளித் தொழில் துறை

2005-09-11T02:55:00.000-07:00

இந்தத் துறை கடந்த 20 வருடங்களில் மிகச் சிறப்பான வளர்ச்சி அடைந்திருக்கிறது. ஹெச். ஏ. எல் (ஹிந்துஸ்தான் ஏரோநாடிக்ஸ் லிமிடெட்) நிறுவனம் இந்த வளர்ச்சியில் சிறப்பான பங்காற்றியிருக்கிறது. ஹெச். ஏ. எல் ஒரு வருடத்திற்கு 4400 கோடி ரூபாய்கள் அளவிற்கு வருவாய் ஈட்டுகிறது. இதில் ஏற்றுமதிகள் மூலம் மட்டும் 150 கோடி ரூபாய்கள் வருவாய் ஈட்டியிருக்கிறது. மிக அதிக அளவில் ராணுவ உபயோகத்திற்காகவும், தற்காப்புக்காகவும் வானூர்திகளைத் தயாரிக்கும் ஒரு நிறுவனம் ஹெச். ஏ. எல்.

ஹெச். ஏ. எல் 1940 ஆம் ஆண்டு தொடங்கப் பட்டது. முதன் முதலில் மிதவை வானூர்தி (Glider) ஒன்றை வடிவமைத்து தயாரித்தது. இன்றோ தொழில் நுட்பத்தின் வெட்டுவாயில் உள்ள சிறந்த பல வானூர்திர்களைத் தயாரித்துக் கொண்டிருக்கிறது.

உதாரணத்திற்குச் சில:

ஹான்ஸா - இது இரண்டு இருக்கைகள் கொண்ட பயிற்சி விமானம்
துருவ் - முன்னணித் தொழில் நுட்பம் கொண்ட இலகு ரக ஹெலிகாப்டர் விமானம்
இலகு ரக போர்விமானம் - எளிதாகப் பலமுறை வானில் உருண்டு சாகஸங்கள் புரிய வல்லமை உள்ள போர் விமானம்
இடைநிலை ஜெட் பயிற்சி விமானம்
சாராஸ் - பதினான்கு இருக்கைகள் கொண்ட பயணிகள் விமானம். இந்தியாவின் மிகச் சிறிய நகரங்களுக்குப் பயணம் செய்யக் கூடிய வகையில் வடிவமைக்கப் பட்டிருக்கிறது.

1990 களின் மத்திமக் காலம் வரை அரசு ஹெச். ஏ. எல் நிறுவனத்திடம் பொருள் வாங்கும் போது ஆகும் செலவுக்கு மேல் 7.5 சதவிகிதம் லாபம் கொடுத்து விலை நிர்ணயம் செய்வதை வணிக அமைப்பாக இயக்கிக் கொண்டிருந்தது.

இந்த முறையில் உற்பத்தித் திறன் மற்றும் தொழில் திறன் முன்னேற்றத்திற்குத் தேவையான உக்கிகள் இல்லாமையால் ஹெச். ஏ. எல் நிர்வாகிகளின் வேண்டுகோளின் படி அரசு ஹெச். ஏ. எல் தன் பாட்டைத் தானே பார்த்துக் கொள்ளும் வகையில் வணிக அமைப்பை அமைத்துக் கொள்ள அனுமதி அளித்தது.

என். ஏ. எல் (நேஷனல் ஏரோநாடிகல் லாபோரடரீஸ்), எடா (ஏரோநாடிகல் டி·பன்ஸ் ஏஜென்ஸி) போன்ற அமைப்புகளும் ஹெச். ஏ. எல் நிறுவனத்தின் வளர்ச்சிக்குத் துணையான ஆய்வுகள் செய்தல், வடிவமைப்பு, கட்டமைப்பு, பயிற்சி, மற்றும் சோதனைக் கருவிகள் முதலியன செய்வதில் மிக முன்னேறிய நிலையில் உள்ளன.

தனியார் துறையில் தனேஜா என்ற இந்திய நிறுவனம் வானூர்திகள் செய்யும் தொழிலில் ஈடுபட்டுள்ளது. மற்ற தனியார் துறை நிறுவனங்களான ஹெ.சி.எல், விப்ரோ, இன்·போஸிஸ், கேட்டெஸ் (CADDES), க்வெஸ்ட் (Quest), சில்வர் ஸா·ப்ட்வேர், சி.எம்.எஸ் சா·ப்ட்வேர் போன்றவை தொழில் நுட்பச் சேவைகள் வழங்கும் துறையில் உள்ள சில முக்கிய நிறுவனங்கள்.

இவை உலகின் புகழ் பெற்ற வான்வெளித் தொழில் துறை நிறுவனங்களான போயிங். ஏர் பஸ், ராக்வெல் காலீன்ஸ், ஹாமில்டன் சன்ஸ்ட்ராண்ட் போன்ற அந்நிய நிறுவனங்களுக்குச் சேவைகள் வழங்குகின்றன.

இந்தச் சேவைகளை இரண்டு வகையாக வகைப் படுத்தலாம்.

முதல் வகைச் சேவைகள் விமானத்தின் வடிவமைப்புப் பணிகளுக்கும், கட்டமைப்புப் பணிகளுக்கும் துணைபோகும் (enabling) தொழில் நுட்பங்களைக் கொண்டு வழங்கப் படுபவை. கணினி உதவியுடன் வடிவமைத்தல் மற்றும் கட்டமைத்தல் (CAD/CAM) இதில் மிக முக்கியமான சேவை. இந்தியச் சேவை நிறுவனங்கள் இவ்வகைச் சேவைகளை வழங்குவதில் முன்னணி நிலையை எட்டியுள்ளன.
இரண்டாம் வகைச் சேவைகள் விமானத்தினுள் பொருத்தப்படும் (embedded) தொழில்நுட்பங்களைத் தயாரிக்கும் அல்லது சோதனை செய்து தரும் சேவைகள். ஹெச். சி. எல் போன்ற நிறுவனங்கள் இந்தத் துறையில் பிரகாசிக்கின்றன.

விமானத்தில் பொருத்தப் படும் தொழில் நுட்பங்கள் சரியாக இயங்காத பட்சத்தில் விமான இயக்கத்திற்கு ஏற்படக் கூடும் ஆபத்துகளின் தீவிரத்தைக் கணக்கில் கொண்டு அத் தொழில் நுட்பங்கள் நான்கு மட்டங்களில் (levels) (ஆக அதிக ஆபத்துள்ள தொழில் நுட்பம் முதல் ஆகக் குறைந்த ஆபத்துள்ள தொழில் நுட்பம்) வகைப் படுத்தப் படுத்தப் படுகின்றன.

ஆபத்து அதிகமுள்ள உயர் மட்டத்தில் விமானத்தின் ஜெட் விசைகளை இயக்கும் தொழில் நுட்பங்கள், விமானம் பறப்பதைக் கட்டுப் படுத்தும் தளங்களை இயக்கும் தொழில் நுட்பங்கள் அடங்கும்.

இருக்கையில் பொருத்தப் பட்டிருக்கும் தொலைக்காட்சித் திரை, இருக்கையில் சங்கீதம் வழங்கும் அமைப்பு முதலியவை ஆபத்து குறைவான அடி மட்டத்தில் சேரும்.

குளிர்சாதன வசதி, விமானத்தினுள் புகை வந்தால் கண்டு பிடிக்கக் கூடிய கருவிகள் இடைப்பட்ட மட்டங்களில் அமையும். கீழுள்ள மூன்று தட்டுகளில் சேவைகள் வழங்கும் இந்திய நிறுவனங்கள் இன்னமும் மேல் தட்டை எட்டவில்லை.

உலகின் வான்வெளித் தொழில் துறைச் சந்தையின் அளவை சுமார் 1300 ட்ரில்லியன் (9 பூஜ்யங்கள்) டாலர்கள் என்று மதிப்பிட்டிருக்கிறார்கள். இதில் 75 சதவிகதம் உலக நாடுகளின் அரசாங்கங்கள் தற்காப்புக்காகவும், ராணுவச் சேவையின் தேவைகளுக்காகவும் செலவிடும் பணமாகும்.

இந்தியச் சேவை நிறுவனங்கள் இந்த வட்டத்திற்குள் இன்னமும் கால் வைக்க முடியவில்லை. உதாரணத்திற்கு, அமெரிக்காவில் இந்த வட்டத்திற்குள் சேவைகள் வழங்க, முழுதும் அமெரிக்கக் குடிமக்களைக் கொண்டு அமெரிக்க மண்ணில் இயங்கும் நிறுவன அமைப்பு ஒரு கட்டாயத் தேவை. க்வெஸ்ட் என்ற ஒரு இந்திய நிறுவனம் மட்டும் இதில் ஒரு படி முன்னேறியிருப்பதாகக் கேள்வி.

சுமார் 150 மில்லியன் டாலர் அளவாகத் தற்போது மதிப்பிடப் பட்டிருக்கும் இந்திய வான்வெளித் தொழில் நுட்பச் சேவை வழங்கும் சந்தை, இன்னமும் ஐந்து வருடங்களில் 1 பில்லியன் டாலர் அளவிற்கு வளரும் என்று தெரிகிறது.

இஸ்ரோ (ISRO) நிறுவனம் செயற்கைக் கோள் மற்றும் தொலையுணர்வுத் தொழில் துறையில் இயங்கினாலும், வானூர்தித் தொழில் துறைக்குப் பலவகைகளில் உறுதுணையாக இருந்திருக்கிறது.

அரசு, தனியார் துறைகள் அனைத்தும் வளர்ச்சியும் தேர்ச்சியும் பெற்று, தொழில்களுக்கிடையே ஆரோக்கியமான இணைப்புகளும், ஒருங்கிணைப்புகளும் தேவையான அளவில் உருவாகி, சேவைகள் ஏற்றுமதியிலும் நல்ல வளர்ச்சியை எதிர் நோக்கியிருக்கும் இந்தத் துறை மேலும் சிறந்து வளர அரசின் கொள்கைகள் தொலைநோக்குடன் அமைவது மிக முக்கியம். அதே போல் தனது தேவைகளுக்கு வெளி தேசங்களுக்குச் செல்லாமல் இந்தியாவின் உற்பத்தியை நம்பி அதன் மேம்பாட்டிற்குப் பாடுபடுவதும் அரசின் கடமைகளில் ஒன்று.

உலகின் மில்லீனியம் (Millenium) வளர்ச்சிக் குறிக்கோள்கள்

2005-09-07T07:33:00.000-07:00

2000 ஆம் ஆண்டில் நடந்த ஐக்கிய நாடுகளின் மில்லீனியம் உச்சி மாநாட்டில் உலகின் வசதிகள் ஆகக் குறைந்த பகுதிகளில் வாழும் மக்களின் மேம்பாட்டிற்கு வேண்டிய முதலீடுகளைச் செய்யப் போவதாக உலக நாடுகள் உறுதி எடுத்துக் கொண்டன. உலகின் வறுமையின் தீவிரத்தை 2015 ஆம் ஆண்டிற்குள் கணிசமாகக் குறைக்க அவர்கள் எட்டுக் குறிக்கோள்களையும் அவற்றிற்கான இலக்குகளையும் நிர்ணயித்தனர்.

குறிக்கோள் 1:

தீவிரமான ஏழ்மையையும், பசியையும் அறவே ஒழிக்க வேண்டும்.

இலக்கு: ஒரு டாலருக்கும் குறைவாக ஒரு நாளைக்குச் சம்பளம் பெறுவர்களின் மக்கள் தொகை விகிதம் 2015 ஆம் ஆண்டிற்குள் பாதியாகக் குறைக்கப் படவேண்டும். தொடர்ந்து பசியில் வாடுபவர்கள் எண்ணிக்கை விகிதத்திற்கும் இதே இலக்கு நிர்ணயிக்கப் பட்டிருக்கிறது.

குறிக்கோள் 2:

உலகில் அனைவருக்கும் ஆரம்பக் கல்வி கிடைக்க வேண்டும்

இலக்கு: உலகின் அனைத்துக் குழந்தைகளும் 2015 ஆம் ஆண்டுக்குள் ஆரம்பக் கல்வியைப் பெற்றிருக்க வேண்டும்.

குறிக்கோள் 3:

ஆண் பெண் சமநிலை ஊக்குவிக்கப் பட வேண்டும். பெண்களுக்கு சம அதிகாரம் வழங்கப் பட வேண்டும்.

இலக்கு: தற்போது ஆரம்ப, இரண்டாம் மற்றும் மூன்றாம் நிலைக் கல்வி பெறுவதில் ஆண்களுக்கும் பெண்டிருக்கும் இருக்கும் வித்தியாசங்கள் 2015 ஆம் ஆண்டிற்குள் முற்றிலும் ஒழிக்கப் பட வேண்டும்.

குறிக்கோள் 4:

குழந்தைகள் இறப்பது குறைக்கப் பட வேண்டும்.

இலக்கு: ஐந்து வயதிற்கும் குறைவான குழந்தைகள் இறக்கும் எண்ணிக்கை தற்போதைய எண்ணிக்கையில் மூன்றில் இரண்டு பங்காக 2015 ஆம் ஆண்டுக்குள் குறைக்கப் பட வேண்டும்.

குறிக்கோள் 5:

ஆரோக்கியமான பிரசவங்கள் எண்ணிக்கையில் முன்னேற்றம் வேண்டும்.

இலக்கு: பிரசவத்தின் போது ஏற்படும் மரணங்களின் எண்ணிக்கை தற்போதைய எண்ணிக்கையில் 75 சதவிகிதமாக 2015 ஆம் ஆண்டிற்குள் குறைக்கப் பட வேண்டும்.

குறிக்கோள் 6:

ஹெச். ஐ. வி, எய்ட்ஸ், மலேரியா முதலிய நோய்கள் போராடி அழிக்கப் பட வேண்டும்

இலக்கு: ஹெச். ஐ. வி, எய்ட்ஸ் நோய்கள் பரவுவது தடுக்கப் பட வேண்டும். இந்த நோய்கள் நீங்கி ஆரோக்கியம் பெறுவோர் எண்ணிக்கை அதிகரிக்க வேண்டும். மலேரியா பரவும் வேகம் மட்டுப் படுத்தப் பட வேண்டும்.

குறிக்கோள் 7:

சுற்றுச் சூழல் சீராகப் பராமரிக்கப் படுவது உறுதி செய்யப் பட வேண்டும்.

இலக்கு: சீராக சுகாதாரமான குடிநீரும், அடிப்படைக் கழிவு நீக்கும் வசதிகளும் கிடைக்காத மக்களின் எண்ணிக்கை 2015 ஆம் ஆண்டிற்குள் பாதியாகக் குறைக்கப் பட வேண்டும்.

குறிக்கோள் 8:

உலக அளவில் வளர்ச்சிக்காக அனைத்து நாடுகளும் இணை சேர வேண்டும்.

இலக்கு: வளர்ச்சியில் பின் தங்கியுள்ள நாடுகளின் வளர்ச்சித் தேவைகளைக் கண்டறிந்து பூர்த்தி செய்ய வேண்டும். (தாராளமான வளர்ச்சி நிதி வழங்குவதும் இதில் அடங்கும்)

விண்ணுக்கு மின் தூக்கி ?!

2005-08-21T08:14:00.000-07:00

இப்பொழுது விண்ணுக்குச் செல்ல ஏவுகணைகளை உபயோகிக்கிறோம். கட்டுப் படுத்தப் பட்ட வேதிப்பொருள் வெடிப்பிலிருந்து கிடைக்கும் சக்தியை உபயோகித்து, சுமைகளை விண்ணை நோக்கிச் செலுத்துகிறோம். இந்த முறை மிகவும் வினைத்திறன் (efficiency) குறைந்தது.

செலுத்தப் படும் சுமையின் (payload) எடை ஏவுகணை அமைப்பின் எடையில் ஒரு சிறிய சதவிகிதமே
செலுத்தப் படும் ஏவுகணை இயக்கிகள் பல கோடி டாலர்கள் செலவில் கட்டமைக்கப் பட்டு, ஒரு முறை மட்டுமே உபயோகிக்கப் படுகின்றன
ஏகப் பட்ட எரிபொருள் செலவாகிறது
ஒரு கிலோ எடையுள்ள சுமையை விண்ணுக்குச் செலுத்த சுமார் 20000 டாலர்கள் செலவு பிடிக்கிறது

வளி மண்டலத்தைக் கடந்தாலே விண்ணில் நிலவு, செவ்வாய் போன்ற மற்ற இடங்களுக்குச் செல்ல பாதி தூரத்தைக் கடந்தற்கு ஈடாகும். ஏனென்றால், வளி மண்டலத்தைக் கடப்பதற்கு மட்டுமே பாதிக்கு மேல் எரிபொருள் செலவாகிறது.

சமீபத்தில் கொலம்பியாவின் விபத்திற்குப் பின்னரும், டிஸ்கவரி ஏவப் பட்ட போது கொலம்பியாவின் பிரச்சனைகள் திரும்பவும் தலைதூக்கியதாலும், அடுத்த விண்கலமான அட்லாண்டிஸ் ஏவும் நாளை அடுத்த ஆண்டு மத்திக்கு அமெரிக்கா தள்ளி வைத்திருக்கிறது.

இந்நிலையில் விண்ணுக்குச் செல்ல மற்றொரு புதிய முறையைப் பற்றி அறிவியல் அறிஞர்கள் பேசத் தொடங்கியிருக்கிறார்கள். மின் தூக்கி (elevator or lift) மூலம் பொருட்களையும் மனிதர்களையும் ஒரு கிலோவிற்கு 200 டாலர் செலவில் விண்ணுக்கு எடுத்துச் செல்லும் முறைதான் அது.

இந்த முறையில், பூமத்திய ரேகையில் புயல், மழை போன்ற இயற்கைச் சீற்றங்கள் இல்லாத ஒரு இடத்தைத் தேர்ந்தெடுத்து அங்கிருந்து 100000 கிலோமீட்டர் நீளமுள்ள செங்குத்தான கம்பிப் பாதை அமைக்கப் படும். இந்த கம்பியின் 700 டன் எடையுள்ள எதிர் எடை (counter weight) கம்பியின் எதிர் முனையில் பொருத்தப் பட்டு பூமியின் அச்சு சுற்றும் வேகத்திலேயே விண்ணில் சுற்றிக் கொண்டு இருக்கும். இந்த மின் தூக்கி அமைப்பின் புவி ஈர்ப்பு மையம் பூமிக்கு மேல் சுமார் 30000 கிலோமீட்டர் உயரத்தில் இருக்குமாறு வடிவமைத்தால், இந்த அமைப்பு சமநிலை பெறுவதுடன், கம்பியின் விறைப்பும் தேவையான அளவுடன் இருக்கும். ஆகவே கம்பி செங்குத்தாக பூமியுடன் சுற்றி வரும்.

கம்பியின் புவி ஈர்ப்பு மையத்தில் ஒரு தட்டு அமைப்பதன் மூலம் சுற்றுலாப் பயணிகளையும் அங்கு கொண்டு செல்லலாம் என்கிறார்கள். அதே போல விண்ணில் மற்ற இடங்களுக்குச் செல்ல அந்த தட்டிலிருந்து ஏவுகளம் அமைக்கலாம்.

இந்தக் கம்பியின் மேல் பயணிக்கும் மின் தூக்கி சுமார் 7 டன் எடை இருக்கும். அது 13 டன் சுமையை ஏற்றிச் செல்லும் திறன் கொண்டிருக்கும். இதற்குத் தேவையான மின்சாரத்தை லேசர் பிம்பங்களின் மூலம் பூமியிலிருந்து செலுத்தலாம் என்று யோசிக்கிறார்கள். மணிக்கு சுமார் 190 கி.மீ வேகத்தில் மேலேறும் மின் தூக்கி, எட்டு நாட்களில் தரையிலிருந்து புவியீர்ப்பு மையப் புள்ளிக்குப் போய்ச் சேரும். நீங்களும் நானும் (பணமிருந்தால்) கோடை விடுமுறைக்கு விண்ணுலகம் (?!) போய் வரலாம்.

இந்த யோசனை ஒன்றும் புதியதல்ல என்கிறார்கள். சுமார் 100 ஆண்டுகளுக்கு முன் கான்ஸ்டாண்டின் ட்ஸையால்காவ்ஸ்கி என்பவர் இதைப் பற்றிப் பேசி விட்டாராம். 1960 களில் இந்த யோசனையைத் தூசி தட்டிப் பார்த்தவர்கள், இதற்குத் தேவையான கம்பியை அமைக்கும் பொருட்கள் உலகில் இல்லை என்று இதைக் கைவிட்டார்கள். எ·குக் கம்பியைப் போல பலமடங்கு பலம் பெற்று, அதே சமயம் எடையில் அதை விடப் பல மடங்கு லேசான பொருளைத் தேடிக் கொண்டிருந்தார்கள்.

1991 ஆம் ஆண்டில் சுமியோ லிஜிமா என்ற ஜப்பானிய ஆய்வாளர் கரி நானோ குழாயைக் (Nano Tube) கண்டு பிடித்தார். இந்தக் கண்டுபிடிப்பிற்குப் பிறகு விண்ணுக்கு மின் தூக்கி அமைக்கும் யோசனை மீண்டும் உயிர் பெற்று விட்டது.

மேலும் தெரிந்து கொள்ள ஆசையிருப்பவர்கள் இங்கே அல்லது மேலுள்ள படத்தில் சொடுக்கவும்.

அஞ்சல்காரர் BPO பணியாளராகும் கதை !!

2005-08-21T02:58:00.000-07:00

எனது தந்தையின் பெயர் சற்று அசாதாரணமானது. இந்தியாவில் அவர் வாழ்ந்த பல ஊர்களில் (பெரு நகரங்கள் தவிர) அவர் பெயரையும் ஊரையும் மட்டும் முகவரியில் குறிப்பிட்டு அவருக்குத் அஞ்சல் அனுப்பினால் அது அவரது வீட்டுக்கோ அல்லது அலுவலகத்திற்கோ போய்ச் சேர்ந்து விடும். நளினசேகரன், தூத்துக்குடி என்று முகவரியிட்ட பல கடிதங்கள் தவறாமல் அவரைச் சென்றடைந்துள்ளன. ஏனென்றால் ஊரிலேயே அந்தப் பெயரில் ஒருவர்தான் இருக்கிறார் என்று அஞ்சல்காரருக்கு வழக்கத்தில் தெரியும்.

நாட்டின் குடிமக்களின் பெயரையும் அவர்கள் வசிக்கும் முகவரியையும் பற்றிய ஆழ்ந்த அறிவு அஞ்சல் துறைக்கு உள்ளது. இந்த அறிவு அஞ்சல் வினியோகிக்கும் அஞ்சல் துறைப் பணியாளர்களிடையே பொதிந்துள்ளது.

இந்த அறிவு அஞ்சல் துறையின் வியாபாரத்திற்கு உதவும் ஒரு சொத்து. இந்தச் சொத்தை இது நாள் வரை அஞ்சல் வினியோகத்திற்கு மட்டுமே பயன்படுத்தி வந்த அஞ்சல் துறை இப்போது விழித்துக் கொண்டிருக்கிறது.

வங்கிகள் தனிப்பட்ட கடன், விவசாயக் கடன், வாகனக் கடன், வீட்டுக் கடன் என்று கடன்களை அள்ளி வீசிய வண்ணம் இருக்கின்றன. வளரும் இந்தியாவிற்கு இத்தகையக் கடன்கள் மிகத் தேவை. கடன் கொடுக்கும் வங்கிகளுக்கு வராக் கடன்கள் மூலம் ஆபத்து இருப்பதையும், கடனாளும் திறனுள்ளவர்களைக் கண்டறிந்து அவர்கள் கடன் வழங்க வேண்டிய கட்டாயத்தையும் முந்தைய பதிவுகளில் பார்த்தோம். தனிநபர் அடையாள அட்டை இன்னமும் இந்தியாவில் வழங்கப் படாத நிலையில் பினாமி பெயரில் கடனுக்கு விண்ணப்பிப்பவர்கள் அதிகம்.

உண்மையான விண்ணப்பதாரர்களை இனம் கண்டுகொள்ள இது நாள் வரை தனது செலவில் ஆட்களை பணியமர்த்தி தேவையான தகவல்களைச் சேகரித்து வந்த வங்கிகளுக்கு, இந்திய அஞ்சல் துறை, முகவரி மற்றும் அடையாளச் சான்றிதழ் வழங்கும் சேவையை அளிக்க முன்வந்துள்ளது. சிடிபேங்க், ஜீ.ஈ மனி (G.E Money) போன்ற நிறுவனங்கள் அஞ்சல் துறையின் இந்தப் புதிய சேவையை நுகர ஒப்பந்தம் செய்து கொண்டுள்ளன.

இதேபோல தொலை தொடர்புச் சேவை வழங்கும் நிறுவனங்களுக்கும் பொய்யான விண்ணப்பதாரர்களை இனம் கண்டுபிடிக்கும் தேவை உள்ளது. ரிலையன்ஸ் இன்·போகாம், டாடா இண்டிகாம் போன்ற நிறுவனங்களும் கூட அஞ்சல் துறையுடன் விண்ணப்பதாரர் அடையாளச் சான்று பெறும் சேவைக்காக ஒப்பந்தம் செய்து கொண்டுள்ளார்கள்.

அஞ்சல் துறைக்கு இதன் மூலம் 3000 கோடி ரூபாய் அதிக வருமானம் வரும் என்று தெரிகிறது.

இந்த அமைப்பு பெருநகரங்களில் எந்த அளவிற்குத் திறம்பட இயங்கும் என்பதில் எனக்கு ஐயம் உள்ளது. நானும் எனது பகுதி அஞ்சல்காரரும் ஒருவரை ஒருவர் பார்த்துக் கொண்டது கூடக் கிடையாது. எனக்கு வரும் கடிதங்கள் மூலம் என் பெயரும், முகவரியும் அவருக்குத் தெரிந்திருக்கக் கூடும். ஆனால் பெயரைச் சொன்னால் என்னை அவரால் அடையாளம் காட்ட இயலுமா என்பது சந்தேகம். ஆனால் நிச்சயமாக கிராமங்களிலும், சிற்றூர்களிலும் இது சாத்தியம். 70 சதவிகிதத்திற்கும் மேற்பட்ட இந்தியக் குடிமக்கள் கிராமங்களில்தான் வாழ்கிறார்கள். ஆகவே அஞ்சல் துறையின் புதிய திட்டம் வெற்றி பெறும்.

அடுத்த தீபாவளிக்கும் பொங்கலுக்கும் வீட்டுக்கு வரும் அஞ்சல் பணியாளரை அதிக நேரம் 'வெயிட்' செய்ய வைக்காமல் 'வெயிட்'டாக கவனியுங்கள். பின்னால் கண்டிப்பாக உதவும்!

மும்பை பங்குச் சந்தை !!

2005-08-19T08:59:00.000-07:00

130 ஆண்டுகளாக இயங்கி வந்த மும்பை பங்குச் சந்தை இன்று முதல் லாபமீட்டும் நோக்கமுள்ள ஒரு பதிவு செய்யப் பட்ட நிறுவனமாக தேவையான கழகக் கட்டமைப்புடன் (corporate structure) இயங்க ஆரம்பித்துள்ளது.

பங்குத் தரகர்களால் அவர்கள் வசதிக்காக ஏற்படுத்தப் பட்ட இந்த நிறுவனம், இத்தனை நாள் லாபமீட்டும் நோக்கமில்லாத ஒரு அமைப்பாக இயங்கி வந்தது.

மும்பை பங்குச் சந்தையின் சென்செக்ஸ் குறியிடு பெரும்பாலானோர் கவனிக்கும் ஒரு முக்கிய குறியீடு
அதே போல் இந்தச் சந்தையில்தான் இந்தியாவின் பெரும்பான்மை நிறுவனங்கள் பட்டியலிடப் பட்டிருக்கின்றன

இந்த இரண்டு பெருமைகளைத் தவிர முக்கியமான மற்ற பல விஷயங்களில் அரசு ஆரம்பித்த தேசிய பங்குச் சந்தைதான் முன்னணியில் உள்ளது.

சந்தையில் பண வர்த்தகம் (cash trading), வரம்பு வர்த்தகம் (margin trading) என்று இரு வகை வர்த்தகங்கள் உண்டு.

பண வர்த்தகத்தில் முதலிட்டாளர் விற்கும் அல்லது வாங்கும் பங்குகளை கண்டிப்பாக ஒப்படைக்க வேண்டும் அல்லது ஏற்றுக் கொள்ள வேண்டும். விற்பவரின் கையில் கண்டிப்பாக அவர் விற்கும் அளவிற்கு பங்குகள் அவரது உரிமையில் இருக்க வேண்டும்.

வரம்பு வர்த்தகத்தில் ஒப்பந்தத் தீர்வு கால (settlement time) ஆரம்பத்தில் விற்றப் பங்குகளை அந்தக் காலம் முடியும் முன் சந்தையில் வாங்கியோ அல்லது வாங்கிய பங்குகளை விற்றோ ஈடு (square off) கட்டி விடலாம். விற்பவரின் கையில் பங்குகள் இருக்க வேண்டிய அவசியமில்லை.

பண வர்த்தகப் பிரிவில் இந்தியாவில் நடக்கும் வர்த்தகத்தில் மூன்றில் ஒரு பகுதிக்கும் குறைவாகவே மும்பைப் பங்குச் சந்தையில் வர்த்தகம் நடந்து வந்தது.

அதே போல Derivatives பிரிவில் மும்பைப் பங்குச் சந்தையில் ஆகக் குறைந்த அளவிலேயே வர்த்தகம் நடந்து வந்தது.

பங்குச் சந்தை உரிமையையும் வர்த்தக உரிமையும் இணைத்து இயக்கும் கொள்கையைக் கடைப்பிடித்ததாலும், சந்தைச் சீர்திருத்தங்களை மும்பைப் பங்குச் சந்தை நிறுவனர்கள் தொடர்ந்து புறக்கணித்ததாலும் இந்த நிலை வந்தது என்கிறார்கள் இந்தத் துறை வல்லுனர்கள்.
புதிய கட்டமைப்புடனும் புதிய நோக்கங்களுடனும் புதிய பயணம் தொடங்கியிருக்கும் இந்தியாவின் மிகப் பழமையான சந்தை வெற்றிகள் பல காண வாழ்த்துவோம்.

இந்திய அமெரிக்க உறவுகள் - ஒரு அலசல்

2005-08-14T01:52:00.000-07:00

இரு நாடுகளுக்கிடையே உள்ள உறவை அந்த இரு நாட்டு அரசுகளுக்கிடையே உள்ள உறவாகத்தான் பெரும்பாலானோர் கருதுவார்கள். இருந்தும் நடப்பில் வணிக உறவுகளும், இரு நாட்டுக் குடிமக்களுக்கிடையே உள்ள தனிப் பட்ட உறவுகளும், அவற்றின் தாக்கங்களும் மிக முக்கியமானவை. இந்த உறவுகள் சில சமயம் அரசுகளின் உறவுகள் செல்லும் திசைக்கு எதிர் திசையில் செல்லக் கூடும். அத்தகைய நிலை, அரசின் உறவுகளைக் கூட எதிர் திசையில் திருப்பி விடக் கூடிய வல்லமை பெற்றது. இதற்கு மிகப் பெரிய உதாரணம் இந்தியாவிற்கும் அமெரிக்காவிற்கும் இடையே உள்ள உறவின் தற்போதைய நிலை.

அணி சேரா நாடுகள் என்று தங்களை பிரகடனப் படுத்திக் கொண்ட நாடுகளில் ஒன்றான இந்தியா, பனிப்போர் (சுய உந்துதல் அற்ற போர்?! ஆங்கிலத்தில் - Cold War) நடந்த சமயத்தில், உண்மையில் அரசியல் காரணங்களுக்காக வல்லரசுகளில் ஒன்றான சோவியத் யூனியனிடம் நெருக்கம் காட்டி வந்தது. அதேபோல் பிரகடனம் செய்து கொண்ட சீனாவும் பாகிஸ்தானும் கூட உண்மையில் அமெரிக்காவிற்கு ஆதரவான செயல்கள் புரிந்து வந்தன.

இதெல்லாம் நடந்த போதிலும் இந்தியாவின் மக்களாட்சி என்ற பரிட்சை வெற்றி பெற வேண்டும் என்ற விழைவு அமெரிக்காவிற்கு எப்போதுமே இருந்து வந்திருக்கிறது. கம்யூனிஸம் என்ற அதற்குப் பிடிக்காத தத்துவம் தழைக்கக் கூடாது என்ற சுயநலமும் இதற்கு ஒரு காரணம் என்று சொல்லலாம். அதனால்தான் இந்தியாவில் பஞ்சம் தலைவிரித்தாடிய போதெல்லாம் அமெரிக்கா உதவிக் கரம் நீட்டியது.

ஆனால் 1970 களில் அமெரிக்காவின் நண்பனான பாகிஸ்தானைப் பிரித்து வங்காள தேசம் என்ற புதிய நாடு உருவாக இந்தியா துணை நின்ற போது அமெரிக்கா அதனை எதிர்த்தது. அப்போது எதிர்வரவிருந்த போருக்குள் சீனா நுழைந்து விடாமல் தடுக்க ஒரு பரஸ்பர ராணுவ உதவி ஒப்பந்தத்தை சோவியத் யூனியனுடன் அமைத்துக் கொண்ட இந்தியா, பாகிஸ்தானுடன் மூண்ட போரில் வென்றது. அமெரிக்காவிற்கு கோபம் தலைக்கேறி, இந்தியாவிற்குச் செய்து வந்த அத்தனை உதவிகளையும் நிறுத்திக் கொண்டது. இந்தியா பிறகு அணுகுண்டுச் சோதனை மேற்கொண்ட பொழுது அமெரிக்காவுடனான உறவுகள் மேலும் மோசமடைந்து இந்தியாவின் மேல் பொருளாதாரத் தடைகளை அமெரிக்கா விதித்தது.

இந்தியாவின் அரசியல் உறவுகள் சோவியத் யூனியனுடன் சற்று இணக்கமாக் அமைந்தாலும், இந்திய மக்களின் பழக்கங்கள் வேறுவிதமாக இருந்தன. அவர்கள் ரஷ்ய மொழி படிப்பதில் ஆர்வம் காட்டவில்லை. ஆங்கிலத்தைக் கற்றுக் கொண்டார்கள். சாரி சாரியாக அமெரிக்காவில் சென்று மருத்துவம் படித்தார்கள். பிற்காலத்தில் கணிப் பொறியியல் படித்தார்கள். அங்கேயே குடியேறினார்கள். அமெரிக்காவின் சந்தைப் பொருளாதாரத்தில் ஈடுபட்டு வெற்றி கண்டார்கள். அமெரிக்கர்களுக்கு இந்தியாவில் இருக்கும் திறமைகளை எடுத்துக் காட்ட ஒரு முன்னுதாரணமாகத் திகழ்ந்தார்கள். ஜீன்ஸ் அணிந்து கொண்டார்கள். ராக் இசை கேட்பதில் நாட்டம் காட்டினார்கள். இரு நாடுகளுக்கிடையே அரசியல் உறவுகள் ரோலர்-கோஸ்டர் (Roller Coaster) பயணம் போல் மேலும் கீழும் அலைந்து கொண்டிருந்தாலும், தனி நபர் உறவுகள் மற்றும் இணக்கங்கள் இரு நாடுகளைடையே வலுப் பெற்றுக் கொண்டிருந்தன.

இன்று தகவல் தொழில் நுட்பத் துறையில் இந்தியா சக்கைப் போடு போடுகிறதென்றால், அதற்கு இங்கிருந்து சென்ற சாதாரண இந்தியக் குடிமகன் அமெரிக்கர்களுக்கு இந்தியத் திறமைகளை எடுத்துக் காட்டி அவர்களுக்கு இந்தியாவின் மேல் நம்பிக்கையை வளர்த்தது ஒரு அசைக்க முடியாத முக்கிய காரணம்.

இந்தியாவில் நேருவின் சோஷலிஸக் கொள்கையின் மேல் மிகுந்த நம்பிக்கையும், சந்தைப் பொருளாதாரம் ஆபத்து மிக்கது என்று அதன் மேல் அவநம்பிக்கையும் வைத்திருந்த இந்தியப் பெற்றோர்கள் கொஞ்சம் கொஞ்சமாக தங்கள் மகளுக்கு அமெரிக்காவின் சந்தைப் பொருளாதாரத்தில் எதிர் நீச்சல் அடிக்கக் கூடிய மணமகனைத் தேடுவதில் ஆர்வம் காட்டத் தொடங்கினார்கள். இப்படியாக இந்தியக் குடிமகனின் நம்பிக்கைகள் மாறத் தொடங்கின. இன்று அமெரிக்காவில் தொழில் அனுபவம் பெறுவது தங்கள் வளர்ச்சிக்கு முக்கியம் என்று நினைப்பவர்கள்தான் இந்தியாவில் அதிகம். அங்கேயே குடியேறும் வாய்ப்புக்கு ஏங்குபவர்களும் முயற்சிப்பவர்களும் அனேகம்,

1990 களில் பொருளாதாரச் சீர்திருத்தங்கள் கொண்டு வந்த பொழுது பழமையில் ஊறிய பலருக்கு அதில் நம்பிக்கையில்லை. முந்தைய பா.ஜ.க அரசின் தலைவர்களில் சிலர்தான் இந்தியாவும் அமெரிக்காவும் இயற்கையில் நண்பர்கள் என்று கருத்துச் சொல்ல ஆரம்பித்தார்கள்.

இடையில் இந்தியத் தொழில் மற்றும் பொறியியல் வல்லுனர்களின் திறமையால் தகவல் தொழில் நுட்பத் துறையில் இந்தியா பலமான நிலைக்குத் தன்னை வளர்த்துக் கொண்டது. இருநாடுகளின் சாதாரணக் குடிமக்களிடையே நல்லிணக்கம் வளராமல் இது சாத்தியமில்லை.

9/11 சம்பவத்திற்குப் பிறகு இந்தியாவும் அமெரிக்காவும் தீவிரவாததிற்கு எதிரான போரில் ஓரணியில் இருப்பது தெளிவாகியது. மக்களாட்சி மற்றும் மத நல்லிணக்கக் கொள்கைகளை நம்பும் இந்திய மக்களிடையே மற்ற அண்டை நாடுகளில் காணப் படும் மத அடிப்படைவாதமும் அதை ஒட்டிய தீவிரவாதமும் அளவில் குறைந்து காணப்படுகிறது.

வளர்ந்து வரும் எதிர்கால ஆசிய வல்லரசுகளில் இந்தியாவின் மக்களாட்சி முறை வெற்றி பெறுவதின் முக்கியத்துவம் அமெரிக்காவிற்குப் புரிந்திருக்கிறது. உலக வர்த்தகத்தில் இந்தியப் பங்கின் எதிர்கால மதிப்பும் அவர்களுக்குத் தெரிந்திருக்கிறது. அதனால்தான் சமீப காலங்களில், தனது நெடுநாளைய கொள்கைகளை மாற்றிக் கொள்ள வேண்டியிருந்த போதும் கூட, இந்தியாவிற்கு அணுசக்தித் தொழில் நுட்பத்தைத் தருவதில் அமெரிக்கா தயக்கம் காட்டவில்லை. இதற்கு இரானிடம் இந்தியா எரிவாயு வாங்குவது அமெரிக்காவிற்குப் பிடிக்கவில்லை, மியான்மாரிடம் சக்தி வாங்குவது அமெரிக்காவிற்குப் பிடிக்கவில்லை என்ற அரசியல் காரணங்கள் கூறப்படலாம். இந்திய அமெரிக்கக் குடிமக்களிடையே உறவுகள் மற்றும் நம்பிக்கைகள் பலப்படுவதும் அதிமுக்கியக் காரணம்.

(இந்தக் கட்டுரை கடந்த சில வாரங்களில் வெளியாகிய எகனாமிக் டைம்ஸ் கட்டுரைகளைத் தழுவி எழுதப் பட்டது)

டிஸ்கவரி ஓடம் தரையிறங்கப் போகிறது

2005-08-07T09:00:00.000-07:00

கொலம்பியா ஓடம் 2003 ஆம் ஆண்டின் இறுதியில் தரையிறங்கும் போது கோரமான விபத்துக்குள்ளாகியது. கல்பனா சாவ்லா உள்ளிட்ட பல அற்புதமான விண்வெளி ஆய்வு வல்லுனர்களை நாம் இழந்து தவித்தோம். அந்தக் கோரக் காட்சிகள் இன்னும் நம் நினைவில் பசுமையாக உள்ளன.

இன்று பல கடுமையான ஆய்வுகளும், ஓடத்தை மேம்படுத்தும் முயற்சிகளும், வல்லுனர்களுக்கிடையே சர்ச்சைகளும் முடிந்த பின் டிஸ்கவரி ஓடம் விண்வெளியை நோக்கி ஏவப்பட்டு 13 நாட்கள் முடிவடைந்து விட்டது.

டிஸ்கவரியும் வெற்றியுடன் சர்வதேச விண்வெளி ஆய்வு நிலையத்தைச் சென்று அடைந்து விட்டது.

விண்வெளி ஓடத்தின் வெளிப்புறப் பரப்பில், வளிமண்டலத்திற்குள் ஓடம் நுழையும் போது காற்றுடன் உராய்வதால் ஏற்படக்கூடிய அதிமிதமான வெப்பம் ஒடத்தைத் தாக்காத வகையில் கண்ணாடி ஓடுகள் பொருத்தப் பட்டிருக்கும்.

விண்வெளியில் டிஸ்கவரி ஓடத்தின் வெளிப்புறத்தைச் சோதனையிட்ட போது, இந்த ஒடுகளுக்கிடையே இருக்கும் இடைவெளியை நிரப்ப உபயோகித்த பொருள் இரண்டு இடங்களில் சற்று வெளியே துருத்திக் கொண்டிருந்தது கண்டு பிடிக்கப் பட்டது.

உடனடியாக இந்தப் பிரச்சனைகளை ஓடத்தில் சென்ற விண்வெளி வீரர்கள், சரித்திரத்திலேயே முதல் முறையாக விண்வெளியில் ஓடத்திற்கு அடியிலே நடந்து சென்று, எதிர்பார்த்ததை விடச் சுலபமாக தீர்த்து விட்டார்கள்.

கொலம்பியா ஒடம் கூட ஒடம் ஏவப்பட்ட போது இந்த கண்ணாடித் தகடுகளுக்கு ஏற்பட்ட சேத்தினால்தான் தரையிறங்கும் போது வெப்பம் தாங்காமல் வெடித்துச் சிதறியது.

பயணம் முடிந்து டிஸ்கவரி சர்வதேச விண்வெளி ஆராய்ச்சி நிலையத்திலிருந்து பிரிந்து தரையிறங்கும் பயணத்தைத் தொடங்கி விட்டது. ஓடத்தின் வெளிப்பரப்பு தரையிறங்கும் சவாலை எதிர்நோக்க முற்றிலும் ஆயத்தமாக இருக்கிறது என்று அறிவித்திருக்கிறார்கள்.

டிஸ்கவரி விமானத்தின் தலைமைப் பொறுப்பில் இருக்கும் விண்வெளி வீரர் ஒரு பெண் என்பது தற்போதைய பயணத்தின் ஒரு சிறப்பு. அவரும் அவரது சக விண்வெளி வீரர்களும் தரையிறங்கும் முன் காமிராவின் முன் சிரித்துக் கொண்டே படம் எடுத்து தரையிலுள்ள கட்டுப்பாட்டுத் தளத்திற்கு அனுப்பியிருக்கிறார்கள். நம்பிக்கையுடனும் மன உறுதியுடனும் மகிழ்வுடனும் தம் பயணத்தைத் துவங்குவதாகக் கூறியிருக்கின்றனர்.

தரையிலிருக்கும் நமக்கே மனதின் ஒரத்தில் சற்று உதறலாயிருக்கும் ஒரு பயணத்தை கட்டுப்படுத்தி இயக்க தரைக் கட்டுப்பாட்டு மையத்தின் இயக்குனர் ஆயத்தமாகியிருக்கிறார்.

ஓடம் நாளை இந்திய நேரப்படி மதியம் 2:15 மணியளவில் கென்னடி விண்வெளி மையத்தின் ஓடம் தரையிறங்க அமைக்கப் பட்டிருக்கும் ஓடு பாதையில் தரையைத் தொடப் போகிறது.

ஓடம் தனது விண்வெளி ஆராய்ச்சிப் பணியை செவ்வனே முடித்து விட்டாலும், இந்தப் பயணத்தின் வெற்றி ஓடம் பத்திரமாகத் தரையிறங்கிய பின்னர்தான் தீர்மானிக்கப் படப் போகிறது. ஓடம் பத்திரமாக தரையைத் தொடும் அந்த கணத்தில்தான் விண்வெளி வீரர்களின் குடும்பத்தினர் முகத்தில் நிம்மதிப் புன்னகையைப் பார்க்க முடியும். அந்தப் புன்னகைகள் மிக அழகாயிருக்கப் போகிறது. நாமெல்லாம் தொலைக்காட்சியில் நாளை பார்க்கப் போகிறோம்.

விண்வெளி ஒடத்தின் தலைவிக்கும், அதன் வீரர்களுக்கும், கென்னடி விண்வெளி மைய இயக்குனர்களுக்கும் மன உறுதியும், நிதானமும் நிலைக்கும் வகையில் நம் அனைவர் சிந்தனையும் அவர்களுடன் இருக்கட்டும். பதட்டத்தைக் கட்டுப் படுத்திக் கொள்ளும் மன உறுதி அவர்களுக்குத் தரையில் கால் வைத்து நடந்து வீடு நோக்கி செல்லும் அந்த பத்திரமான பயணம் தொடங்கும் வரை நிலைக்கட்டும்.

சு-டோகு

2005-07-29T23:07:00.000-07:00

சென்னையைப் பற்றிக் கொண்டிருக்கும் ஹிந்து நாளிதழின் கடைசி பக்க சமாச்சாரம். "தேமே" என்று சொடக்கு போட்டுக் கொட்டாவி விட்டுக் காலம் கடத்திக் கொண்டிருந்த நம்மை இந்த சு-டோகு வந்து விவகாரத்தில் மாட்டி விட்டது.

சு-டோகு ஒரு மூளையைக் கசக்கும் விளையாட்டு அல்லது புதிர். ஒரு சதுரத்தின் 81 கட்டங்களில் சில கட்டங்களில் மட்டும் 1 முதல் 9 வரையான இலக்கங்களை நிரப்பியிருப்பார்கள். மிச்சக் கட்டங்களை 1 முதல் 9 வரையான இலக்கங்களைக் கொண்டு நாம் நிரப்ப வேண்டும்.

விதிமுறைகள் உண்டு. நிரப்பப் பட்ட சு-டோகு புதிரில், எந்த ஒரு அகல அல்லது உயர வரிசையிலும் 1 முதல் 9 வரை எண்கள் ஒரே ஒரு முறைதான் வரலாம். அனைத்து எண்களும் ஒவ்வொரு வரிசையிலும் உபயோகப்படுத்தப் பட்டிருக்க வேண்டும் என்பது சொல்லாமலேயே புரியும். 81 கட்டங்களுள்ள ஒரு சதுரம் 9 கட்டங்களுள்ள 9 சிறிய சதுரங்களை உள்ளடக்கியிருக்கும். இந்த சிறிய சதுரங்கள் ஒவ்வொன்றுக்குள்ளும் 1 முதல் 9 வரையான இலக்கங்கள் ஒரு முறைதான் வரலாம்.

என் நாலாவது படிக்கும் பெண் போன வாரம் நாளிதழை தூக்கிக் கொண்டு வந்து, "இருவரும் சேர்ந்து புதிரை விடுவிக்கலாம்" என்றாள். அவளுடைய வகுப்புத் தோழி சு-டோகு போட்டு ·பிலிம் காட்டி விட்டதால் நம் தலையில் விடிந்து விட்டது. இந்த மாதிரியான பேராபத்துகளை திருமணத்திற்கு முன் எதிர்பார்க்காமல் ஒரு வெகுளித் தனமாக இருந்து விடுகிறான் மனிதன். அதுவும் தலைமுறை தலைமுறையாக!

நமக்கும் மூளைக்கும் தூரம் அதிகம் என்பதைப் பெண்ணிடம் எப்படி வெளிப்படையாக ஒத்துக் கொள்வது. "என்னடா வம்பாகி விட்டதே" என்று யோசித்துக் கொண்டே குழந்தையிடம் "இந்த வாரம் அப்பா பிஸி. அடுத்த வாரம் பார்க்கலாம்" என்று சமாளிக்க வேண்டியிருந்தது.

நடுவில் ஒரு நாள் ஹிக்கின்பாதம்ஸ் போக வேண்டியிருந்தது. அங்கே ஏதேச்சையாகப் பார்த்தால், சு-டோகு புதிரை விடுவிப்பது எப்படி? என்று ராபின் வில்ஸன் என்பவர் எழுதிய புத்தகம் இருந்தது. சல்லிசாக 95 ருபாயில் கிடைத்ததை ஏதோ கடவுளே வரம் கொடுத்த மாதிரி ஒரு உணர்வுடன் வாங்கி வந்து அவசரகதியில் படித்த்தால்தான் இன்று தப்பிக்க முடிந்தது. பின்னே மண்டபத்தில் யாரவது சு-டோகு விடுவித்துக் கொடுத்து அதையா கொண்டுவந்து பெண்ணிடம் காட்ட முடியும்.

இன்று காலை எழுந்தவுடம் முதல் காரியமாக "அப்பா! போன வாரமே சொன்னீங்களே... வாங்க இப்பவே சு-டோகு போடலாம்" என்று பெண் நாளிதழுடன் வந்து விட்டாள். விடாக்கண்டி!!

90 நிமிடப் போராட்டத்தின் பின் புதிர் விடுபட்டு ஏதோ கொஞ்ச நஞ்சம் இருக்கும் பெயர் கெட்டுப் போகாமல் காப்பாற்றிக் கொண்டாகி விட்டது. அந்த மகிழ்ச்சியிலும், எங்கேயும் இடி படாமல் (!?!) அடுத்த வேளை சாப்பாடு சாப்பிடலாம் என்ற நிம்மதியிலும் பதிந்த பதிவு இது.

சு-டோகு - பெயரைக் கேட்டால் ஜப்பானியச் சமாசாரம் போலத் தோன்றும் இது 1970 ஆம் வருடம் ந்யூ யார்க் நகரத்தில் உருவாகியது என்று சொல்கிறார்கள். இந்தப் புதிருக்கு முதலில் அமெரிக்கர்கள் இலக்க இடம் (Number Place) என்றுதான் பெயரிட்டிருந்தார்களாம். 1980 வாக்கில் ஜப்பானை அடைந்த இந்த புதிருக்கு ஜப்பானியர்கள் ஸஞ்ஜி வா தோகுஷின் நி ககீரு (Sunji wa dokushin ni kagiru) என்று பெயரிட்டனர். இதற்கு "இலக்கத்திற்கு ஒரு இடம் மட்டுமே" என்று பொருளாம். நாளடைவில் குறுகி சு-டோகு. சு என்றால் இலக்கம். டோகு என்றால் ஒற்றை. சு-டோகு யுனைடெட் கிங்டமை அடைந்து அங்கே ஏறக்குறைய ஒரு வெறித்தனமான பொழுதுபோக்கானது 2004 ஆம் ஆண்டில்தான் என்கிறார்கள்.

எது எப்படியோ! சுனாமி போல் வந்த சு-டோகு ஆபத்து சிற்றலை போல் விலகி விட்டது. தப்பித்தேன்.

காரியமில்லா வாயு !!

2005-07-17T00:56:00.000-07:00

எனது இளைய சகோதரர் அவர் ஆரம்பப் பள்ளி செல்லும் வயதில் கரியமில வாயு என்று எழுதச் சொன்னால், எழுத்துப் பிழையுடன், காரியமில்லா வாயு என்றுதான் எழுதுவார். அது ஒரு காரியத்திற்கும் உதவாத வாயு என்பதால் அந்தப் பெயர் கூடச் சரிதான் என்று நாங்கள் அவரைப் பாராட்டியதுண்டு.

நாம் பிராண வாயுவைச் சுவாசிக்கிறோம் என்று நம்பிக் கொண்டிருக்கிறோம். ஆனால் இன்று நாம் சுவாசிக்கும் காற்றின் ஒவ்வோரு மில்லியன் மூலக்கூறுகளிலும் 380 மூலக்கூறுகள் கரியமில வாயு உள்ளது. சுமார் 500 ஆண்டுகளுக்கு முன்பு வாழ்ந்தவர்கள் சுவாசித்த காற்றில் 280 மூலக் கூறுகள் மட்டுமே கரியமில வாயு இருந்தது.

வளி மண்டலத்தில் கரியமில வாயுவின் அளவு எப்படி இவ்வளவு உயர்ந்தது?

லிட்டருக்கு சுமார் 10 கிலோமீட்டர் செல்லக் கூடிய ஒரு சிற்றுந்தை நீங்கள் ஒரு வருடத்திற்கு 15000 - 20000 கிலோ மீட்டர்கள் உபயோகித்தீர்களாயின், ஏறக்குறைய ஒரு டன் பெட்ரோல் செலவழித்திருப்பீர்கள். அது சுமார் மூன்று டன் எடையுள்ள கரியமில வாயுவை வளிமண்டலத்திற்குள் செலுத்தியிருக்கும்.

அதே போல 1000 மெகாவாட் அளவிற்கு மின்சாரம் உற்பத்தி செய்யும் ஒரு அனல் மின் நிலையம் சுமார் 6 மில்லியன் டன் அளவிற்கு கரியமில வாயுவை வளிமண்டலத்திற்குள் செலுத்துகிறது.

வளிமண்டலத்தில் கரியமில வாயுவின் அபரிமிதமான வளர்ச்சிக்கான காரணம் இதுதான்.

கரியமில வாயு காற்றை விட எடை அதிகமானது ஆகவே கடல் மட்டத்திலேயே சஞ்சரிக்கிறது. இதனால் உலகின் சராசரி வெப்ப நிலை சிறிது சிறிதாக உயர்ந்து வருகிறது. அதன் விளைவாக கடல் மட்டம் அதிகரித்து வருகிறது. கடலின் அமிலத் தன்மை அதிகரித்து வருகிறது.

கரி, இயற்கை எரி வாயு, மற்றும் கச்சா எண்ணெயிலிருந்து கிடைக்கும் எரிபொருள்கள் மூலம் கிடைக்கும் சக்தியுடன் கூட இந்தக் கரியமில வாயுவும் கிடைக்கிறது. மேற்கூறிய fossil (தமிழ் பதம் தெரிந்தவர்கள் பின்னூட்டத்தில் குறிப்பிடவும்) எரிபொருள்களுக்கு இன்னும் சரியான மாற்று எரிபொருள்கள் கண்டுபிடிக்காத நிலையில் வளிமண்டலத்தில் கரியமிலவாயுவின் அளவு அதிகரிப்பதைக் கட்டுப் படுத்த முடியாதா?

முடியும் என்கிறார்கள் அறிவியல் அறிஞர்கள்!

எரிபொருளை எரிப்பதால் கிடைக்கும் கரியமில வாயுவை வளிமண்டலத்திற்குள்தான் செலுத்த வேண்டும் என்று எதாவது சட்டம் உள்ளதா என்று இவர்கள் கேட்கிறார்கள். ஆனால் உலகின் அனைத்துப் புகைபோக்கிகளும் இன்று வளிமணடலத்திற்குத்தான புகையை விடுகின்றன. இப்படிச் செய்யாமல் கரியமில வாயுவை நிலத்தடியில் செலுத்தி விட்டால்?

உந்து வண்டிகளில் இப்படிச் செய்வதற்குச் சாத்தியக் கூறுகள் குறைவு. ஆனால் அனல் மின் நிலையங்களில் செய்ய முடியும்.

சாதாரணமாக நிலத்தடிக் குடிநீர் கிடைக்கும் ஆழத்திற்கும் வெகுவும் கீழே துளையிட்டு நுண்துளைகளுள்ள பாறைப் பகுதிக்குள் இந்த வாயுவைச் செலுத்தலாம் என்று தீர்மானித்து பரிசோதனைகளை மேற்கொள்ள ஆரம்பித்திருக்கிறார்கள். சாதாரணமாக இந்த நுண்துளைப் பாறைகளுக்குள் உப்பு நீர் நிறைந்திருக்கும். கரியமில வாயுவை அழுத்ததுடன் இந்த உப்பு நீருக்குள் செலுத்தினால் நிலத்தடியில் உப்புச் சோடா தயாரிக்கலாம்!

கச்சா எண்ணெய் கிணறுகள் உள்ள பகுதிகளில் நுண்துளைப் பாறைகளுக்குள் உப்பு நீருக்குப் பதிலாக கச்சா எண்ணெய் புகுந்திருக்கும். கரியமில வாயுவை கச்சா எண்ணெய் நிறைந்த நுண்துளைப் பாறைப் பகுதிக்கு உள்ளே செலுத்துவதால் எண்ணெயின் பிசுபிசுப்புத் தன்மை குறைக்கப் படுகிறது. நுண்துளைப் பாறைகளினூடே உள்ள எண்ணெய், கரியமில வாயு பட்டவுடன், (அதற்கும் பாறைக்கும் இடையேயான உராய்வு குறைக்கப் பட்டு விடுவதால்) எளிதில் வெளியே தள்ளப் படுகிறது என்று கண்டு பிடித்திருக்கிறார்கள். தூர்ந்து போகும் நிலைக்கு வரவிருக்கும் கிணறுகளுக்குள் கரியமில வாயுவைச் செலுத்துவதன் மூலம் அந்தக் கிணறு அளிக்கும் பலனை வெகுவாக அதிகரிக்கலாம் என்றும் கண்டு பிடித்திருக்கிறார்கள்.

ஆகவே கரியமில வாயு உண்மையில் ஒரு காரியமில்லா வாயு அல்ல.

இவ்வளவு கண்டு பிடித்திருக்கும் அறிவியல் அறிஞர்கள் இப்படி வாயுவை நிலத்துக்குள் செலுத்துவதால் எத்தகைய ஆபத்துகள் வரும் என்று இன்னும் தீர்மானிக்கவில்லை. இரண்டு வகை ஆபத்துகள் புலப்படுகின்றன.

முதல் ஆபத்து: நிலத்தடிக்குள் சென்ற கரியமில வாயு படிப்படியாக மேலெழுந்து வளிமண்டலத்திற்குள் கொஞ்சம் கொஞ்சமாக நுழைந்து விடக் கூடும். இப்படிக் கொஞ்சம் கொஞ்சமாக நுழையும் வாயுவால் அதை நிலத்திற்குள் செலுத்தியத்ற்கான செலவு விரயமாகும். வளிமண்டலச் சீரழிவு எதிர்பார்த்தது போல் கட்டுப் படாது. அவ்வளவுதான்!

இரண்டாவது ஆபத்து: இது கொஞ்சம் பிரச்சனை அதிகமுள்ளது. அழுத்தம் தாங்காமல் நிலத்தடியில் செலுத்தப் படும் வாயு ஒரேயடியாக டன் கணக்கில் பூமியைப் பிளந்து கொண்டு வளிமண்டலத்திற்குள் நுழைந்தால் சுற்று வட்டாரத்தில் உள்ள உயிரினங்கள் மூச்சுத் திணறி இறந்து போகும். எரிமலைகள் கிளப்பும் கரியமில வாயுவின் திடீர் வெளிப்பாட்டினால் இப்படி உலகில் ஏற்கெனவே நடந்திருக்கிறது.

எது எப்படியோ? எதிர்காலச் சந்ததியினர்களுக்கு மண்ணைத் தோண்டினால் பரிசாக நாம் விட்டுச் சென்ற வாயுதான் நிறையக் கிடைக்கப் போகிறது!

எதிர்காலச் சந்ததியினர் நம்மை விடக் கில்லாடிகளாக இருப்பார்கள். நம்மை விட சிறப்பாக தமது சக்தித் தேவைகளை அமைத்துக் கொள்வார்கள் என்ற நம்பிக்கையில்தான் இன்றைய உலகம் ஓடிக் கொண்டிருக்கிறது.